ភ្នំពេញ៖ បេឡាជាតិរបបសន្តិសុខសង្គម ហៅកាត់ថា ប.ស.ស បានផ្តល់ប្រាក់ឧបត្ថម្ភដល់កម្មការិនីក្នុងរយៈពេល ៤ខែចាប់ពីខែមករា ដល់ខែមេសាឆ្នាំ២០១៩នេះ សរុបអស់ចំនួនទឹកប្រាក់ជាង ១ម៉ឺនលានរៀល(១០ ០២៨ ៤០០ ០០០រៀល) ស្មើប្រមាណ ២,៥លានដុល្លារអាមេរិក ដល់កម្មការិនីសរុបចំនួន ២៤ ៩១២នាក់។ នេះបើយោងតាមរបាយការណ៍ចេញផ្សាយដោយបេឡាជាតិរបបសន្តិសុខសង្គមនៅថ្ងៃទី០២ ឧសភា នេះ។
យោងតាម ប.ស.ស រយៈពេល ៤ខែ ក្នុងឆ្នាំ២០១៩នេះ មានស្រ្តីជាកម្មការិនីទៅទទួលសេវាសម្រាលកូនមានចំនួន ២៤ ៩១២នាក់។ ក្នុងនោះបង្កើតកូនបានចំនួន២៥ ០៧១នាក់។
ដោយឡែកក្នុងឆ្នាំ ២០១៨ វិញ ប.ស.ស បានផ្តល់ថវិកាសរុបជាង ២,៦ម៉ឺនលានរៀល(២៦ ២១៣ ៦០០ ០០០រៀល)ស្មើប្រមាណ ៦,៥ លានដុល្លារអាមេរិក ដល់កម្មការិនីសម្រាលកូនចំនួន ៦៥ ០៥៤នាក់។ ក្នុងឆ្នាំ ២០១៨ ដដែលនេះកម្មការិនីសម្រាលកូនបានចំនួន ៦៥ ៥៣៤នាក់។
សូមបញ្ជាក់ថា បើស្រ្តីកម្មការិនីសម្រាលកូនបានមួយនាក់នឹងទទួលបាន ៤០ម៉ឺនរៀល។ សម្រាលបានកូនភ្លោះពីរ ទទួលបាន៨០ម៉ឺនរៀល កូនភ្លោះបីទទួលបាន ១លាន ២សែនរៀល។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហរិញ្ញវត្ថុ ចេញផ្សាយកាលពីចុងខែមេសានេះបានបញ្ជាក់ថា ក្រសួងកំពុងដំណើរការបង្កើតកម្មវិធីមួយឈ្មោះថា «កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម ២ឆ្នាំ» ដែលជាជនមានជីវភាពក្រីក្រ។ កម្មវិធីនេះនឹងការឧបត្ថម្ភជាសាច់ប្រាក់សម្រាប់តែស្រ្តីមានផ្ទៃពោះនៃគ្រួសារក្រីក្រដែលមានប័ណ្ណសមធម៌ និងប័ណ្ណ Post-ID របស់ក្រសួងសុខាភិបាល ទោះបីជាស្រ្តីទាំងនោះជាកម្មករនិយោជិតក៏ដោយ។ ជាងនេះទៀតសម្រាប់កុមារក្រីក្រក្រោមអាយុពីរឆ្នាំនៃគ្រួសារក្រីក្រក៏ទទួលបានប្រាក់ឧបត្ថម្ភនេះដូចគ្នា៕
