ភ្នំពេញ ៖ នាយកដ្ឋានប្រយុទ្ធ នឹងជំងឺឆ្លង នៃក្រសួងសុខាភិបាល បានបង្ហាញក្ដីព្រួយបារម្ភពីសុវត្ថិភាពចំណីអាហារ នៅក្នុងឱកាសពិធីបុណ្យចូលឆ្នាំខ្មែរខាងមុខ។ សេចក្ដីជូនដំណឹងរបស់នាយកដ្ឋានប្រយុទ្ធ នឹងជំងឺឆ្លង ដែលចេញផ្សាយនៅថ្ងៃទី០៤ ខែមេសា នេះបានបញ្ជាក់ថា ប្រជាពលរដ្ឋនឹងជួបបញ្ហាសុខភាព ដែលមានជាអាទិ៍ ការពុលចំណីអាហារ ឬក៏ចម្លងមេរោគផ្សេងៗ ប្រសិនបើពលរដ្ឋ ធ្វេសប្រហេសក្នុងការបរិភោគចំណីអាហារខ្វះអនាម័យ ការចម្អិនអាហារ និងការទុកដាក់ចំណីអាហារ មិនបានត្រឹមត្រូវ។
ដើម្បីបញ្ចៀសគ្រោះថ្នាក់ព្រោះតែការបិរភោគចំណីអាហារខ្វះអនាម័យ នាយកដ្ឋានប្រយុទ្ធ នឹងជំងឺឆ្លងបានចេញសេចក្ដីណែនាំចំណុចមួយចំនួន ដើម្បីបង្ការបញ្ហានេះ។ ចំណុចទាំងអស់នោះរួមមាន ប្រើប្រាស់ទឹកស្អាត និងម្ហូបអាហារដែលស្អាតជានិច្ច ត្រូវលាងដៃនឹងសាប៊ូ ទាំងមុន និងក្នុងអំឡុងពេលរៀបចំម្ហូបអាហារ ហើយជាពិសេសគឺបន្ទាប់ពីបន្ទោរបង់រួច។ បន្ថែមពីនេះ ចុងភៅត្រូវលាងបន្លែ ផ្លែឈើឲ្យបានស្អាតមុនពេលដាក់ឲ្យសមាជិកគ្រួសារបរិភោគ ។ ត្រូវសម្អាតសម្ភារប្រើប្រាស់សម្រាប់ចម្អិនម្ហូបអាហារឲ្យបានត្រឹមត្រូវ ចម្អិនអាហារឲ្យបានឆ្អិនល្អ ជាពិសេសសាច់សត្វស្លាប ស៊ុត និងអាហារសមុទ្រ។ លើសពីនេះ ត្រូវទុកអាហារឆ្អិន និងអហារឆៅដាច់ដោយឡែកពីគ្នា។
ក្រៅពីនេះ ប្រជាពលរដ្ឋគ្រប់រូប មិនត្រូវរក្សាទុកចំណីអាហារជាច្រើនថ្ងៃពេកនោះទេ បើទោះជាស្ថិតក្នុងកម្រិតសីតុណ្ហភាពសុវត្ថិក៏ដោយ ហើយមិនត្រូវប្រើប្រាស់ចំណីអាហារដែលហួសកាលកំណត់ឡើយ៕
