ភ្នំពេញ៖ បន្ទាប់ពីក្រសួងព័ត៌មានបញ្ជាឱ្យទូរទស្សន៍ប៉ុស្តិ៍លេខ៣ ឈប់ជួលម៉ោងផ្សាយឱ្យវិទ្យុក្នុងស្រុកមួយ គឺវិទ្យុABC របស់លោកអាចារ្យអេ មានអង្គភាពសារព័ត៌មានជាច្រើន បានចេញមុខគាំទ្រចំពោះចំណាត់ការនេះ។ ពួកគេលើកឡើងថា សកម្មភាពទាំងនេះបានប៉ះពាល់អ្នកសារព័ត៌មាន និងពិធីករពិធីការិនីដែលបំពេញវិជ្ជាជីវៈត្រឹមត្រូវ។ តែយ៉ាងណាមិញ អ្នកជំនាញក្នុងវិស័យព័ត៌មានយល់ថា សកម្មភាពមិនបានជះឥទិ្ធពលទៅលើអ្នកគោរពវិជ្ជាជីវៈនោះទេ តែផ្ទុយទៅវិញទង្វើនេះគឺជាការជាន់ពន្លិចខ្លួនឯងទៅវិញទេ។ កញ្ញា ឆេង ណាតា រាយការណ៍ព័ត៌មាននេះ៖
បើអ្នកចូលមើលបណ្ដាញសង្គម អ្នកនឹងឃើញPage ហ្វេសប៊ុក ជាច្រើន ចែករំលែក គ្នាមើល អំពី ការប៉ះទង្កិចពាក្យសម្ដី រវាងអ្នកគ្រប់គ្រង វិទ្យុABC លោកអាចារ្យ អេ វាយប្រហារ លើ ក្រសួងព័ត៌មាន ដែលបង្គាប់ឱ្យ ទូរទស្សន៍ប៉ុស្តិ៍លេខ៣ឈប់ជួលម៉ោងផ្សាយឱ្យវិទ្យុ ABC ក្នុងកម្មវិធី ABC ៣ Springs។
ក្នុងកម្មវិធីនេះហើយ ដែលក្រុមពិធីការិនី របស់វិទ្យុABC និយាយនិងលេងសើច ក្អះក្អាយ តែពេលនោះពិធីការិនី ឡើងលើកតុ ហើយស្ទុះកាន់ក្បាលមេក្រូ និយាយ។ ឈុតឆាកនេះ នាំឱ្យមានការចាប់អារម្មណ៍ខ្លាំង ដល់ អ្នកលេងហ្វេសប៊ុក ដែលចុងក្រោយនេះ គេបញ្ចេញមតិថា មិនសមមានកាយវិការ ពាក្យសម្ដីមិនសមរម្យសោះ ក្នុងនាមជាស្ត្រី។
រឿងនេះក៏គួបផ្សំមួយទៀត គឺក្រុមពិធីការិនី របស់វិទ្យុ បានធ្វើសកម្មតាមផ្លូវ វាយប្រហារវិទ្យុអាស៊ីសេរី ថា គាំទ្រ អាមេរិក មិនឱ្យលុបបំណុល របស់ប្រទេសកម្ពុជា ដែលជាបំណុលសល់ពី របបសាធារណរដ្ឋខ្មែរ របស់លោកសេនាប្រមុខ លន់ នល់។ កាយវិការរបស់ពិធីការិនី វិទ្យុABC បាននាំក្រសួងព័ត៌មាន ចេញលិខិតបញ្ជាឱ្យទូរទស្សន៍ប៉ុស្តិ៍លេខ៣ឈប់ជួលម៉ោងផ្សាយឱ្យវិទ្យុ។
លោក មឿន ឈានណារិទ្ធ សាស្ត្រាចារ្យផ្នែកព័ត៌មាននៃដេប៉ាដឺម៉ង់ ប្រព័ន្ធផ្សព្វផ្សាយ និងសារគមនាគម មានប្រសាសន៍ថា សកម្មភាពរបស់ក្រុមលោកអាចារ្យអេ មិនបានប៉ះពាល់ធ្ងន់ធ្ងរដល់វិជ្ជាជីវៈអ្នកសារព័ត៌មាននោះទេ ព្រោះអ្វី ក្រុមលោកអាចារ្យអេ បានធ្វើ គឺមិនមែនកំពុងអនុវត្តន៍តាមរបៀបរាយការណ៍ព័ត៌មាននោះទេ។
តែយ៉ាងណាមិញលោកថា វាក៏អាចប៉ះពាល់ដោយប្រយោលទៅលើអ្នកសារព័ត៌មានដែលគេគោរពវិជ្ជាជីវៈត្រឹមត្រូវ។
បែបនេះនេះក្តី លោកថា អ្នកដែលប៉ះពាល់ធ្ងន់ធ្ងរជាងគេ គឺក្រុមអ្នកអត្ថាធិប្បាយរបស់វិទ្យុABC ទៅវិញទេ។ លោក មឿន ឈានណារិទ្ធ ចង់ឱ្យសាធារណៈជន បង្កើននូវអក្ខរភាពនៃប្រព័ន្ធផ្សព្វផ្សាយ ដើម្បី អាចបែងចែកថាអ្វីទៅជាវិជ្ជាជីវៈសារព័ត៌មាន ហើយអ្វីជាការធ្វើអត្ថាធិប្បាយបែបបញ្ចេញមតិ។
ជាមួយគ្នានេះដែរលោកចង់ឱ្យអ្នកសារព័ត៌មានទាំងអស់ពង្រឹងនូវវិជ្ជាជីវៈសារព័ត៌មាន និងគោរពតាមច្បាប់អ្នកសារព័ត៌មានឱ្យបានរឹងមាំ ដើម្បីលើកតម្កើងវិជ្ជាជីវៈឱ្យកាន់តែមានតម្លៃ និងទទួលបានការគោរពពីសាធារណៈជន។
កម្មវិធី ABC ៣ Springs របស់វិទ្យុABC ត្រូវបានគេកត់សម្គាល់ឃើញថា ពិធីករពិធីការិនីនៃការកម្មវិធីនេះ បានបង្ហាញកាយវិការ រញ៉េរញ៉ៃ លោតច្រងេងច្រងាង ដែលអាចប៉ះពាល់ដល់តម្លៃស្ត្រីខ្មែរ ហើយលើសពីនេះទៀតនោះ ធ្វើឱ្យប៉ះពាល់ដល់ពិករពិធីការិនីដ៏ទៃទៀតដែលបំពេញវិជ្ជាជីវៈការងារត្រឹមត្រូវប្រកបដោយវិជ្ជាជីវៈរបស់ខ្លួនដែរ។
លោក ទូច សុខៈ ប្រធានសមាគមពិធីករពិធីការិនី លើកឡើងថា ប្រជាពលរដ្ឋសម័យនេះគេមានការបែងចែកច្បាស់អ្នកណាជាពិធីករអាជីព អ្នកណាមិនមែនអ្នកអាជីព ក្នុងន័យនេះលោកយល់ថា សកម្មភាពរបស់ពិធីករវិទ្យុABC មិនបានប៉ះពាល់ដល់ពិធីករដែលគោរពក្រមសីលធម៌វិជ្ជាជីវៈឡើយ។ តែលោកយល់ថាសកម្មភាពរបស់ពួកគេ គឺបានប៉ះពាល់ទៅតម្លៃស្ត្រីខ្មែរ ដែលក្នុងនាមជាស្ត្រីខ្មែរម្នាក់ត្រូវមានឥរិយាបទ និងកាយវិការទន់ភ្លន់ទៅតាមប្រពៃណីខ្មែរ។
សេចក្តីថ្លែងការណ៍អង្គភាពមួយចំនួនដែលបានចេញសេចក្តីថ្លែងការណ៍គាំទ្រ ចំណាត់ការរបស់ ក្រសួងព័ត៌មាន ក្នុងនោះរួមមាន សហភាពសហព័ន្ធអ្នកសារព័ត៌មាន ក្លឹបអ្នកកាសែតកម្ពុជា សមាគមមជ្ឈមណ្ឌលអ្នកសារព័ត៌មានកម្ពុជា ជាដើម បានលើកឡើងថា វិធានការនេះ នឹងក្លាយជា «មូលដ្ឋានគំរូ» ដើម្បីក្រសួងមានវិធានការដូចគ្នា ចំពោះអង្គភាព ឬបុគ្គលដទៃទៀត ដែលប្រព្រឹត្ត ប្រាស់ចាកក្រមសីលធម៌វិជ្ចាជីវៈ និងប្រព្រឹត្តខុសច្បាប់។
សកម្មភាពទាំងនោះគឺជា ផលប៉ះពាល់ជាវិជ្ជមានចំពោះប្រពៃណីទំនៀមទម្លាប់ របស់ខ្មែរជាពិសេសវិជ្ជាជីវៈអ្នកសារព័ត៌មានកម្ពុជា ដែលកន្លងមកវិទ្យុរបស់លោកអាចារ្យអេ តែងតែរំលោភបំពាន នូវក្រមសីលធម៌ និងវិជ្ជាជីវៈ។
សេចក្តីថ្លែងការណ៍បន្តថា ទង្វើរបស់ក្រុមលោកអាចារ្យអេ នេះ ក៏បានធ្វើឱ្យប៉ះពាល់ដល់ពិធីករ ពិធីការិនី ដ៏ទៃទៀតដែលបំពេញវិជ្ជាជីវៈការងារត្រឹមត្រូវប្រកបដោយវិជ្ជាជីវៈរបស់ខ្លួន។
សមាគម និងអង្គភាពព័ត៌មានទាំងនោះចង់ឱ្យ អ្នកសារព័ត៌មាន ឬពិធីករពិធីការិនីទាំងអស់គោរនូវក្រមសីលធម៌ និងក្រមវិជ្ជាជីវៈឱ្យបានខ្ជាប់ខ្ពាន់។
យ៉ាងនេះក្ដី លោកអាចារ្យអេ និងក្រុម ការងាររបស់បានការពារទង្វើរបស់ខ្លួនយ៉ាងខ្លាំងក្លា ដោយ ចាត់ទុកខ្លួនមិនខុសអ្វី គឺទាំងក្រមសីលធម៌និង ភាពជឿនលឿន នៃប្រព័ន្ធព័ត៌មាន សម័យ ទំនើបនេះ៕