ភ្នំពេញ ៖ នៅថ្ងៃអាទិត្យទី ២២ មករាឆ្នាំ ២០១៧ បណ្តាញយុវជនកម្ពុជា បានរៀបចំវេទិកា ពិភាក្សាដេញដោលមតិយុវជនក្រោមប្រធានបទ "តើប្រទេសកម្ពុជាចាំបាច់សាងសង់ទំនប់វារីងអគ្គិសនីនៅលើដងទន្លេមេគង្គនិងដៃទន្លេដែរឬទេ?"។ កម្មវិធីនេះរៀបចំនៅ វិទ្យាស្ថានអន្តរទ្វីបអាមេរិចកាំង សាខាទួលគោក ដើម្បីលើកកម្ពស់ការយលដឹងរបស់យុវជនពីបញ្ហាប្រឈម និងគម្រោងសាងសង់ទំនប់វារីគ្គិសនីនានា លើកដងទន្លេមេគង្គ។
លោក ស ម៉ូរី អនុប្រធានបណ្តាញយុវជនកម្ពុជា បានលើកឡើងថា ការរៀបចំកម្មវិធីនេះគឺដើម្បី ឲ្យយុវជនយល់ដឹងពី អភិបាលកិច្ចទឹកទំនប់វារីងអគ្គិសនីនៅលើដងទន្លេមេគង្គនិងដៃទន្លេ ក្នុងប្រទេសកម្ពុជា។ លោកបន្តថា យុវជនដែលជាអ្នកបន្តវេន គួរតែយល់ពីផលប៉ះពាល់ និងអត្ថ ប្រយោជន៍ទាំងនោះ ដើម្បីជាការចូលរួមក្នុងការសម្រេចចិត្ត កសាងទំនប់វារីងអគ្គិសនីទាំងនោះ។
លោក សេង សុណ្ណារិទ្ធ ជាអតីតនិស្សិតសាកលវិទ្យាល័យភូមិន្ទ ថាការចូលក្រោយនេះវាជាភារៈរបស់យុវជន ដែលត្រូវតែយល់ដឹង។ លោកថា ក្រោយពីចូលរួមវគ្គសិក្ខាសាលានេះ លោកទទួលបានព័ត៌មានថ្មីៗ ជាច្រើនដូចជា ការសាងសង់ទំនប់វារីងអគ្គិសនី ដែលធ្វើឲ្យប៉ះពាល់ដល់មច្ចានៅក្នុងទន្លេ និងការដាំដុះនៅជិតតំបន់នោះ។
លោក ហ៊ែម ឧត្តម អ្នកសិក្សាស្រាវជ្រាវសាងសង់ទំនប់វារីងអគ្គិសនីនៅកម្ពុជាបានលើកឡើងថា ប្រទេសកម្ពុជា មានធនធានធម្មជាតិជាច្រើន ដែលអាចឲ្យដែលអាចកែច្នៃ ទាញយកជាអគ្គិសនី ដូចជា ខ្យល់ សារធាតុជីវមាស (សំរាម) និងថាមពលព្រះអាទិត្យផងដែរ។ លោកបន្តថា ទោះ បីជាការបង្កើតទំនប់វារីអគ្គិសនីនេះ កាត់បន្ថយការទិញអគ្គិសនីពីប្រទេសជិតខាងមកប្រើប្រាស់ក៏ដោយ តែរដ្ឋាភិបាលគួរសិក្សាស្វែងយល់ពីផលប៉ះពាល់ និងបញ្ជាក់ឲ្យបានច្បាស់ថា តម្រូវការអគ្គិសនីសរុបប៉ុន្មានឲ្យច្បាស់។
ប្រទេសកម្ពុជា មានទំនប់វារីអគ្គិសនីជាច្រើន ក្នុងនោះមាន ទំនប់វារីអគ្គិសនីស្ទឹងកំចាយ ខេត្តកំពត ដែលជាទំនប់វារីអគ្គិសនីធំបំផុតនៅកម្ពុជា មានសមត្ថភាពផ្គត់ផ្គង់ថាមពលបន្ថែមបានចំនួន ១៩៣,២ មេហ្គាវ៉ាត់។ ទំនប់វារីអគ្គិសនីមួយទៀត គឺគម្រោងវារីអគ្គិសនី ដនសាហុង ដែលបានគ្រោងធ្វើឡើងគឺស្ថិតនៅ លើតួទន្លេមេគង្គ នៅក្នុងតំបន់ស៊ីផាន់ដន ភាគខាងត្បូងប្រទេសឡាវ នៅជិត ២ គីឡូម៉ែត្រ ខាងលើខ្សែទឹកនៃព្រំដែនឡាវ-កម្ពុជា។ ទំបន់នេះផលិតអគ្គិសនី ពី ២៤០ ដល់ ៣៦០ មេហ្គាវ៉ាត់។
