គណៈកម្មាការរៀបចំការបោះឆ្នោត ប្រទេសកូរ៉េខាងត្បូង បានប្រកាស យកថ្ងៃទី៩ ឧសភា ជា ថ្ងៃបោះឆ្នោត ជ្រើសរើសប្រធានាធិបតី ជំនួសលោកស្រីប៉ាគួនហេ ដែល ត្រូវបាន តុលាការ រដ្ឋធម្មនុញ្ញរបស់ប្រទេសនេះ បង្គាប់ឱ្យចាកចេញពីតំណែង ដោយមានរឿងអាស្រូវ បំពានអំណាចរដ្ឋ និងពុករលួយ។
តុលាការរដ្ឋធម្មនុញ្ញ កាលពីថ្ងៃសុក្រទី១០មីនា បានសម្រេចរក្សាសេចក្ដីសម្រេចរបស់សភា ដែលបានបោះឆ្នោតដកហូតអំណាចរបស់អ្នកស្រីប៉ាក។
ប្រធានគណៈកម្មាការរៀបចំការបោះឆ្នោត ប្រទេសកូរ៉េខាងត្បូង Kim Yong-deok បាននិយាយតាមកញ្ចក់ទូរទស្សន៍ថា ការបោះឆ្នោត ចាំត្រូវតែធ្វើឡើង ដើម្បីបញ្ចប់វិបត្តិនយោបាយ ។
ក្រុមប្រឆាំង លោកស្រីប៉ាក ទាមទារឱ្យនាំខ្លួនលោកស្រីទៅតុលាការ និង បានទាមទារឲ្យចាប់ខ្លួនលោកស្រីនាំទៅកាន់តុលាការ។ ក្រុមប្រឆាំង សន្យាថា ពួកគេនឹងប្រមូលផ្ដុំគ្នានៅកណ្ដាលទីក្រុងសេអ៊ូល ជាទីដែលពួកគេធ្លាប់ប្រមូលផ្ដុំនៅរៀងរាល់ចុងសប្ដាហ៍អស់ជាច្រើនខែមកហើយ ដើម្បីដាក់សម្ពាធរដ្ឋអាជ្ញាឱ្យចាប់ខ្លួនលោកស្រី ប៉ាក ។ តែខណៈនេះក្រុមអ្នកគាំទ្រអតីតប្រធានាធិបតីអភិរក្សរូបនេះ ក៏បានចេញតវ៉ាផងដែរ ។អ្នកនាំពាក្យក្រុមបាតុករ គឺអ្នកស្រី ឆយ អ៊ីនសុក និយាយថា ក្រុមបាតុករត្រូវទាមទារឲ្យចាប់ខ្លួនអ្នកស្រី ប៉ាក និងទាមទារឲ្យប្រធានាធិបតីស្តីទី លោក វ៉ាង ឃ្យូ អាន ចុះចេញពីតំណែង។
លោកនាយករដ្ឋមន្ត្រី វ៉ាង បានក្លាយជាប្រធានាធិបតីស្ដីទី នៅពេលដែលសភាបោះឆ្នោតដកហូតអំណាចកាលពីថ្ងៃទី០៩ ខែធ្នូឆ្នាំមុន។ លោកត្រូវបានក្រុមប្រឆាំងចោទថា ជាមនុស្សរបស់ លោកស្រីប៉ាក។
បន្ទាប់ពីតុលាការបានសម្រេចរក្សាសេចក្ដីសម្រេចរបស់សភា បាននាំឲ្យអ្នកគាំទ្រលោកស្រីរាប់រយនាក់ផ្ទុះកំហឹង ដោយក្នុងនោះមនុស្ស ២នាក់ ត្រូវបានគេសម្លាប់ ខណៈពួកគេព្យាយាមឆ្លងកាត់ខ្សែត្រៀមរបស់ប៉ូលិសនៅខាងក្រៅតុលាការ។ ចំណែក បុរសវ័យ ៧៤ម្នាក់ ដែលចូលរួមក្នុងបាតុកម្មនោះ បាន គាំងបេះដូង និងបាត់បង់ជីវិតនៅនឹងកន្លែង។
ក្នុងសំណុំរឿង នេះយ៉ាងតិច មនុស្ស៤នាក់ ត្រូវបានចាប់ខ្លួន ករណីពុករលួយ ហើយក្នុងនោះ ប្រធាន ក្រុមហ៊ុន Samsung ក៏ត្រូវបានចោទ ពីបទផ្ដល់ប្រាក់សំណូក ទៅឱ្យលោកស្រីប៉ាគួនហេ និង មិត្តរបស់ខ្លួនក្នុងគំរោងមូលនិធី អង្គាសប្រាក់ ដើម្បីមនុស្សធម៌។ ជាការពិត លោកស្រីប៉ាក ត្រូវបានសភា ដកហូតតំណែង លោកស្រីរួចទៅហើយ៕ Channel News Asia
