ភ្នំពេញ៖ រដ្ឋលេខាធិការក្រសួង កិច្ចការនារី លោកស្រី ឃីម ចំរើន ថ្លែងក្នុងវេទិការភាពជាអ្នកដឹកនាំ គម្រប់ខួប ៦ឆ្នាំ នៅឯមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC)នៅថ្ងៃទី ០៨ តុលា ថា ស្ដ្រីបានលះបង់យ៉ាងច្រើនលើសលប់ក្នុងការចូលរួមវិស័យសាធារណៈ និងវិស័យឯកជន ពិសេសគឺវិស័យសេដ្ឋកិច្ចគ្រួសារតែម្ដង។ ជាងនេះលោកស្រីថា ព្រោះតែផ្នត់គំនិតសង្គមពីអតីតកាលបានក្លាយជារនាំងសម្រាប់ស្ដ្រី មិនឲ្យចូលរួមក្នុងកិច្ចសង្គមបានអស់ពីសមត្ថភាព ។ ប្រការនេះ នាយិការអង្គការដែលធ្វើការខាងលើកកម្ពស់សិទ្ធិស្ដ្រីយល់ស្របថា ស្ដ្រីពិតជាបានចូលរួមចំណែកក្នុងសង្គមយ៉ាងសកម្មមែន ប៉ុន្ដែគឺនៅមានកម្រិតនៅឡើយ។
ក្នុងវេទិការភាពជាអ្នកដឹកនាំនៅឯមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) រដ្ឋលេខាធិការក្រសួងកិច្ចការនារី លោកស្រី ឃីម ចំរើន បានថ្លែងទៅកាន់អ្នកចូលរួមប្រមាណជាង ៣០០នាក់ នៅថ្ងៃទី ០៨ តុលានេះ ដោយបញ្ជាក់ថា ផ្នត់គំនិតសង្គមនៅតែជាបញ្ហាចោទទៅលើស្ដ្រី ដែលរាំងខ្ទប់ការចូលរួមរបស់ស្ដ្រីក្នុងវិស័យផ្សេងៗដើម្បីអភិវឌ្ឍន៍សង្គមជាតិ។ បន្ថែមពីនេះលោកស្រីថា កិច្ចការក្នុងផ្ទះត្រូវបានគេគិតថា គឺជាការងាររបស់ស្ដ្រីតែម្នាក់ឯង ដែលលោកស្រីស្នើដល់បុរសត្រូវតែផ្ដល់តម្លៃដល់ស្ដ្រី ហើយចូលរួមចែករំលែកការងារផ្ទះជាមួយស្ដ្រីឲ្យបានច្រើន ។លោកស្រី ឃីម ចំរើន«ស្ដ្រីលះបង់ស្ដ្រីចូលរួមវិស័យសាធារណៈ ក៏ដូចវិស័យឯកជន និងវិស័យសេដ្ឋកិច្ចក្នុងការរកចំណូលសម្រាប់គ្រួសារ ប៉ុន្ដែទស្សនៈសង្គមប្រពៃណី ទំនៀមទំលាប់ តែងតែចាត់ទុកការងារផ្ទះជាការងាររបស់ស្ដ្រីតើស្ដ្រីមានដៃប៉ុន្មានធ្វើការងារផ្ទះផង ទៅធ្វើការងារក្រៅផ្ទះផង តើអស់លោកជាបុរសផ្លាស់ប្ដូរទេផ្នត់គំនិតនេះ»។
រដ្ឋលេខាធិការក្រសួងកិច្ចការនារី ក៏បានសង្កត់ធ្ងន់ដែរថា ក្រសួងកិច្ចការនារី គឺបានខិតខំប្រឹងប្រែងយ៉ាងខ្លាំងដើម្បីលើកស្ទួយស្ដ្រីឲ្យបានចូលរួមចំណែកកាន់តែច្រើនក្នុងកិច្ចការសង្គម។
ទាក់ទិនបញ្ហានេះដែរ លោកស្រី ធីតា ឃឹះ នាយិការអង្គការសីលការ ដែលធ្វើការលើផ្នែកលើកកម្ពស់សិទ្ធិស្ដ្រី បានផ្ដល់បទសម្ភាសន៍មកកាន់វិទ្យុស្ដ្រី FM102 នៅថ្ងៃ សៅរ៍ ទី ០៨ ខែ តុលា នេះថា បច្ចុប្បន្នស្ដ្រីពិតបានចូលរួមក្នុងវិស័យសាធារណៈ វិស័យឯកជន ក្នុងភាពជាអ្នកដឹកនាំយ៉ាងសកម្មពិតមែន ក៏ប៉ុន្ដែចំនួនស្ដ្រីគឺនៅមានចំនួនតិចតួចនៅឡើយ ។
នាយិការអង្គការដែលធ្វើការលើផ្នែកស្ដ្រីរូបនេះឲ្យដឹងបន្ថែមថា ចំនួនស្ដ្រីនៅតែមានចំនួនតិចតួចដដែល បើសិនរាជរដ្ឋាភិបាល ពិសេសក្រុមគ្រួ សារស្ដ្រីផ្ទាល់ មិនបានបើកឱកាសដល់ស្ដ្រីឲ្យកាន់តែទូលាយ និងបន្ថែមការលើកទឹកចិត្ដទេ នោះ គឺស្ដ្រីនៅមិនអាចមានចំនួនកាន់តែច្រើនចូលរួមក្នុងសង្គមបានដដែល។ លោកស្រី ធីតា ឃឹះ៖«រដ្ឋាភិបាលត្រូវតែធ្វើការផ្សព្វផ្សាយឲ្យខាងប្រជាពលរដ្ឋហ្នឹងដឹងពីច្បាប់ទម្លាប់ដែលយើងមាន ហើយអនុវត្ដន៍មានគោលនយោបាយ លើកកម្ពស់ជាពិសេសដល់ស្ដ្រីដើម្បីផ្ដល់ឱកាសដល់ស្ដ្រី»។
សូមជម្រាបថា វេទិការភាពជាអ្នកដឹកនាំក្រោមប្រធានបទ «ភាពជាអ្នកបន្ដវេន» នៅឆ្នាំ ២០១៦ នេះធ្វើឡើងលើកទី ០៦ ហើយ ដែលវេទិការនេះរៀបចំឡើងក្នុងគោលបំណងដើម្បីអភិវឌ្ឍន៍សមត្ថភាពអ្នកដឹកនាំ។ វេទិការនេះធ្វើឡើងរយៈពេលបីថ្ងៃចាប់ពីថ្ងៃទី ០៨ ទី ០៩ និងថ្ងៃទី ១០ ខែ តុលា ឆ្នាំ ២០១៦ នៅឯមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) រាជធានីភ្នំពេញ៕
