ភ្នំពេញ៖ អ្នកនាំពាក្យក្រសួងការពារជាតិនៅថ្ងៃទី២១ ខែឧសភានេះ ចេញមុខទាត់ចោលលទ្ធផលស្រាវជ្រាវរបស់មជ្ឈ មណ្ឌលស្រាវជ្រាវមួយពីសហរដ្ឋអាមេរិក (CSIS) ដែលចោទថា យោធាចិនកំពុងមានសិទ្ធិផ្ដាច់មុខប្រើប្រាស់ផ្នែកខ្លះនៃមូលដ្ឋានទ័ពរាម ហើយចិនក៏កំពុងពង្រីកវត្តមានយោធារបស់ខ្លួនលើសពីមូលដ្ឋានទ័ពរាមផងដែរ។ សម្រាប់អ្នកនាំពាក្យក្រសួងការពារជាតិ ចាត់ទុកការចោទប្រកាន់យ៉ាងគឃ្លើននេះ មានលក្ខណៈញុះញង់ និងចេតនាទុច្ចរិត បង្កឱ្យមានការភ័ន្តច្រឡំ ពាក់ព័ន្ធនឹងមូលដ្ឋានសមុទ្ររាមកងទ័ពជើងទឹករបស់កម្ពុជា។
នៅលើទំព័រហ្វេសប៊ុករបស់លោកនាយឧត្តមសេនីយ៍ ឈុំ សុជាតិ នៅថ្ងៃនេះបានបង្ហោះសារបដិសេធករណីចោទប្រកាន់ថា យោធាចិនមានសិទ្ធិផ្ដាច់មុខប្រើប្រាស់ទីតាំងខ្លះៗនៃមូលដ្ឋានទ័ពរាម ដែលជារបាយការណ៍របស់មជ្ឈមណ្ឌលស្រាវ ជ្រាវមួយពីសហរដ្ឋអាមេរិក(CSIS) ត្រូវបានផ្សាយបន្តដោយវិទ្យុអាស៊ីសេរីជាភាសាខ្មែរ(RFA)ផ្សាយកាលពីថ្ងៃទី២០ ខែឧសភាម្សិលមិញ។
សម្រាប់លោក ឈុំ សុជាតិ ចាត់ទុកលទ្ធផលស្រាវជ្រាវរបស់ CSIS នេះថា ជាសកម្មភាពមានលក្ខណៈញុះញង់ និងមានចេតនាទុច្ចរិត នាំឱ្យមានការភ័ន្តច្រឡំពាក់ព័ន្ធនឹងមូលដ្ឋានសមុទ្ររាមកងទ័ពជើងទឹកកម្ពុជា។ ជាងនេះលោកថា សកម្ម ភាពខាងលើនេះក៏ធ្វើឡើងដោយសារព័ត៌មានបរទេសមួយចំនួននាពេលថ្មីៗនេះផងដែរ។
លោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិកម្ពុជា។រូបភាពពីហ្វេសប៊ុកលោក ឈុំ សុជាតិ។
ភ្ជាប់ជាមួយការច្រានចោលនេះ អ្នកនាំពាក្យក្រសួងការពារជាតិកម្ពុជា ក៏លើកឡើងនូវអំណះអំណាងមួយចំនួនការពារខ្លួនផងដែរ ដោយបញ្ជាក់ថា កន្លងមកនេះកម្ពុជាបានអនុញ្ញាតឱ្យនាវាកងទ័ពបរទេសដូចជា ជប៉ុន វៀតណាម និងចិន ចូលចតជាហូរហែនៅកំពង់ផែសមុទ្ររាម បន្ទាប់ពីកំពង់ផែសមុទ្ររាមត្រូវបានសម្ពោធជាផ្លូវការ។
តាមរយៈវត្តមាននាវាកងទ័ពនាបណ្តាប្រទេសមួយចំនួននៅកំពង់ផែសមុទ្ររាមនេះហើយ ទើបលោក ឈុំ សុជាតិ អះអាងថា កម្ពុជាជាប្រទេសអព្យាក្រឹត មិនអនុញ្ញាតឱ្យបរទេសណាយកទឹកដីកម្ពុជាធ្វើជាមូលដ្នានយោធាដាច់ខាត។ ជាងនេះលោកថា នាវាកងទ័ពជប៉ុន ចិន និងវៀតណាម ជាភស្តុតាងជាក់ស្តែងគ្រប់គ្រាន់អាចបញ្ជាក់ពីការគ្រប់គ្រងប្រើប្រាស់កំពង់ផែសមុទ្ររាមរបស់កម្ពុជា។
ក៏ប៉ុន្តែលទ្ធផលស្រាវជ្រាវរបស់ CSIS ដែលមានទីតាំងនៅរដ្ឋធានីវ៉ាស៊ីនតុន សហរដ្ឋអាមេរិក ដែលវិទ្យុអាស៊ីសេរីបានចុះផ្សាយបញ្ជាក់ថា នាវាកងទ័ពជើងទឹកជប៉ុន និងវៀតណាម ដែលបានចូលចតនៅមូលដ្ឋានទ័ពរាមកាលពីពេលថ្មីៗនេះ គឺមិនបានចូលចតនៅផែធំបំផុតរបស់ទ័ពរាម ដែលនាវាចម្បាំងចិនបានចូលចតនោះទេ។ មានន័យថា នាវាជប៉ុន និងវៀតណាម បានចូលចតនៅផែដែលទើបនឹងសាងសង់ថ្មីតាមបណ្ដោយឆ្នេរ ស្ថិតនៅខាងត្បូងនៃមូល ដ្ឋានទ័ពរាមតែប៉ុណ្ណោះ។
ការចុះផ្សាយរបស់វិទ្យុអាស៊ីសេរីដែលលោក ឈុំ សុជាតិ កាត់យកមកចេញផ្សាយច្រានចោលការចុះផ្សាយនេះ។រូបភាពពីហ្វេសប៊ុកលោក ឈុំ សុជាតិ។
បន្ថែមពីនេះ របាយការណ៍របស់ CSIS បានបន្តលាតត្រដាងពីការពង្រីកវត្តមានយោធាចិនលាតសន្ធឹងហួសពីមូលដ្ឋានទ័ពរាម ដែលផ្តិតរូបភាពពីប្រព័ន្ធផ្កាយរណបផងដែរ។ តាមរយៈភស្តុតាងរូបភាពពីផ្កាយរណបនេះ មជ្ឈមណ្ឌលស្រាវជ្រាវរបស់អាមេរិក (CSIS) សង្ស័យថា មានទីតាំងមួយនៅលើកំពូលភ្នំស្ថិតក្នុងឧទ្យានជាតិរាមកំពុងមានការសាងសង់មូលដ្ឋានការពារដែនអាកាសចម្ងាយប្រហែល ៨០០ម៉ែត្រ នៅទិសខាងជើងនៃមូលដ្ឋានទ័ពរាម។ CSIS បន្ថែមទៀតថា នៅទីតាំងនោះ ត្រូវបានឈូសឆាយសម្រាប់ការសាងសង់តាំងពីឆ្នាំ២០២១ ប៉ុន្តែទើបនៅក្នុងខែតុលាឆ្នាំ២០២៤ និងខែកុម្ភៈឆ្នាំ២០២៥ ទើបមានការវិវឌ្ឍមួយចំនួនដោយមានការសាងសង់ជាសំណង់ រួមទាំងមានកម្មករធ្វើការជាមួយយោធាជើងទឹកមកពីមូលដ្ឋានទ័ពរាម។
បើទោះពីជាមានការចោទប្រកាន់បែបនេះក្តី តែអ្នកនាំពាក្យក្រសួងការពារជាតិកម្ពុជា នៅតែបន្តលើកយកប្រសាសន៍របស់នាយករដ្ឋមន្រ្តី ដែលបានថ្លែងក្នុងឱកាសសម្ពោធដាក់ឱ្យដំណើរការជាផ្លូវការនូវមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម ដោយថា កម្ពុជាស្វាគមន៍បណ្តាកងទ័ពប្រទេសជាមិត្តចូលចតនៅកំពង់ផែរាមកម្ពុជា ដើម្បីធ្វើការហ្វឹកហ្វឺនរួមគ្នា។ ក៏ប៉ុន្តែការចង់ចូលចត ត្រូវតែជូនដំណឹងមកកម្ពុជារួមទាំងនាវាកងទ័ពចិនផងដែរ ដោយកម្ពុជាសង្ឃឹមថា នៅថ្ងៃខាងមុខ នឹងមាននាវាកងទ័ពប្រទេសជាមិត្តជាបន្តបន្ទាប់ទៀត នឹងចូលចតនៅកំពង់ផែរាមនេះ៕
