en     km
en     km

នគរបាលគ្រោងកោះហៅលោក បេន និងក្រុមការងារករណីប្រតាយប្រតប់ជាមួយពលរដ្ឋម្នាក់

Share

ព្រះវិហារ៖ នៅព្រឹកថ្ងៃទី១៧ ខែតុលា ឆ្នាំ២០២៤នេះលោកវរសេនីយ៍ឯក គង់ គា នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះវិហារបញ្ជាក់ប្រាប់ក្រុមសិក្ខាកាមវិទ្យុស្រ្តីប្រចាំខេត្តព្រះវិហារថា ករណីប្រតាយប្រតប់រវាងពលរដ្ឋម្នាក់ និងក្រុមការងារអភិរក្សរបស់លោក បេន ដាវីស នគរបាលនឹងគ្រោងកោះហៅមកសាកសួរនៅស្នងការដ្ឋានខេត្តនៅថ្ងៃទី២០ ខែតុលា ខាងមុខនេះ។

លោកវរសេនីយ៍ឯកសុំមិនបកស្រាយករណីនេះនោះទេ ដោយទុកឱ្យតុលាការជាអ្នកសម្រេចពេលសមត្ថកិច្ចកសាងសំណុំរឿងបញ្ជូនទៅតុលាការខេត្ត។

រូបភាពលោក បេន និងភរិយា នៅតំបន់ការងារ។រូបភាពពីហ្វេសប៊ុក USAID។

សូមរំលឹកបន្តិចថា ហេតុការណ៍ប្រតាយប្រតប់គ្នានោះកើតឡើងកាលពីថ្ងៃទី១២ ខែតុលា ត្រង់ចំណុច ភូមិត្រពាំងរាំង ឃុំរណសិរ្ស ស្រុកសង្គមថ្មី ខេត្តព្រះវិហារ រវាងភាគីក្រុមមន្ត្រីអភិរក្សសហគមន៍ភ្នំត្នោត ភ្នំពក ជាមួយបុរសម្នាក់មានឈ្មោះ កោះ សៀម ជាពលរដ្ឋរស់នៅភូមិឃុំខាងលើ។ ហេតុការណ៍នោះបណ្ដាលឱ្យមនុស្ស ២ នាក់បានរងរបួស គឺលោក កោះ សៀម និងលោក សឿង សារ៉ុន ជាកងរាជអាវុធហត្ថនិងជាកម្លាំងសហការណ៍ជាមួយលោក បេន។

ផ្អែកតាមកំណត់ហេតុរបស់លោក បេន ដាវីស ប្រធានក្រុមមន្ត្រីអភិរក្សភ្នំត្នោត ភ្នំពក កាលពីថ្ងៃទី១៤ ខែតុលា និងតាមរយៈវីដេអូឃ្លីបរបស់លោក បេន បានរាប់រៀបដើមចមដែលនាំឱ្យមានរឿងរ៉ាវនេះថា គឺកាលពីថ្ងៃទី១២ ខែតុលា ក្រុមការងាររបស់លោក បេន ចំនួនពីរនាក់បានចុះល្បាតនៅតំបន់ការពារដោយសង្ស័យមានការដាក់ដាយត្រីក្រឡាសំណាញ់សម្រាប់ចាប់ត្រី និងសត្វគ្រប់ប្រភេទនៅក្នុងទឹកខុសច្បាប់។ បន្ទាប់មកគ្រាដែលក្រុមការងារដើរឆ្លងកាត់ចម្ការស្វាយចន្ទីររបស់ឈ្មោះ កោះ សៀម ក៏បុគ្គល កោះ សៀម បានទាញកាំបិទដេញក្រុមការងារលោក បេន ហើយស្រែកគំរាមកុំឱ្យមកម្តងទៀត។

រូបភាពលោក បេន នៅតំបន់ការងារ។រូបភាពពីហ្វេសប៊ុក USAID។

នៅថ្ងៃដដែលនោះ លោក បេន ក៏នាំកម្លាំងកងរាជអាវុធហត្ថនិងក្រុមការងារទៅសួរនាំបញ្ហានេះនៅផ្ទះឈ្មោះ កោះ សៀម តែពេលទៅដល់ក៏ស្រាប់តែផ្ទុះរឿងប្រតាយប្រតប់គ្នាកើតឡើងក្នុងផ្ទះបណ្តាលឱ្យភាគីទាំងសងខាងរងរបួស។

សូមបញ្ជាក់ថា លោក បេន ដាវីស ជាជនជាតិអាមេរិកកាំងត្រូវបានស្គាល់ថាជាអ្នក​ការពារ​ធម្មជាតិ​កម្ពុជា​នៅ​ដែនជម្រកសត្វព្រៃ​ភ្នំ​ត្នោត​-​ភ្នំ​ពក ស្ថិតក្នុង​តំបន់​ព្រៃ​ឡង់ ខេត្តព្រះវិហារអស់​រយៈពេលជាង១០​​ឆ្នាំ​មកហើយ​ ដោយលោកទទួលបានការគាំទ្រពីគម្រោង USAID ព្រៃឡង់បៃតង។

តែយ៉ាងណាកន្លងមកបុរសវ័យជិត៦០ រូបនេះ ​និង​ក្រុមការងារ  ​ធ្លាប់​រង​ការ​គំរាម​គំហែង​ដល់​អាយុជីវិត​ជា​ញឹកញាប់ ពី​សំណាក់​ជនល្មើស​ក្នុង​បរិវេណ​ដែនជម្រកសត្វព្រៃ​ភ្នំ​ត្នោត​-​ភ្នំ​ពក ​នេះ​ផងដែរ​៕

អត្ថបទខ្លីសរសេរដោយ  មាន សុវណ្ណារិទ្ធ សិក្ខាកាមក្នុងវគ្គបណ្ដុះបណ្ដាល ស្ដីពីមូលដ្ឋានគ្រឹះនៃការសរសេរព័ត៌មាន និងការថតរូប រៀបចំដោយអង្គការមណ្ឌលព័ត៌មានស្ត្រីកម្ពុជា(WMC)។

Share

ព័ត៌មានទាក់ទង