ភ្នំពេញ៖ ក្រសួងធនធានទឹក និងឧតុនិយម បានសេចក្ដីជូនដំណឹងមួយនៅថ្ងៃទី ០៥ ខែ តុលា ឆ្នាំ ២០១៦ នេះ ដោយបញ្ជាក់ថា ក្រោយការសិក្សា ពីស្ថានភាពប្រែប្រួលអាកាសធាតុរួចមក ឃើញថា ខេត្ដចំនួន ១០ ក្នុងព្រះរាជាណាចក្រកម្ពុជានឹងប្រឈមជំនន់ទឹកភ្លៀង។
សេចក្ដីជូនដំណឹងបញ្ជាក់ថា បន្ទាប់ពីបានតាមដានលើស្ថានភាពអាកាសធាតុ រួចមកឃើញថា ខ្យល់មូសុងនិរតីកំពុង តែបន្ដមានឥទ្ធិពលមកលើព្រះរាជាណាចក្រកម្ពុជា ហើយមិនតែប៉ុណ្ណោះប្រព័ន្ធសម្ពាធទាប ក៏កំពុងតែបន្ដអូសកាត់លើភាគខាងជើងប្រទេសកម្ពុជាផងដែរ។
ការព្យាករណ៍ស្ថានភាពអាកាសធាតុបានឲ្យដឹងថា តំបន់វាលទំនាប និងតំបន់ខ្ពង់រាប នឹងមានភ្លៀងធ្លាក់ក្នុងបរិមាណពីមធ្យមទៅច្រើន ចំណែកតំបន់មាត់សមុទ្រ នឹងមានភ្លៀងធ្លាក់ពីមធ្យមទៅបង្គួរ ដែលប្រជាពលរដ្ឋទាំងអស់ត្រូវតែបង្កើនការប្រុងប្រយ័ត្នឲ្យបានខ្ពស់។
សេចក្ដីជូនដំណឹងរបស់ក្រសួងធនធានទឹក និង ឧតុនិយម បញ្ជាក់ទៀតថាខេត្ដចំនួន ១០ នឹងប្រឈមជាមួយជំនន់ទឹកភ្លៀង ចាប់ពីថ្ងៃទី ០៩ ដល់ថ្ងៃទី ១៣ ខែ តុលា ឆ្នាំ ២០១៦ រួមមាន ខេត្ដរតនគីរី ខេត្ដស្ទឹងត្រែង ខេត្ដព្រះវិហារ ខេត្ដឧត្ដរមានជ័យ ខេត្ដកំពង់ធំ ខេត្ដកំពង់ស្ពឺ និងមួយផ្នែកនៃខេត្ដបន្ទាយមានជ័យ ខេត្ដសៀមរាប និងខេត្ដបាត់ដំបង ករណីនេះក្រសួងធនធានទឹក ក៏សូមអំពាវនាវដល់សាធារណៈជនឲ្យបង្កើនការប្រុងប្រយ័ត្ន គប្បីកុំធ្វេសប្រហេសឡើយ ៕
