ភ្នំពេញ៖ សាលាឧទ្ធរណ៍នៅថ្ងៃទី១១ ខែមករាឆ្នាំ២០២២នេះ បានសម្រេចតម្កល់សាលក្រមរបស់តុលាការថ្នាក់ក្រោមឱ្យសកម្មជនអតីតបក្សប្រឆាំងចំនួននាក់ឱ្យជាប់ពន្ធនាគាររយៈពេលមួយឆ្នាំ និងពិន័យជាប្រាក់ចំនួនជាង ២ លានរៀល។ សាច់ញាតិក្រុមគ្រួសារសកម្មជនខាងលើយល់ថា ការចាប់ខ្លួននឹងផ្តន្ទាទោសនេះ ជារឿងអយុត្តិធម៌បំផុត។
លោក កែវ សុខា រាយការណ៍ពីព័ត៌មាននេះ
សាលាឧទ្ធរណ៍រាជធានីភ្នំពេញ បានសម្រេចឱ្យអ្នកស្រី ម៉ី សុផុន និងលោក ធន ច័ន្ទថា ជាប់ពន្ធនាគារ១ឆ្នាំនិងពិន័យជាប្រាក់ជាង ២ លានរៀលដដែល ដោយតម្កល់សេចក្តីសម្រេចរបស់តុលាការថ្នាក់ក្រោមទុកថាជារឿងត្រឹមត្រូវ។ នេះបើតាមការចុះផ្សាយព័ត៌មានក្នុងស្រុកនិងតាមការឱ្យដឹងបន្ថែមពីសាច់ញាតិក្រុមគ្រួសារសកម្មជនបក្សប្រឆាំងខាងលើ។
អ្នកស្រី ម៉ី សុភ័ណ្ឌ បងស្រីអ្នកស្រី ម៉ី សុផុន និយាយថា ការចាប់ខ្លួននិងផ្តន្ទាទោសប្អូនស្រីរបស់អ្នកស្រីគឺជារឿងអយុត្តិធម៌បំផុត ព្រោះគាត់គ្រាន់តែបង្ហាញមតិលើបណ្តាញសង្គមតែប៉ុណ្ណោះ។ អ្នកស្រី ម៉ី សុភ័ណ្ឌ ត្អូញត្អែរថា សព្វថ្ងៃអ្នកស្រីជួបការលំបាកក្រោយពីប្អូនស្រីជាប់ពន្ធនាគារ ព្រោះអ្នកស្រីត្រូវរ៉ាប់រងនិងជួយផ្តត់ផ្គង់ការហូបចុកនិងសម្ភារៈផ្សេងៗដល់ប្អូនស្រីដែលកំពុងជាប់ឃុំឃាំង។ យ៉ាងណាអ្នកស្រីរំពឹងថា តុលាការនឹងអាចផ្តល់ភាពយុត្តិធម៌និងដោះលែងប្អូនស្រីរបស់អ្នកស្រីឱ្យមានសេរីភាពឡើងវិញ។
អ្នកស្រី ម៉ី សុភ័ណ្ឌ៖«វាគ្មានអីយុត្តិធម៌ទេ ពីព្រោះមនុស្សមានទោសទៅហើយ ខ្ញុំមិនដឹងនិយាយថាម៉េចទេ។ ខ្ញុំមិនដឹងថាគាត់ខុសអីដែល ខ្ញុំគ្រាន់តែឃើញគាត់សរសេរតិចហ្នឹង តែខ្ញុំមិនដឹងថាគាត់ធ្វើអីពីមុនៗខ្ញុំមិនឃើញ។ខ្ញុំចង់ទៅតុលាការសួរថាគាត់ខុសអី»។
អ្នកស្រី ម៉ី សុផុន និងលោក ធន ច័ន្ទថា ត្រូវបានសាលាដំបូងរាជធានីភ្នំពេញ សម្រេចកាត់ទោសឱ្យអ្នកទាំងពីរជាប់ពន្ធនាគារចំនួន ១ ឆ្នាំ ក្រោមបទចោទប្រកាន់ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទប្រមាថថ្នាក់ដឹកនាំ»កាលពីថ្ងៃទី២១ ខែធ្នូ ឆ្នាំ២០២១ ។
អ្នកស្រី ម៉ី សុផន ជាស្ត្រីថ្ងៃសុក្រ ដែលតែងចេញទាមទារឱ្យមានការដោះលែងសកម្មជននយោបាយ សកម្មជនបរិស្ថាន សកម្មជនសង្គម ព្រះសង្ឃខ្មែរថាវរៈ និងយុវជន។
សកម្មជនអតីតបក្សប្រឆាំងទាំងពីរនាក់នេះ ត្រូវបានកម្លាំងសមត្ថកិច្ចចាប់ខ្លួនកាលពីថ្ងៃទី២៦ និង២៧ ខែកុម្ភៈ ឆ្នាំ២០២១ ពាក់ព័ន្ធនឹងការសរសេរសារបង្ហោះលើបណ្ដាញសង្គម រិះគន់ការចាក់វ៉ាក់សាំងរបស់ចិន ខណៈរដ្ឋាភិបាលកម្ពុជាបានចាក់វ៉ាក់សាំង Sinopharm ដែលពលរដ្ឋមួយចំនួនរិះគន់អំពីគុណភាពព្រោះ មិនទាន់ទទួលស្គាល់ពីអង្គការសុខភាពពិភពលោក (WHO)។
សូមរំលឹកថា មុនពេលចាប់ខ្លួនលោក ធន ច័ន្ទថា បានបង្ហោះសារមួយនៅលើបណ្តាញសង្គមហ្វេសប៊ុក កាលពីថ្ងៃទី១៨ ខែកុម្ភៈ ឆ្នាំ២០២១ ដោយសរសេរថា៖ «មើលឲ្យហើយបងប្អូនខ្មែរ ប្រជាពលរដ្ឋមិនព្រមចាក់វ៉ាក់សាំងចិន បង្ខំឲ្យគេចាក់ទៅវិញ ហេតុអ្វីក៏យកប្រជាពលរដ្ឋខ្លួនជាសត្វសម្រាប់ពិសោធន៍ទៅវិញ»។
ដោយឡែកអ្នកស្រី ម៉ី សុផន បានបង្ហោះសារមួយកាលពីថ្ងៃទី៩ ខែកុម្ភៈ ដោយបានពណ៌នាលើទំព័រហ្វេសប៊ុកថា៖«កម្ពុជាជាប្រទេសមួយដែលមិនមានការឆ្លងជំងឺរលាកផ្លូវដង្ហើម (កូវីដ១៩) ឬស្លាប់ដោយជំងឺនេះគួរឲ្យព្រួយបារម្ភឡើយ។ ហេតុអ្វីបានជារដ្ឋាភិបាលឯកបក្សប្រញាប់ប្រញាល់អំពាវនាវឲ្យប្រជារាស្ត្រខ្មែរចាក់វ៉ាក់សាំងរបស់ចិន ដែលមិនទាន់បានទទួលស្គាល់ពីអង្គការសុខភាពពិភពលោក (WHO) យ៉ាងតក់ក្រហល់បែបនេះ?»។
អ្នកឃ្លាំមើលសិទ្ធិមនុស្សរិះគន់លើការចាប់ខ្លួនករណីនេះថា ជាការប្រើរូបភាពបង្ក្រាបបន្ថែមទៀតមកលើអតីតសកម្មជនបក្សជំទាស់។ ប៉ុន្តែសមត្ថកិច្ចបានបំភ្លឺកាលគ្រានោះថា ការចាប់ខ្លួនអ្នកទាំងពីរនេះ ដោយសារការសរសេរបញ្ចេញមតិរបស់ពួកគេមានចរិតញុះញង់ និងផ្តល់ព័ត៌មានមិនពិតធ្វើឱ្យមានការយល់ច្រលំដល់សាធារណជនពីបញ្ហាវ៉ាក់សាំង៕
