និស្សិតនិងប្រជាពលរដ្ឋថៃជាច្រើននាក់បានប្រមូលផ្តុំគ្នានៅជិតវិមានរដ្ឋាភិបាលថៃក្នុងទីក្រុងបាំងកកនៅព្រឹកថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥នេះ ដោយទាមទារឱ្យនាយករដ្ឋមន្ត្រីថៃ លោកស្រី Paetongtarn Shinawatra ចុះចេញពីតំណែង បន្ទាប់ពីមានការបែកធ្លាយទូរស័ព្ទជាមួយលោក ហ៊ុន សែន អតីតនាយករដ្ឋមន្ត្រីកម្ពុជា និងបច្ចុប្បន្នជាប្រធានព្រឹទ្ធសភាកម្ពុជា។ នេះបើយោងតាមការចុះផ្សាយរបស់សារព័ត៌មានបាំងកកប៉ុស្តិ៍។
បើយោងតាមសារព័ត៌មាន Thai PBS ក្រៅពីប្រជាពលរដ្ឋ គេឃើញមានសមាជិកគណបក្សប្រឆាំងសាងថៃ គណបក្ស Palang Pracharath និងគណបក្សប្រជាជន បានចូលរួមធ្វើបាតុកម្មស្នើឱ្យលោកស្រី Paetongtarn លាលែងពីតំណែងនៅក្នុងថ្ងៃនេះ។ ប្រធានគណបក្សប្រជាជនថៃ លោក Natthaphong Ruengpanyawut បានថ្លែងថា នាយករដ្ឋមន្ត្រីគួរមានទំនួលខុសត្រូវលើភារកិច្ច ពិសេសត្រូវរំលាយសភាចោល និងប្រគល់អំណាចជូនប្រជាជនវិញតាមរយៈការបោះឆ្នោតសកល។ យ៉ាងណាក៏ដោយ អនុប្រធានគណបក្សប្រជាជន លោក Wiroj Lakkhanaadisorn បានអំពាវនាវឱ្យលោកស្រីលាលែងពីតំណែង ដោយសារលោកស្រីមិនអាចទុកចិត្តបានទៀតទេ។
ការហៅទូរស័ព្ទរយៈពេលប្រហែល ១៧នាទីរវាងលោកស្រី Paetongtarn និងសម្តេច ហ៊ុន សែន កាលពីថ្ងៃទី១៥ ខែមិថុនា ឆ្នាំ២០២៥ ត្រូវបានបែកធ្លាយលើបណ្តាញសង្គម ដោយក្រោយមកសម្តេចទទួលស្គាល់ថា នេះគឺជាសម្រង់សម្តីពិតដែលលោកនិងនាយករដ្ឋមន្រ្តីថៃសន្ទនាគ្នា និងដើម្បីតម្លាភាព សុក្រឹតភាព និងជារបៀបរបបការងារផងនោះ សម្តេចត្រូវថតទុកជាភស្តុតាង។ បន្ទាប់ពីឃ្លីបអូឌីយ៉ូរយៈពេល ១៧នាទីនេះ បានសាយភាយនៅលើប្រព័ន្ធផ្សព្វផ្សាយសង្គមក្នុងប្រទេសថៃ សាធារណៈបានផ្ទុះការខឹងសម្បារប្រឆាំងនឹងរដ្ឋាភិបាលថៃ និងជាពិសេសលើលោកស្រី Paetongtarn ។
យ៉ាងណានៅថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥ ក្រោយលោកស្រី Paetongtarn ចូលប្រជុំយ៉ាងតក់ក្រហល់ស្របតាមការកោះហៅតាមទូរស័ព្ទរបស់មន្រ្តីយោធានិងមន្រ្តីជាន់ខ្ពស់ លោកស្រីបានចេញមុខសុំទោសជាសាធារណៈចំពោះការលើកឡើងអំពីមេបញ្ជាការតំបន់កងទ័ពទី២ ក្នុងពេលសន្ទនាតាមទូរស័ព្ទជាមួយមេដឹកនាំកម្ពុជា លោក ហ៊ុន សែន ដែលត្រូវបានថតដោយសម្ងាត់ និងបែកធ្លាយដល់ប្រព័ន្ធផ្សព្វផ្សាយ។ នាយករដ្ឋមន្ត្រីរូបនេះបញ្ជាក់ថា លោកស្រីមិនបានដឹងថាការហៅទូរស័ព្ទត្រូវបានគេថតនោះទេ។ ជាងនេះ លោកស្រីបានធានាដល់សាធារណជនថៃថា រដ្ឋាភិបាលរបស់លោកស្រីនៅតែរួបរួមជាមួយកងកម្លាំងប្រដាប់អាវុធដើម្បីការពារបូរណភាពទឹកដី ពិសេសលោកស្រីនឹងប្រយ័ត្នប្រយែងចំពោះការប្រើប្រាស់ពាក្យពេចន៍នាពេលអនាគត៕
