ភ្នំពេញ៖ កាលពេលពីថ្មីៗនេះគណបក្សជំទាស់ធំជាងគេ បានដាក់លិខិតស្នើទៅក្រសួងមហាផ្ទៃ ឲ្យរំលាយកងកម្លាំងសន្តិសុខប្រចាំខណ្ឌនីមួយៗ ទាំងអស់នៅរាជធានីភ្នំពេញ ដោយចោទថា កម្លាំងទាំងនេះបង្កើតដោយខុសច្បាប់។
ក្រុមអ្នកវិភាគមើលឃើញថា បើសិនជាកម្លាំងសន្តិសុខ បង្កើតឡើងដោយខុសច្បាប់ គឺក្រសួងមហាផ្ទៃត្រូវតែរំលាយ និងចាប់អ្នកបង្កើតយកមកផ្តន្ទាទោសទៅតាមច្បាប់។ សូមអញ្ចើញស្តាប់ការរៀបរៀងបទវិភាគនេះដោយលោក ធូ វិរៈ ដូចតទៅ៖
គណបក្សសង្គ្រោះជាតិ បានដាក់លិខិតតវ៉ាដូចនេះ ទៅក្រសួងមហាផ្ទៃកាលពីថ្ងៃទី ២៧ ខែ តុលា ឆ្នាំ ២០១៦។ ខ្លឹមសារក្នុងលិខិតនោះបញ្ជាក់ថា៖«ចាប់តាំងពីឆ្នាំ២០១៣មក អាជ្ញាធររាជធានីភ្នំពេញ តែងតែប្រើប្រាស់កម្លាំងសន្តិសុខមួយប្រភេទ ដែលមិនស្គាល់អត្តសញ្ញាណ និងមានឯកសណ្ឋានខុសពីមន្ត្រីកងកម្លាំងសន្តិសុខ ឬនគរបាលរបស់ក្រសួងមហាផ្ទៃ ដើម្បីធ្វើការបង្ក្រាបដោយហិង្សា ដោយការប្រើដំបង និងជំពាមកៅស៊ូគ្រាប់ដែកទៅលើការជួបជុំ ការធ្វើបាតុកម្ម និងកូដកម្មដោយសន្តិវិធីរបស់គណបក្សសង្គ្រោះជាតិ សហជីព សង្គមស៊ីវិល និងប្រជាពលរដ្ឋរងគ្រោះដោយបញ្ហាដីធ្លីជាដើម»។
ជុំវិញលិខិតរបស់គណបក្សប្រឆាំងនេះ អ្នកនាំពាក្យក្រសួងមហាផ្ទៃ ឧត្តមសេនីយ៍ ខៀវ សុភ័គ បានផ្តល់បទសម្ភាសន៍ខ្លីជាមួយវិទ្យុស្ត្រីថា លោកមិនទាន់ទទួលបានលិខិតស្នើសុំឲ្យលុបចោលកងកម្លាំងសន្តិសុខ នៅឡើយទេ។ ប៉ុន្តែលោក ខៀវ សុភ័គ ថា រឿងនេះគណបក្សប្រឆាំងអាចប្តឹងទៅតុលាការ ប្រសិនបើករណីកងកម្លាំងសន្តិសុខ បង្កើតឡើងដោយខុសច្បាប់មែននោះ។
លោក ខៀវ សុភ័គ៖«អ្នកណាអ្នកថា ក្រសួងមហាផ្ទៃខ្ញុំ មិនឃើញផង។ ខ្ញុំមិនជាអ្នកឆ្លើយឆ្លងជាមួយគណបក្សសង្គ្រោះជាតិទេ ។ បើរកឃើញថា កម្លាំងខុសច្បាប់មិនប្តឹងទៅ បើគ្រាន់បើប្តឹងទៅតុលាការ»។
តែបែបនេះក្ដីលោក ឡុង គឹមឃន អ្នកសិក្សាគោលនយោបាយការបរទេស និងច្បាប់អន្ដរជាតិ បានឲ្យដឹងថា បើតាមច្បាប់របស់ប្រទេសកម្ពុជា គ្មានច្បាប់ណាមួយ ឬ រដ្ឋធម្មនុញ្ញចែកឲ្យស្ថាប័នរដ្ឋបង្កើតកម្លាំងសន្តិសុខឡើយ។ លោកថា ការបង្កើតកម្លាំងសន្តិសុខនេះ បានរំលោភរដ្ឋធម្មនុញ្ញយ៉ាងធ្ងន់ធ្ងរ។
លោក ឡុង គឹមឃន បន្តថា ប្រសិនបើកងកម្លាំងសន្តិសុខបង្កើតឡើងដោយខុសច្បាប់មែននោះ ក្រសួងមហាផ្ទៃត្រូវតែរំលាយចោល និងចាប់អ្នកបង្កើតមកផ្តន្ទាទោសទៅតាមច្បាប់។
លោក ឡុង គឹមឃន៖«ខ្ញុំយល់ថា ត្រូវរំលាយក្រុមសន្តិសុខឯកជន និងចេញទៅវិញ ហើយមិនត្រឹមតែរំលាយចោលទេ ត្រូវរកអ្នកទទួលខុសត្រូវ ព្រោះកងកម្លាំងហ្នឹងបង្កើតតាំងពីឆ្នាំ ២០១៣ មក ដោយចូលរួមសកម្ម នៅក្នុងការប្រើអំពើហិង្សាវាយបង្ក្រាបទៅលើបាតុករយ៉ាងព្រៃផ្សៃ ដូច្នេះត្រូវរកអ្នកទទួលខុសត្រូវចំពោះរឿងនិង ហើយរំលាយកងកម្លាំងនោះចោល»។
ដូចគ្នានេះដែរ សាស្ត្រាចារ្យវិទ្យាសាស្ត្រនយោបាយ លោក សូ ចន្ថា យល់ឃើញថា ក្រសួងមហាផ្ទៃត្រូវតែលុបបំបាត់ក្រុមសន្តិសុខទាំងនោះ ព្រោះបង្កើតឡើងដោយខុសច្បាប់។ លោកថា ក្រុមសន្តិសុខទាំងនោះគឺ មិនបានបណ្តុះបណ្តាលវិជ្ជាជីវៈត្រឹមត្រូវ ដូចកងកម្លាំងប៉េអឹម នរគបាល និងកងកម្លាំងរាជអាវុធហត្ថ។
លោក សូ ចន្ថា៖«ជាទស្សនៈរបស់ខ្ញុំត្រូវតែលុបបំបាត់ក្រុមសន្តិសុខនេះចេញ ព្រោះគ្មានក្របខណ្ឌអ្វីច្បាស់លាស់ទេ ហើយក៏គ្មាននរណាម្នាក់ទទួលខុសត្រូវដែរ»។
ក្រុមអ្នកវិភាគពន្យល់ដូចៗគ្នាថា ការបង្កើតកងកម្លាំងសន្តិសុខទាំងនេះ ទំនងជាចង់គេចវេសអំពីការទទួលខុសត្រូវ នៅពេលកម្លាំងទាំងនោះបានប្រើអំពើហឹង្សា ទៅលើសកម្មជនសិទ្ធិមនុស្ស សកម្មជនការពារដីធ្លីជាដើមដែលពួកគេថា ជាកម្លាំងក្រៅក្របខណ្ឌរដ្ឋ។
គេសង្កេតឃើញកម្លាំងសន្តិសុខ ខណ្ឌនៅរាជធានីភ្នំពេញ បានបង្កើត នៅអំឡុង ឆ្នាំ២០១២ស្របពេល ពលរដ្ឋ ដែលមានជំលោះដីធ្លី បានចេញតវ៉ា ជាពិសេស សហគមន៍ បឹងកក់តវ៉ា ការទាមទារ បានសិទ្ធិរស់ នៅសមរម្យ។ កងសន្តិសុខ បានប៉ះទង្គិច ជាមួយ សហគមន៍បឹងកក់ និង សកម្មជន គណបក្សប្រឆាំង ដោយ បណ្ដាលឱ្យមានអ្នករងរបួស ។
តែបែបនេះ ទាំងអ្នកស្រី ទេព វន្នី តំណាងសហគមន៍ និងសកម្មជន គណបក្សសង្គ្រោះជាតិ ១៥នាក់ កំពុងឃុំខ្លួននៅពន្ធនាគារព្រៃសរ ពួកគាត់ ត្រូវបានចោទថា បង្កកុបកម្ម និងប្រឆាំងអ្នករាជការសាធារណៈ គឺពេលបាតុករបានប៉ះទង្គិចជាមួយ កងកម្លាំងសន្តិសុខខណ្ឌ៕
