ភ្នំពេញ៖នៅថ្ងៃទី ២៥ មករានេះ រដ្ឋមន្រ្តីក្រសួងព័ត៌មានបានផ្ញើលិខិត១ច្បាប់ជូន រដ្ឋមន្រ្តីក្រសួងការបរទេស អំពីនីតិវិធីមួយចំនួន ដែលជាលទ្ធភាពនាំឱ្យវិទ្យុVOAនិងអាស៊ីសេរីអាចបើកការិយាល័យតំណាងរបស់ខ្លួនឡើងវិញនៅកម្ពុជា បើបានគោរពកាតព្វកិច្ចសារពើពន្ធជាមុននោះ។
លិខិតមួយច្បាប់របស់លោក ខៀវ កាញារីទ្ធ រដ្ឋមន្រ្តីក្រសួងព័ត៌មានបានផ្ញើជូនលោក ប្រាក់ សុខុន រដ្ឋមន្រ្តីក្រសួងការបរទេស នៅថ្ងៃនេះ ស្តីពីនីតិវិធីចំពោះការស្នើសុំបើកការិយាល័យតំណាងវិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) នៅក្នុងប្រទេសកម្ពុជាឡើងវិញ ជាអ្វីដែលរដ្ឋាភិបាលក្រុងភ្នំពេញធ្លាប់បើភ្លើងខៀវពីមុនមក។
លិខិតរបស់រដ្ឋមន្រ្តីក្រសួងព័ត៌មានសរសេរថា៖«ចំពោះករណីស្នើសុំបើកការិយាល័យតំណាងវិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) អគ្គនាយកដ្ឋានពន្ធដារ បានស្នើមកក្រសួងព័ត៌មាន មុនផ្តល់អាជ្ញាប័ណ្ណ ឬផ្តល់ការអនុញ្ញាតឲ្យចុះបញ្ជីស្របច្បាប់ដល់ការិយាល័យវិទ្យុទាំងពីរនេះ គួរភ្ជាប់នូវលក្ខខណ្ឌនៃការគោរពកាតព្វកិច្ចសារពើពន្ធជាមុន»។
ក្នុងលិខិតដដែលលោករដ្ឋមន្រ្តីក្រសួងព័ត៌មាន បានបញ្ជាក់ទៀតថា វិទ្យុសំឡេងសហរដ្ឋអាមេរិក (VOA) និងវិទ្យអាស៊ីសេរី (RFA) កន្លងមក បានធ្វើសកម្មភាពផ្សព្វផ្សាយព័ត៌មាន និងបើកការិយាល័យរបស់ខ្លួននៅកម្ពុជា អស់រយៈពេលជាយូរឆ្នាំដោយពុំបានចុះបញ្ជីនៅក្រសួងព័ត៌មាន។ ជានេះវិទ្យុទាំងពីរក៏ពុំបានយកចិត្តទុកដាក់នូវការអនុវត្តកាតព្វកិច្ចចុះបញ្ជីពន្ធដារស្របតាមច្បាប់ និងបទប្បញ្ញត្តិស្តីពីពន្ធដារនោះដែរ។ ក្រោយមក វិទ្យុទាំងពីរនេះ បានសម្រេចបិទការិយាល័យតំណាងរបស់ខ្លួន នៅរាជធានីភ្នំពេញ ដោយខ្លួនឯងហើយពុំបានជូនដំណឹងដល់អាជ្ញាធរមានសមត្ថកិច្ចទៀតផង។
លិខិតមួយច្បាប់នេះក៏បានស្រង់សេចក្តីថ្លែងការណ៍របស់រដ្ឋាភិបាលកាលពីថ្ងៃទី០៣ ខែធ្នូ ឆ្នាំ២០១៨ ដែលថា រាជរដ្ឋាភិបាលកម្ពុជាបានបង្ហាញនូវការប្តេជ្ញាចិត្តយ៉ាងមោះមុត ក្នុងការលើកតម្កើងនូវសិទ្ធិសេរីភាពសារព័ត៌មាន សេរីភាពនៃការបញ្ចេញមតិស្របតាមរដ្ឋធម្មនុញ្ញ និងច្បាប់ដែលមានជាធរមាន។ សេចក្តីថ្លែងការណ៍បញ្ជាក់យ៉ាងច្បាស់ថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក បានផ្តួចផ្តើមគំនិតបិទការិយាល័យតំណាងរបស់ខ្លួនដោយខ្លួនឯង។ ដូច្នេះវិទ្យុទាំងពីរនេះ ក៏មានសេរីភាពបើកការិយាល័យតំណាងរបស់ខ្លួននៅកម្ពុជាឡើងវិញបានផងដែរ។
ជាការកត់សម្គាល់ ក្នុងអំឡុងខែវិច្ឆិកាឆ្នាំ២០១៨កន្លងទៅ គឺនាជំនួបរវាងលោក William A. Heidt ឯកអគ្គរដ្ឋទូតអាមេរិកប្រចាំកម្ពុជា និងលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន លោករដ្ឋមន្រ្តីបានបង្ហាញចេតនាដោយថ្លែងថា កម្ពុជាចង់ឲ្យមានការិយាល័យវិទ្យុសំឡេងសហរដ្ឋអាមេរិក VOA និងការិយាល័យវិទ្យុអាស៊ីសេរី RFA នៅកម្ពុជាឡើងវិញ ដើម្បីងាយស្រួលប្រាស្រ័យទាក់ទងគ្នា។
ដោយឡែកកាលពីដើមខែធ្នូឆ្នាំ២០១៨ដដែល សម្តេច ស ខេង រដ្ឋមន្រ្តីក្រសួងមហាផ្ទៃបានថ្លែងផងដែរថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិកក៏អាចមានសេរីភាពបើកការិយាល័យនៅកម្ពុជាឡើងវិញបានដែរ ព្រោះរាជរដ្ឋាភិបាលមិនបានដាក់សម្ពាធ និងបិទការិយាល័យវិទ្យុទាំង ២ ឡើយ។លោកបន្តថាគឺវិទ្យុទាំង ២ បានសម្រេចបិទដោយខ្លួនឯង ប៉ុន្តែកាសែតឌឹខេមបូឌាដេលី (The Cambodia Daily) ត្រូវដោះស្រាយបំណុលពន្ធដារជាមុនសិន។
សូមរំលឹកជូនថា ស្ថានីយវិទ្យុជាង ៣០ ដែលជួលរលកធាតុអាកាស RFA និង VOA ត្រូវបានបិទ។ វិទ្យុអាស៊ីសេរី ធ្លាប់អះអាងថា ការបិទសំឡេងរបស់ខ្លួននៅកម្ពុជា ការបង្ក្រាបលើប្រព័ន្ធផ្សព្វផ្សាយធ្វើឲ្យខ្លួនមិនអាចបន្តប្រតិបត្តិការបាន។
បន្ទាប់ពីការបិទវិទ្យុនេះ អ្នកយកព័ត៌មាន ២ រូបរបស់វិទ្យុអាស៊ីសេរីត្រូវបានចាប់ខ្លួន និងចោទពីបទ «ប្រមូលព័ត៌មានខុសច្បាប់សម្រាប់ប្រភពបរទេស» ប៉ុន្តែពួកគេត្រូវបានដោះលែងនៅក្រៅឃុំ បន្ទាប់ពីការបោះឆ្នោតជាតិថ្ងៃទី ២៩ ខែកក្កដាដែលគណបក្សប្រជាជនកម្ពុជាឈ្នះបានអាសនៈសភាទាំងអស់។
វិទ្យុអាស៊ីសេរីបានសម្រេចបិទការិយាល័យដោយខ្លួនឯងកាលពីថ្ងៃទី ១០ ខែកញ្ញា ឆ្នាំ ២០១៧។ កាសែត ឌឹខេមបូឌាដេលី បានឈប់ដំណើរការនៅថ្ងៃទី ៤ កញ្ញា ឆ្នាំ ២០១៧ ក្រោយពីមិនមានដំណោះស្រាយជាមួយរាជរដ្ឋាភិបាលស្ដីពីរឿងពន្ធដែលមានតម្លៃជាង ៦ លានដុល្លារ៕