រដ្ឋបាលលោក Trump សម្រេចដាក់គំនាបលើប្រទេសមួយចំនួនតាមរយៈការដំឡើងថ្លៃពន្ធនាំចូលជាធរមាន ដោយចាប់អនុវត្តពីថ្ងៃទី៩ ខែមេសា ឆ្នាំ២០២៤នេះតទៅ។ ថ្វីបើទីផ្សារហិរញ្ញវត្ថុរបស់សហរដ្ឋអាមេរិកមានភាពរកាំរកូស រងការគំរាមកំហែងចង់សងសឹក និងមានអ្នកទទូចឱ្យលោក Donald Trump ប្រធានាធិបតីអាមេរិក ដកចេញនូវការដំឡើងពន្ធក៏ដោយ ក៏លោក Trump នៅតែបង្ហាញជំហរមិនបោះបង់ចោលនូវការសម្រេចចិត្តនេះឡើយ។ លោកអះអាងថា នេះគឺជាការស្តារភាពយុត្តិធម៌ទៅដល់សហរដ្ឋអាមេរិកក្រោយមានការកេងប្រវ័ញ្ចជាច្រើនបានកើតមានឡើង។ នេះបើយោងតាមសារព័ត៌មាន CNN ចុះផ្សាយនៅថ្ងៃទី៩ ខែមេសា ឆ្នាំ២០២៥។
ទំនិញមកពីប្រទេសចិន ត្រូវបង់ពន្ធយ៉ាងហោចណាស់ ១០៤%នៃតម្លៃទំនិញទៅឱ្យរដ្ឋបាលលោក Trump ដែលនេះគឺជាការបង់ពន្ធខ្ពស់ជាងគេ ក្រោយចិនបានបកមកសងសឹកនឹងសហរដ្ឋអាមេរិកតាមរយៈការដាក់ពន្ធ ៣៤%ទៅលើទំនិញនាំចូលពីសហរដ្ឋអាមេរិកមកកាន់ប្រទេសចិនកាលពីថ្ងៃអង្គារ។ អ្នកវិភាគមួយចំនួនយល់ថា កត្តានេះអាចធ្វើឱ្យកើតមានសង្គ្រាមពាណិជ្ជកម្មពិភពលោកកាន់តែស៊ីជម្រៅ ខណៈប្រទេសមួយចំនួនផ្សេងទៀតក៏មិនពេញចិត្តនឹងការសម្រេចនេះ។
ទំហំនៃការដាក់ពន្ធនាំចូលនេះមានចាប់ពី ១១% ដល់ទៅ ៥០% ដែលធ្វើឡើងទៅតាមប្រទេសមួយចំនួន។ ក្នុងនោះប្រទេសម៉ិកស៊ិក និងកាណាដា ដែលជាដៃគូពាណិជ្ជកម្មដ៏ធំបំផុតរបស់សហរដ្ឋអាមេរិក ក៏រងផលប៉ះពាល់ផងដែរ។ សហភាពអឺរ៉ុបត្រូវបានវាយប្រហារតាមរយៈពន្ធនាំចូល ២០%, ចិន ៣៤%, ជប៉ុន ២៤%, វៀតណាម ៤៦% និងកូរ៉េខាងត្បូង ២៥%។ ប្រទេសឡេសូតូ ដែលនៅអាហ្វ្រិកខាងត្បូង បានទទួលរងនូវអត្រាពន្ធគយបដិការខ្ពស់ជាងគេ ៥០ ភាគរយ បន្ទាប់មក កម្ពុជា (៤៩ ភាគរយ) ឡាវ (៤៨ ភាគរយ) វៀតណាម (៤៦ ភាគរយ) និងថៃ (៣៦ ភាគរយ) រួមជាមួយប្រទេស និងដែនដីផ្សេងទៀត សរុបទាំងអស់ ១៨០ ជុំវិញពិភពលោក។
តាមការចុះផ្សាយរបស់សារព័ត៌មាន CNN ដដែល មិនមានប្រទេសណាមួយដែលជាប់ក្នុងបញ្ជីរបស់លោក Trump ត្រូវបានលើកលែង ឬបន្ធូរបន្ធយអត្រាពន្ធគយថ្មីនោះទេ ទោះបីជាមានការចរចា សំណើដោះស្រាយ និងការចាត់វិធានការសងសឹកបែបណាក៏ដោយ ដែលធ្វើឱ្យភាពស្រពិចស្រពិល និងជម្លោះពាណិជ្ជកម្មសកល កាន់តែអាក្រក់ឡើង៕
