ទោះត្រូវរៀនបណ្តើរ ធ្វើការបណ្តើរ និងឆ្លៀតពេលធ្វើការងារសង្គមបណ្តើរ យុវជនមួយចំនួនបង្ហាញជំហរមិនរួញរាក្នុងការក្រេបជញ្ជក់ចំណេះវិជ្ជាទាំងជំនាញរឹងនិងទន់ ដ្បិតឱកាសទាំងនេះបានរួមចំណែកកសាងសមត្ថភាព ពិសេសជំរុញឱ្យយុវជនទាំងនេះក្លាហានហ៊ានតស៊ូមតិ និងរួមចំណែកជួយទៅដល់សង្គមជាតិ។ ក្នុងស្មារតីកម្មវិធីបើកកិច្ចប្រជុំនិងជួបជុំសមាជិកនៃក្រុមប្រឹក្សាយុវជនរបស់អង្គការសហប្រជាជាតិនៅកម្ពុជា (UNYAP) នៅថ្ងៃទី១២ ខែមីនា ឆ្នាំ២០២៥ បានផ្ដោតសំខាន់លើសមិទ្ធផលរបស់យុវជន ខណៈផ្សារភ្ជាប់នឹងចក្ខុវិស័យនាថ្ងៃអនាគត។
(កញ្ញា កែវ សុជាតា រាយការណ៍)
យុវជនគឺជាកម្លាំងស្នូលក្នុងការជំរុញល្បឿនសេដ្ឋកិច្ចឱ្យសម្រេចចក្ខុវិស័យកម្ពុជាឆ្នាំ២០៥០។ នេះជាការលើកឡើងរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ ប្រទេសកម្ពុជាមានប្រជាជនវ័យក្មេងច្រើនជាងគេនៅតំបន់អាស៊ីអាគេ្នយ៍ ដែលប្រជាជនវ័យក្មេងមានអាយុចន្លោះ ១៥-៣០ឆ្នាំ មានប្រមាណ ២៦,៤% រីឯយុវជនកម្ពុជាមានកំណើនច្រើនបំផុតដែលនឹងក្លាយជាមនុស្សពេញវ័យផងដែរ។ នេះបើរបាយការណ៍វិភាគស្ថានភាពយុវជនកម្ពុជាចុះផ្សាយនៅខែធ្នូ ឆ្នាំ២០២០។ ស្របពេលដែលយុវជនដើរតួនាទីយ៉ាងសំខាន់នៅក្នុងសង្គម យុវជនអាចប្រឈមនឹងការកេងប្រវ័ញ្ច ការរំលោភបំពាន ការបៀតបៀនតាមរូបភាពមួយចំនួន ឬលទ្ធភាពទទួលបានសេវាកម្មនិងការការពារជាដើម។
ស្រ្តីមួយរូបកំពុងឡើងធ្វើសន្ទរកថាពីរឿងរ៉ាវរបស់ខ្លួនអំឡុងពេលធ្វើជាយុវជន UNYAP។ រូបភាព៖ WMC/Socheata
ដើម្បីធានាបាននូវសុខុមាលភាពនិងបង្កើនភាពអង់អាចដល់យុវជន កញ្ញា កាទ័រ លីតា អតីតយុវជនស្ម័គ្រចិត្តនៃក្រុមប្រឹក្សាយុវជនរបស់អង្គការសហប្រជាជាតិនៅកម្ពុជា (UNYAP) បានឱ្យដឹងថា ការផ្តល់ឱកាសឱ្យយុវជនបានចូលរួមនៅក្នុងកិច្ចការសង្គមដូចជា ការពិភាក្សាគ្នា ការសហការគ្នា ការរៀបចំនិងដឹកនាំបង្កើតកិច្ចប្រជុំ ការលើកយកបញ្ហាយកមកដោះស្រាយរួមគ្នា ការចុះទៅអង្កេតផ្ទាល់នៅក្នុងសហគមន៍ ផ្តល់ទីកន្លែងសុវតិ្ថភាពដែលនរណាៗក៏អាចបញ្ចេញមតិទោះខុសឬត្រូវយ៉ាងណាក្តី ពិសេសពង្រឹងសមត្ថភាពយុវជនតាមរយៈការជំរុញលើកទឹកចិត្តដោយមិនផាត់នរណាម្នាក់ចេញឡើយ។ ជាការអង្កេតរបស់កញ្ញា យុវជនជាច្រើនប្រមូលផ្តុំគ្នាជាធ្លុងមួយនៅ UNYAP ដោយសមាជិកម្នាក់ៗមានសមាសភាពចម្រុះគ្នា ពោលគឺមានទាំងជនមានពិការភាព ចម្រុះសាសនាមិនថាព្រះពុទ្ធ គ្រិស្ត ឬអ៊ីស្លាម ព្រមទាំងសំឡេងរបស់យុវជនជាស្រ្តីនិងបុរសជាដើម។
កញ្ញា កាទ័រ លីតា អតីតយុវជនស្ម័គ្រចិត្តនៃក្រុមប្រឹក្សាយុវជនរបស់អង្គការសហប្រជាជាតិនៅកម្ពុជា (UNYAP)។ រូបភាព៖ WMC/Socheata
ក្នុងនោះ កញ្ញា លីតា បានជម្រាបប្រាប់អ្នកយកព័ត៌មានវិទ្យុស្រ្តីដែរថា ការចូលជាយុវជនស្ម័គ្រចិត្ត UNYAP នេះ ធ្វើឡើងបន្ទាប់ពីកញ្ញាចង់ស្វែងកន្លែងសុវតិ្ថភាពដើម្បីបញ្ចេញសំឡេង និងបង្កើនភាពជាអ្នកដឹកនាំរបស់ខ្លួនឯង ដ្បិតកញ្ញាហាក់ជួបឧបសគ្គច្រើននៅក្នុងការបទដ្ឋានសង្គមដែលគេមិនសូវឱ្យតម្លៃលើនាមត្រកូលខ្មែរ-អ៊ីស្លាម។ បច្ចុប្បន្ន កញ្ញាជាបុគ្គលិកមួយរូបបម្រើការនៅស្ថាប័ន SHE powered by ide ដែលលើកកម្ពស់ទៅលើការងាររបស់ស្រ្តី។ តាមការបញ្ជាក់បន្ថែម សមិទ្ធផលដែលកើតចេញពីការរៀនសូត្រនៅពេលធ្វើការងារស្ម័គ្រចិត្ត កញ្ញាបានយកធាតុចូលទាំងនេះទៅបំពេញបន្ថែមនៅកន្លែងធ្វើការ និងនៅក្នុងជីវភាពរស់នៅប្រចាំថ្ងៃ។
កញ្ញា លីតា៖«ដោយសារពេលហ្នឹងខ្ញុំរាងនៅក្មេងដែរ ហ្នឹងហើយខ្ញុំទើបចេញធ្វើការដែរ អ៊ីចឹងខ្ញុំនៅភ័យច្រើនមែនទែន ប៉ុន្តែនៅពេលវាមាន environment (បរិយាកាស)ហ្នឹងមួយដែលអាចឱ្យខ្ញុំអនុវត្តវាបាន ខ្ញុំគិតថា ភាពជាអ្នកដឹកនាំ ក៏ដូចជាទំនុកចិត្តរបស់ខ្ញុំហ្នឹង គឺមានការកើនឡើងច្រើន។ ចំណុចទី២ដែលសំខាន់ហ្នឹង គឺខ្ញុំគិតថា ទាក់ទងនឹងការសហការ ខ្ញុំ learn (រៀន) អំពីការធ្វើការងារជាក្រុម ហើយជាពិសេសនោះគឺយុវជនរបស់យើងហ្នឹង គឺគាត់មកពីគ្រប់ចម្រុះ មានន័យថាទាំងចម្រុះជាតិសាសន៍ ទាំងភេទ ក៏ដូចជា expertise (ជំនាញ) របស់គាត់ដែរ។»។
រូបភាព៖ UNYAP/Hosung Lee
ចំណែកយុវតីម្នាក់ទៀត គឺកញ្ញា សៀប ស៊ីនាង ជាអតីតយុវជនស្ម័គ្រចិត្ត UNYAP មើលឃើញពីអត្ថប្រយោជន៍ជាច្រើនក្នុងការចូលរួមកិច្ចការសង្គមតាមរយៈការធ្វើជាយុវជនស្ម័គ្រចិត្ត។ ទោះការងារស្ម័គ្រចិត្តមិនបានផ្តល់កម្រៃឬជាប្រាក់កាកធំដុំក្តី តែកញ្ញាយល់ថា ការងារនេះមានតម្លៃយ៉ាងខ្លាំងសម្រាប់បណ្តុះចំណេះជំនាញរបស់យុវជនដែលជាទំពាំងស្នងឫស្សី។ មិនខុសពីកញ្ញា លីតា, កញ្ញា ស៊ីនាង មកទល់សព្វថ្ងៃនេះមានភាពក្លាហាន ហ៊ានបញ្ចេញមតិយោបល់ និងហ៊ានប្រើប្រាស់សំឡេងខ្លួនផ្លាស់ប្តូរគំនិតជាមនុស្សដទៃ តាមរយៈការធ្វើការងារជាអ្នកស្ម័គ្រចិត្ត។ តាមរយៈបទពិសោធ UNYAP មិនមែនជាកម្មវិធីដំបូងដែលកញ្ញាចូលរួមក្នុងនាមជាយុវជនឡើយ ពោលគឺកញ្ញាចូលរួមកម្មវិធីជាច្រើនចាប់តាំងពីសម័យនៅរៀនមកម្ល៉េះ ដោយការងារទាំងនេះបានហុចនូវផ្លែផ្លាមកវិញជាច្រើន។ យ៉ាងណា កញ្ញាមើលឃើញថា ការងារស្ម័គ្រចិត្តមួយចំនួនត្រូវការយុវជនខ្លួនឯង ចេះពុះពារ ស្វែងរកឱកាស និងឆ្លៀតពេលវេលាចូលរួម ដោយសារយុវជនខ្លះត្រូវមានកាតព្វកិច្ចផ្គត់ផ្គង់គ្រួសារ ឬត្រូវរៀនផង ធ្វើការផង ដូច្នេះហើយប្រសិនជាត្រូវទៅចូលរួមកម្មវិធីស្ម័គ្រចិត្ត ពួកគេរមែងត្រូវសុំច្បាប់ឈប់សម្រាក ជាជាងការអនុញ្ញាតពីស្ថាប័ន។ ជាការឆ្លើយតបនឹងករណីនេះ កញ្ញា ស៊ីនាង ស្នើឱ្យស្ថាប័នមួយចំនួនយោគយល់ដល់យុវជន ដើម្បីឱ្យពួកគេមានឱកាសបណ្តុះសមត្ថភាពបន្ថែម។
កញ្ញា សៀប ស៊ីនាង៖«ហើយរឿងមួយទៀតគឺការ empower ការលើកកម្ពស់ខ្លួនឯងហ្មង។ ពេលខ្លះយើងមើលឃើញខ្លួនឯងថា អើ! បើខ្ញុំមើលឃើញខ្លួនឯងទៅអ្នកដទៃនៅកន្លែងធ្វើការរបស់ខ្ញុំ ខ្ញុំអាច raise my voice (បញ្ចេញមតិ)។ ប៉ុន្តែអ្នកខ្លះគាត់អត់ហ៊ាននិយាយ គាត់មានអារម្មណ៍ថាគាត់ខ្លាច ខ្លាចបាត់បង់នេះ ខ្លាចបាត់បង់នោះអ៊ីចឹងយើងមើលអត់ដឹងទេពេលដែលយើងគិតថាចំណុចហ្នឹងអត់ល្អ យើងលើកមកនិយាយអ៊ីចឹងទៅ។ ប៉ុន្តែបើសិនជាសកម្មភាពដូច UNYAP គាត់ធ្វើនេះ ខ្ញុំគិតថា វាបណ្តុះគំនិតឱ្យយុវជនគាត់ជឿជាក់លើសមត្ថភាពខ្លួនឯងកាន់តែខ្លាំង ស្រឡាញ់នូវអ្វីដែលខ្លួនឯងធ្វើ ហើយគាត់មានអារម្មណ៍ថា គាត់ find their voice (កំពុងស្វែងរកសំឡេងខ្លួនឯង) ហើយ defense (ការពារ)ខ្លួនឯងហើយ ការពារអ្នកដែលនៅជុំវិញខ្លួនយើងបានទៀត។»។
កញ្ញា សៀប ស៊ីនាង ជាអតីតយុវជនស្ម័គ្រចិត្ត UNYAP។ រូបភាព៖ WMC/Socheata
មិនខុសពីយុវតីទាំងពីររូប យុវជនម្នាក់ទៀតគឺ លោក ម៉េត រ៉ូពី បានលើកឡើងពីអត្ថប្រយោជន៍នៃការធ្វើជាអ្នកស្ម័គ្រចិត្ត និងចូលរួមក្នុងការដោះស្រាយបញ្ហាសង្គម។ តាមរយៈឱកាសជាយុវជនស្ម័គ្រចិត្ត UNYAP បច្ចុប្បន្ន លោក រ៉ូពី បានក្លាយជាទីប្រឹក្សានៃក្រុមប្រឹក្សាយុវជនរបស់អង្គការសហប្រជាជាតិនៅកម្ពុជា។ ដើម្បីអាចក្រេបចំណេះដឹងតាមរយៈការធ្វើការក្នុងសង្គមនេះបាន លុះត្រាតែយុវជនត្រូវមានឆន្ទៈតស៊ូពុះពារការលំបាក ហ៊ានចំណាយពេលវេលា មានទំនួលខុសត្រូវខ្ពស់ និងចេះឱ្យតម្លៃគ្នាទៅវិញទៅមក។ លោកពោលដូច្នេះដោយសារមនុស្សមួយចំនួនហាក់មិនសូវឱ្យតម្លៃការងារស្ម័គ្រចិត្ត តែយ៉ាងណាការងារនេះនឹងឱ្យផលជាសន្សឹមៗ។
លោក ម៉េត រ៉ូពី៖«សម្រាប់អ្នកមកក្រោយគឺថា ទី១គឺយើងត្រូវមានឆន្ទៈនៅក្នុងការធ្វើកិច្ចការងារព្រោះនេះគឺជាការងារស្ម័គ្រចិត្ត ជាការងារស្ម័គ្រចិត្តដែលវាមិនអាចផ្តល់ផលប្រយោជន៍ឱ្យយើងភ្លាមៗនេះ ក៏ប៉ុន្តែវានឹងផ្តល់ប្រយោជន៍ឱ្យយើងជាច្រើនដែលយើងមិនអាចស្មានដឹងមុន ជាពិសេសគឺផ្នែកបញ្ហាស្មារតី ចំណេះដឹង និងជំនាញផ្ទាល់តែម្តង។ ទី២ យើងត្រូវធ្វើការប្រកបដោយទំនួលខុសត្រូវ។ យើងត្រូវមានការទទួលខុសត្រូវខ្ពស់ទៅលើកិច្ចការងាររបស់យើងនៅពេលដែលយើងទទួលកិច្ចការងារនោះមកធ្វើ មិនថាការងារនោះតូចឬយ៉ាងណានោះទេ។ ធ្វើយ៉ាងណាធ្វើវាឱ្យល្អបំផុតតាមដែលអ្វីដែលយើងអាចធ្វើទៅបាន។ ជាយុវជនជំនាន់ក្រោយ មិនថាតែជាសមាជិក UNYAPទេ ជាការផ្តល់យោបល់សម្រាប់ខ្ញុំ សម្រាប់យុវជនដទៃទៀត ការគោរពគ្នានិងឱ្យតម្លៃគ្នា ស្តាប់គ្នាទៅវិញទៅមកដោយយកចិត្តទុកដាក់ គឺជាគន្លឹះមួយនៅក្នុងការបង្កើតនូវទំនាក់ទំនងល្អ ស្រូបយកចំណេះដឹងជំនាញពីគ្នាទៅវិញទៅមក ហើយយើងអាចមានប្រាស្រ័យទាក់ទងគ្នាល្អ និងអាចបង្កើតជាប្រយោជន៍ដល់គ្នាទៅវិញទៅមកនៅពេលអនាគតផងដែរ។»។
លោក ម៉េត រ៉ូពី ជាទីប្រឹក្សានៃក្រុមប្រឹក្សាយុវជនរបស់អង្គការសហប្រជាជាតិនៅកម្ពុជា។ រូបភាព៖ WMC/Socheata
ក្រុមប្រឹក្សាយុវជនរបស់អង្គការសហប្រជាជាតិនៅកម្ពុជា (UNYAP) បានដំណើរការអស់រយៈពេលជាង ១៧ឆ្នាំមកហើយ ខណៈបានផ្តល់អំណាចដល់យុវជនក្នុងការបញ្ចេញសំឡេង តស៊ូមតិ និងតំណាងឱ្យផលប្រយោជន៍របស់យុវជនដទៃចំពោះអង្គការសហប្រជាជាតិ រដ្ឋាភិបាលកម្ពុជា និងអ្នកពាក់ព័ន្ធផ្សេងទៀត។ យុវជននៅក្នុងគម្រោងនេះ បានចូលរួមយ៉ាងសកម្មក្នុងការលើកកម្ពស់ការយល់ដឹង និងរកដំណោះស្រាយ ពិសេសទាក់ទងនឹងគោលដៅអភិវឌ្ឍន៍ប្រកបដោយចីរភាព (SDGs) ក្នុងក្រមខណ្ឌយុវជន។ មកទល់នឹងជំនាន់ទី៨ នៃក្រុមប្រឹក្សាយុវជនរបស់អង្គការសហប្រជាជាតិនៅកម្ពុជា យុវជនបានសម្រេចបានវឌ្ឍនភាពជាច្រើនគួរឱ្យកត់សម្គាល់ ដែលជំរុញឱ្យយុវជនដទៃហ៊ានក្រោកឈរបង្ហាញឆន្ទៈ និងចូលរួមចំណែកដោះស្រាយបញ្ហាសង្គមជាតិទាំងអស់គ្នា។
នៅថ្ងៃទី១២ ខែមីនា ឆ្នាំ២០២៥ អង្គការសហប្រជាជាតិប្រចាំកម្ពុជាបានរៀបចំកិច្ចប្រជុំនិងកម្មវិធីជួបជុំសមាជិក អតីតសមាជិក នៃក្រុមប្រឹក្សាយុវជនរបស់អង្គការសហប្រជាជាតិនៅកម្ពុជា (UNYAP) នៅទីតាំង Raintree រាជធានីភ្នំពេញដោយមានវត្តមានអ្នកចូលរួមប្រមាណជិត ៧០នាក់។ ក្នុងនោះមានការចូលរួមពីសមាជិក UNYAP, ទីប្រឹក្សានៃគម្រោង, អតីតសមាជិក UNYAP, តំណាងអង្គការយុវជន, តំណាងយុវជនដែលចូលរួមសកម្មភាព UNYAP និងតំណាងមកពីទីភ្នាក់ងារអង្គការសហប្រជាជាតិដែលមានដូចជា គណៈកម្មាធិការដើម្បីសិទ្ធិស្រ្តី (UN Women), អង្គការសុខភាពពិភពលោក (WHO), អង្គការពលកម្មអន្តរជាតិ (ILO), កម្មវិធីអភិវឌ្ឍន៍សហប្រជាជាតិ (UNDP), មូលនិធិកុមារ (UNICEF), និងបណ្តាតំណាងចំណុះឱ្យអង្គការសហប្រជាជាតិសរុប ១៧ស្ថាប័ន៕
រូបភាព៖ UNYAP/Hosung Lee
រូបភាព៖ UNYAP/Hosung Lee
រូបភាព៖ UNYAP/Hosung Lee