នៅព្រឹកថ្ងៃចន្ទទី១២ ធ្នូ ឆ្នាំ ២០២២ អ៊ីរ៉ង់បានកាត់ទោសប្រហារជីវិតដោយព្យួរកជាសាធារណៈបុរសម្នាក់ដែលត្រូវគេចោទថាបានសម្លាប់សមាជិកកងកម្លាំងសន្តិសុខអ៊ីរ៉ង់ពីរនាក់ ដើម្បីជាការព្រមានដល់ក្រុមបាតុករប្រឆាំងរដ្ឋាភិបាលដែលកពុងរីករាលដាលទូទាំងប្រទេស។
យុវជនអ៊ីរ៉ង អាយុ 23 ឆ្នាំឈ្មោះ Majidreza Rahnavard ត្រូវបានកាត់ទោសប្រហារជីវិតដោយតុលាការទីក្រុង Mashhad ពីបទសម្លាប់សមាជិកកម្លាំងសន្តិសុខ Basij ពីរនាក់និង និងធ្វើឱ្យ4 នាក់ផ្សេងទៀតរងរបួស។សាកសពរបស់លោកត្រូវបានយកទៅបញ្ចុះនៅក្នុងទីបញ្ចុះសពក្នុងតំបន់។
ទីភ្នាក់ងារសារព័ត៌មាន Mizan បានរាយការណ៍ថា Rahnavard ត្រូវបានចាប់ខ្លួននៅថ្ងៃទី 19 ខែវិច្ឆិកា
ខណៈដែលគាត់ព្យាយាមរត់ចេញពីប្រទេស។ សារព័ត៌មាន Mizan បានចុះផ្សាយរូបថតលោក Rahnavard ត្រូវគេព្យួរដោយដងសន្ទូចរថយន្ត។ដៃ និងជើងរបស់គាត់ត្រូវបានចង។កងកម្លាំងសន្តិសុខអ៊ីរ៉ង់ដែលពាក់របាំងមុខ បានឈរយាមនៅមុខរបាំងការពារនិងចំរឹងដែក ដើម្បីរារាំងហ្វូងមនុស្សប្រមូលផ្តុំគ្នានៅព្រឹកថ្ងៃចន្ទទី១២ ធ្នូ ឆ្នាំ ២០២២។
ប្រព័ន្ធផ្សព្វផ្សាយអ៊ីរ៉ង់បានបង្ហាញឈ្មោះមនុស្ស 25 នាក់ផ្សេងទៀតដែលប្រឈមមុខនឹងការកាត់ទោសប្រហារជីវិតទាក់ទងនឹងការតវ៉ាដែលបង្កឡើងដោយការស្លាប់ស្ត្រីជនជាតិឃឺដ-អ៊ីរ៉ង់ Mahsa Amini នៅក្នុងមន្ទីរឃុំឃាំងរបស់ប៉ូលីសសីលធម៌ពីបទបំពានលើការស្លៀកពាក់ដ៏តឹងរ៉ឹងរបស់អ៊ីរ៉ង់។
កាលពីថ្ងៃព្រហស្បតិ៍សប្ដាហ៍មុន ប្រទេសអ៊ីរ៉ង់បានកាត់ទោសព្យួរកលោក Mohsen Shekari ពីបទធ្វើឱ្យសន្តិសុខម្នាក់រងរបួសដោយកាំបិត និងបិទផ្លូវក្នុងទីក្រុង Tehran ។នេះជាការប្រហារជីវិតលើកដំបូងបន្ទាប់ពីការចាប់ខ្លួនបាតុកររាប់ពាន់នាក់ ដែលបានធ្វើឱ្យប្រទេសលោកខាងលិចថ្កោលទោសអ៊ីរ៉ង់។
ទីភ្នាក់ងារសារព័ត៌មាន Mizan បានរាយការណ៍ថាលោក Rahnavard មិនត្រូវបានអនុញ្ញាតឱ្យមានសិទ្ធិជ្រើសរើសមេធាវីឬ បង្ហាញភស្តុតាងដោះបន្ទុក និងមិនអាចស្នើសុំឱ្យមានការជំនុំជម្រះជាសាធារណៈនោះទេ។ ទូរទស្សន៍រដ្ឋបានបង្ហាញវីដេអូលោក Rahnavard បាននិយាយនៅក្នុងតុលាការថា លោកស្អប់កងកម្លាំង Basij បន្ទាប់ពីបានឃើញពួកគេវាយដំ និងសម្លាប់បាតុករនៅក្នុងវីដេអូដែលបានបង្ហោះនៅលើប្រព័ន្ធផ្សព្វផ្សាយសង្គម។ សកម្មជនបាននិយាយថាគាត់ត្រូវបានបង្ខំឱ្យសារភាពដោយការធ្វើទារុណកម្ម។ ការប្រហារជីវិតដែលធ្វើឡើងនៅទីសាធារណៈដោយប្រើរថយន្តស្ទូច ធ្លាប់ប្រើដើម្បីបង្គ្រាបភាពចលាចលក្រោយការបោះឆ្នោតប្រធានាធិបតីឆ្នាំ 2009។ បើយោងតាមសកម្មជនសិទ្ធិមនុស្សក្នុងប្រទេសអ៊ីរ៉ង់យ៉ាងហោចណាស់មានមនុស្សចំនួន 488 នាក់ត្រូវបានសម្លាប់និង 18,200 នាក់ផ្សេងទៀតត្រូវបានឃុំខ្លួនដោយអាជ្ញាធរចាប់តាំងពីមានផ្ទុះបាតុកម្មនៅពាក់កណ្តាលខែកញ្ញាឆ្នាំ២០២២។
ប្រភព៖ The Guardian ចុះថ្ងៃទី១២ ខែធ្នូ ឆ្នាំ២០២២
