នៅថ្ងៃទី៧ ខែកុម្ភៈ ឆ្នាំ២០២៤នេះ គណៈកម្មាធិការជាតិរៀបចំការបោះឆ្នោតបានចេញសេចក្ដីអំពាវនាវឱ្យគណបក្សនយោបាយ បេក្ខជន សមាជិក និងអ្នកគាំទ្រគណបក្សនយោបាយទាំងអស់ ត្រូវគោរពតាមវិធាន បទប្បញត្តិ និងគោលការណ៍នៃច្បាប់ស្ដីពីវិសោធនកម្មច្បាប់បោះឆ្នោត និងនីតិវិធីសម្រាប់ការបោះឆ្នោតជ្រើសតាំងសមាជិកព្រឹទ្ធសភា ក្រមសីលធម៌ និងគោលការណ៍នានា ក្នុងអំឡុងការឃោសនាបោះឆ្នោតខាងមុខ។
ការអំពាវនាវរបស់គ.ជ.ប ធ្វើឡើងមុនយុទ្ធនាការឃោសនាបោះឆ្នោតជ្រើសរើសសមាជិកព្រឹទ្ធសភា ៣ថ្ងៃ។ លោកប្រាជ្ញ ចន្ទ ប្រធានគ.ជ.ប បញ្ជាក់ថា ការអំពាវនាវនេះ ដើម្បីធានាឱ្យការឃោសនាបោះឆ្នោតរបស់គណបក្សនយោបាយប្រព្រឹត្តទៅដោយសន្ដិវិធី អហិង្សា មានសន្ដិសុខ និងសុវត្ថិភាព។
ការឃោសនាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ មានរយៈពេល១៤ថ្ងៃ ដោយចាប់ផ្ដើមពីថ្ងៃទី១០ រហូតដល់ថ្ងៃទី២៣ ខែកុម្ភៈ ឆ្នាំ២០២៤ និងនៅថ្ងៃទី២៥ ខែកុម្ភៈ ឆ្នាំ២០២៤ ជាថ្ងៃបោះឆ្នោត។ គណបក្សនយោបាយចំនួន៤ ដែលចូលរួមក្នុងដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥នេះ ក្នុងនោះមានគណបក្សប្រជាជកម្ពុជា គណបក្សហ៊្វុន ស៊ិន ប៉ិច គណបក្សឆន្ទៈខ្មែរ ដែលជាគណបក្សសម្ព័ន្ធភាពឆ្ពោះទៅមុខជាមួយគណបក្សភ្លើងទៀន និងគណបក្សកម្លាំងជាតិដែលជាគណបក្សទើបបង្កើតថ្មី។
ការបោះឆ្នោតជ្រើសតាំងសមាជិកព្រឹទ្ធសភា គឺជាការបោះឆ្នោតអសកល ដែលធ្វើឡើងរយៈពេល ៦ ឆ្នាំម្តង ហើយអ្នកបោះឆ្នោត និងអង្គបោះឆ្នោត គឺតំណាងរាស្ត្រក្នុងតំណែង ដែលជាប់ឆ្នោតឆ្នាំ ២០២៣ ដែលមានចំនួនសរុប ១២៥នាក់ និងសមាជិកក្រុមប្រឹក្សាឃុំ-សង្កាត់ទាំងអស់ក្នុងតំណែងដែលជាប់ឆ្នោតឆ្នាំ ២០២២ សរុបចំនួន ១ម៉ឺន ១ពាន់ ៦២២នាក់ (១១៦២២នាក់)។
សរុបអង្គបោះឆ្នោតទាំងអស់មានចំនួន ១ម៉ឺន ១ពាន់ ៧៤៧នាក់ (១១៧៤៧នាក់) នឹងបោះឆ្នោតក្នុងក្របខណ្ឌនៃភូមិភាគនីមួយៗ ដែលមណ្ឌលបោះឆ្នោតបែងចែកជា៨ភូមិភាគ។ បើយោងតាមបទបញ្ជា និងនីតិវិធី សម្រាប់ការបោះឆ្នោតជ្រើសតាំងសមាជិកព្រឹទ្ធសភា ដែលបោះពុម្ពផ្សាយនាឆ្នាំ២០២៣ ដោយគណៈកម្មាធិការជាតិរៀបចំការបោះឆ្នោតថា ការបោះឆ្នោតអសកលនេះនឹងជ្រើសរើសសមាជិកព្រឹទ្ធសភាចំនួន ៦២រូប ខណៈសមាជិកចំនួន ៥៨ រូបត្រូវជ្រើសតាំងដោយការបោះឆ្នោតអសកល និងជាសម្ងាត់ តាមរយៈអង្គបោះឆ្នោត។ សមាជិកចំនួន ២រូប ត្រូវចាត់តាំងដោយព្រះមហាក្សត្រ និង ២រូបទៀត ត្រូវជ្រើសតាំងដោយរដ្ឋសភា តាមមតិភាគច្រើន។ សម្ដេច ហ៊ុន សែន ប្រធានគណបក្សប្រជាជនកម្ពុជា និងជាអតីតនាយរដ្ឋមន្ដ្រី ធ្លាប់អះអាងថា សម្ដេចនឹងកាន់តំណែងជាប្រធានព្រឹទ្ធសភា ក្នុងឆ្នាំ២០២៤នេះ។
យ៉ាងណា ក្រៅពីការអំពាវនាវដល់គណបក្សនយោបាយ គ.ជ.ប បានអំពាវនាវដល់អាជ្ញាធរគ្រប់លំដាប់ថ្នាក់ ត្រូវប្រកាន់ខ្ជាប់នូវគោលជំហអព្យាក្រឹត្យ ឥតលម្អៀងក្នុងសកម្មភាពការងាររបស់ខ្លួន និងត្រូវសម្របសម្រួលទីកន្លែង ផ្លូវ ពេលវេលា ដើម្បីឱ្យគណបក្សនយោបាយនីមួយៗអាចអនុវត្ដកម្មវិធី និងការហែក្បួនឃោសនាបោះឆ្នោត ប្រព្រឹត្តទៅដោយស្មើភាពគ្នាផងដែរ។ គ.ជ.ប សង្ឃឹមថា គណបក្សនយោបាយ និងអាជ្ញាធរ នឹងចូលរួមសហការតាមការអំពាវនាវ ដើម្បីធ្វើយ៉ាងណាឱ្យការឃោសនាដំណើរការលូន ធានាបាននូវសិទ្ធិរបស់គណបក្សនយោបាយ និងសិទ្ធិជាមូលដ្ឋានរបស់ប្រជាពលរដ្ឋ៕
