ប្រទេសវៀតណាម៖ យោងតាម C N A នៅក្នុងកសិដ្ឋានមួយនៅជិតទីក្រុងហាណូយ លោក Le Van Hien បានជ្រើសរើសពូជមាន់ជើងធំឬ “មាន់នាគ” ដែលជាពូជមាន់មានជើងធំដូចគល់ឈើ អាចលក់បានថ្លៃរហូតដល់ 2,000 ដុល្លារអាមេរិកក្នុងមួយក្បាល។
មានជើងធំឬមាន់ដុងតៅ ដែលគេហៅតាមឈ្មោះស្រុកដែលបានបង្កាត់ពូជវានៅភាគខាងជើងប្រទេសវៀតណាម ត្រូវបានចាត់ទុកជាអាហារដ៏ឆ្ងាញ់ពិសារ ហើយជាពិសេសគឺពេញនិយមក្នុងចំណោមអ្នកមានទ្រព្យស្តុកស្តម្ភក្នុងឱកាសបុណ្យចូលឆ្នាំថ្មីប្រពៃណីចិន-វៀតណាម។
មាន់ជើងធំមួយក្បាលទម្ងន់ 4 គីឡូក្រាម ជើងដ៏ធំទាំង២របស់វាមានទម្ងន់ប្រហែល៨ខាំគឺស្មើមួយភាគប្រាំនៃទម្ងន់ខ្លួនរបស់វា និងអាចលក់បានក្នុងតម្លៃប្រហែល 150 ដុល្លារអាមេរិក ប៉ុន្តែបើវាធំត្រូវខ្នាតគេអាចឱ្យតម្លៃលើសនេះ10ដង។ អ្នកខ្លះបានឱ្យតម្លៃខ្លាំងថែមទៀតទៅតាមរូបរាងនិងសម្រស់ពណ៌សំបុររបស់វា។
លោក Hien បានប្រាប់ AFP ថា គន្លឹះនៃការចិញ្ចឹមមាន់ជើងធំឱ្យបានរសជាតិឆ្ងាញ់គឺត្រូវមានទីធ្លាធំទូលាយឱ្យវាដើរលេង និងផ្ដល់របបអាហារឱ្យវាគ្រប់គ្រាន់ ដូចជា ពោត ស្រូវ អង្ករជាដើម។
លោក ហៀន(Hien) ដែលបានចិញ្ចឹមមាន់ជាង១៥ ឆ្នាំមកហើយបាននិយាយថា៖ «មាន់ដើរកាន់តែច្រើននឹងមានសាច់ដុំកាន់តែធំ។សាច់មាន់ជើងធំ ឬមាន់ Dong Tao អាចមានទម្ងន់រហូតដល់ 10 គីឡូក្រាម។ពេលវាកាន់តែធំ វាមានរសជាតិកាន់តែឆ្ងាញ់ កាន់តែផុយមិនស្វិត ហើយថែមទាំងមានកម្រិតជាតិខ្លាញ់ទាបទៀតផង។ពេលខ្លះគេយកសាច់មាន់នេះទៅស្ងោរស៊ុប ចៀន ចំហុយ ឆាជាមួយស្លឹកគ្រៃ។
លោក Le Van Luan ដែលបានទិញមាន់ពីលោក Hien ធ្វើជាអំណោយចុងឆ្នាំដល់ដៃគូអាជីវកម្ម និងធ្វើម្ហូបសម្រាប់ឳពុកម្ដាយចាស់ជរារបស់គាត់បាននិយាយថា “ផ្នែកដ៏ល្អបំផុតនៃសាច់មាន់ Dong Tao គឺស្បែកជើងរបស់វា។ជើងកាន់តែធំ រសជាតិកាន់តែឆ្ងាញ់” ។
ប្រភព៖ C N A ថ្ងៃទី ១៧ ខែ មករា ឆ្នាំ ២០២៣