តាកែវ៖ ជួបការលំបាកតែមិនបោះបង់ អ្នកស្រី មាស ទាវ បានជម្នះការលំបាកក្នុងការដាំត្រសក់ផ្អរជាលើកដំបូង រហូតទទួលបានជោគជ័យ ដែលបច្ចុប្បន្ននេះធ្វើឱ្យអ្នកស្រីមានជីវភាពល្អប្រសើរ មានពេលវេលាច្រើនសម្រាប់មើលថែទាំចៅតូចនៅឯផ្ទះ រួចមានចំណូលពីការលក់ផ្លែត្រសក់បានថែមទៀត។
អ្នកស្រី មាស ទាវ ប្រជាកសិករនៅក្នុងភូមិឆ្លកដំណាក់ហ្លួង ឃុំជំរះពេន ស្រុកសំរោង ខេត្តតាកែវ ចាប់ដាំត្រសក់តាំងពីឆ្នាំ២០១៨ ដំបូងលំបាកមិនដឹងបច្ចេកទេសដាំ ស្ទើរតែបោះបង់ការងារនេះទៅហើយ។ តែលុះបានអង្គការHelen Keller ជួយទាំងពូជ និងបច្ចេកទេសដល់កសិករនៅក្នុងសហគមន៍ បច្ចុប្បន្នធ្វើឱ្យអ្នកស្រីទទួលបានផលពីការដាំត្រសក់នេះ ក្នុងការផ្គត់ផ្គង់ជីវភាពគ្រួសារ និងមានពេលនៅមើលថែទាំកូន និងចៅនៅផ្ទះ អ្នកស្រីយល់ថា ជីវភាពគ្រួសារអ្នកស្រីពេលនេះគ្រាន់បើជាងមុន។
អ្នកស្រី មាស ទាវ ៖«មុនដំបូងចង់ឈប់ដាំដែរ យើងអត់ដែលដឹងវាខូច វាអីអ៊ីចឹងក្រោយមកទៀតយើងចេះតែធ្វើទៅមានលោកគ្រូ អ្នកគ្រូគាត់មកបង្ហាត់បង្រៀនប្រាប់យើងចេះតែធ្វើតាមគាត់ប្រាប់យូរៗក៏ចេះដឹងស្គាល់ថ្នាំខ្លះ ស្គាល់គន្លាក់រៀនធ្វើ»។
ដោយសារ តែការដាំត្រសក់របស់អ្នកស្រី មាស ទាវ មានលក្ខណៈខ្នាតតូចអ្នកស្រីប្រាប់ថា ទិន្នផលដែលទទួលក៏តិចទៅតាមហ្នឹងដែរ គឺ២ទៅ៣លានរៀល ជួនក៏៣ទៅ៤លានរៀល និងជួនកាលក៏១លានរៀល ពោលគឺមិនទៀងទេ អាស្រ័យលើការដាំបាន ឬដាំមិនបានក្នុងមួយរដូវចាប់ពីដាំ រហូតដល់បេះមានរយៈពេល២ខែ។
អ្នកស្រី មាស ទាវ ៖«ធៀបពីមុនមកឥឡូវ ខ្ញុំក៏កាន់តែចាស់ទាំងតា និងយាយលែងពិបាកដើរទៅរកខាងក្រៅ យើងនៅតែក្នុងផ្ទះធ្វើការងារដាំបន្លែនៅតែផ្ទះបានជួយមើលចៅ មើលកូនម្យ៉ាងដែរ ល្អជាងមុនតាមខ្ញុំគិត តែអាយុយើងច្រើនដែរហើយ ចាស់ហើយ បើនៅក្មេងចេះតែធ្វើបានយូរទៀត»។
ទាក់ទងនឹងបច្ចេកទេសដាំ ក៏ដូចជាគ្រាប់ពូជ កសិករនៅក្នុងសហគមន៍ភូមិឆ្លកដំណាក់ហ្លួង ឃុំជំរះពេន ស្រុកសំរោង ខេត្តតាកែវ គឺទទួលបានពីអង្គការ Helen Keller។ កញ្ញា ឈិត ឆពុំ អ្នកសម្របសម្រួលថ្នាក់ខេត្តនៃអង្គការ Helen Kellerអន្តរជាតិប្រចាំនៅកម្ពុជា ប្រាប់ឱ្យដឹងថា សម្រាប់គម្រោង«លើកកម្ពស់សន្តិសុខស្បៀង អាហារូបត្ថម្ភ និងជីវភាពដល់គ្រួសារកសិករក្រីក្រ តាមរយ:កម្មវិធីផលិតកម្មស្បៀងជាលក្ខណ:គ្រួសារ» អនុវត្តន៍ដោយអង្គការហេទ្បែន ខេលល័រ ធ្វើនៅខេត្តចំនួន៣មានកំពង់ធំ កំពត និងតាកែវ។ មានកសិករជាង៤១០០គ្រួសារ ទទួលបានផលពីគម្រោងអាហារូបត្ថម្ភ ដែលផ្តោតលើ កសិកម្មដែលពួកគាត់ដាំដុះជាលក្ខណៈគ្រួសារយកមកហូប សម្រាប់គ្រួសារប្រចាំថ្ងៃ និងសល់ពីនេះយកទៅលក់ដើម្បីផ្គត់ផ្គង់ជីវភាពគ្រួសារ។
កញ្ញា ឈិត ឆពុំ ៖«គោលបំណងនៃគម្រោងគឺចង់ឱ្យកសិករនៅតាមតំបន់ មានបន្លែលក្ខណៈគ្រួសារ របស់គាត់ហូបចុកបានគ្រប់គ្រាន់ និងសុវត្ថិភាព ចង់ឱ្យស្រ្តីមានផ្ទៃពោះ និងកុមារក្រោមអាយុ២ឆ្នាំទទួលបានអាហារូបត្ថម្ភ»។
កញ្ញា ឈិត ឆពុំ បានប្រាប់បន្ថែមថា សម្រាប់ខេត្តតាកែវមានកសិករជិត១០០០នាក់ទទួលបានផលពីគម្រោងខាងលើ ក្នុងនោះគាត់ទទួលបានគ្រាប់ពូជបន្លែចំនួន១៤មុខ ពូជស្រូវសម្រាប់កសិករ ដែលដាំស្រូវទទួលបាន២មុខ គឺពូជស្រូវ សែនក្រអូប និងសែនរំដួល៕
រូបភាពអង្គការHelen Keller
