អតីតមេដឹកនាំកំពូលខ្មែរក្រហមម្នាក់ក្នុងចំណោមពីរនាក់ដែលកំពុងរងការដាក់ទណ្ឌកម្មពន្ធនាគារអស់មួយជីវិត ក្នុងបទឧក្រិដ្ឋកម្មប្រល័យពូជសាសន៍ និងឧក្រិដ្ឋប្រឆាំងមនុស្សជាតិ ត្រូវបានរាយការណ៍មកថាបានទទួលមរណភាពហើយ។
លោក នួន ជាបាន សម្រាកព្យាបាលនៅមន្ទីរពេទ្យមិត្តភាព ខ្មែរសូវៀតជាងមួយខែមកហើយតាំងពីថ្ងៃ២ កក្កដា។ លោក នេត ភក្រ្ដាអ្នកនាំពាក្យសាលាក្ដីខ្មែរក្រហមបានប្រាប់អ្នកសារព័ត៌មានថា លោកនួនជាពិតជាទទួលមរណភាពមែន អំឡុងពេលសម្រាកព្យាបាលនៅមន្ទីរពេទ្យមិត្តភាពសូវៀតនៅថ្ងៃទី៤សីហានេះ។
លោកនួន ជា មានឈ្មោះកំណើត ថា ឡុង ប៊ុនរួត។ លោកកើតនៅថ្ងៃទី០៧ ខែកក្កដា ឆ្នាំ១៩២៦ នៅខេត្តបាត់ដំបង។ លោកមានតំណែងក្នុងរបបកម្ពុជាប្រជាធិបតេយ្យខ្មែរក្រហម គឺអនុលេខាធិការបក្ស និង ជាប្រធានរដ្ឋសភាប្រជាជន។
លោក នួនជា ទទួលបានសញ្ជាតិថៃក្នុងអំឡុងពេលខេត្តកំណើតរបស់លោកបានធ្លាក់ទៅលើដៃសៀមកាលសង្គ្រាមលោកលើកទី២។ ហើយលោកក៏បានបញ្ចប់ថ្នាក់បរិញ្ញាបត្រច្បាប់ នៅសកលវិទ្យាល័យល្បីមួយនៅបាងកក គឺធម្មសាត និ ក្រោយមកលោកក៏បានបម្រើការនៅក្រសួងការបរទេសថៃជាស្មៀននិងជាសមាជិកបក្សកុម្មុយនីស្ដថៃ។រហូតដល់ឆ្នាំ១៩៥០ ទើបលោកបានត្រឡប់មកមាតុភូមិវិញ ហើយបម្រើការឱ្យគណបក្សកុម្មុយនីស្ដឥណ្ឌូចិនដែលមានការបង្វឹកហាត់នយោបាយលោកទៅវិញទៅមកពីភ្នំពេញ និង ក្រុងហាណូយ។
នៅពេលមានការចុះកិច្ចព្រមព្រៀងក្រុងហ្សឺណែវ នៅថ្ងៃទី២០ កក្កដា ឆ្នាំ១៩៥៤ ក្រុមខ្មែរកុម្មុយនិស្តត្រូវបែកជាពីរ មួយក្រុមរត់ទៅវៀតណាម មួយក្រុមទៀតលាក់ខ្លួននៅប្រទេសកម្ពុជា។ ពេលនោះក្នុងឆ្នាំ១៩៥៤ នួន ជា បាន វិលត្រឡប់ពីប្រទេសវៀតណាមរួចក៏មកចូលរួមធ្វើការជាមួយក្រុមខ្មែរកុម្មុយនិស្ត ដែលនៅលាក់ខ្លួនក្នុងទីក្រុងភ្នំពេញ និងចាប់ផ្ដើមស្គាល់ សាឡុត ស ហៅប៉ុល ពត ដែលម្នាក់ធ្វើការឱ្យសៀវ ហេង ជាលេខាបក្សប្រជាជនបដិវត្តន៍ខ្មែរ ទទួលបន្ទុកគ្រប់គ្រងបណ្តាញជនបទ និង ប៉ុល ពត ធ្វើការក្រោមបញ្ជាផ្ទាល់របស់ ទូ សាមុត ដែលទទួលបន្ទុកគ្រប់គ្រងបណ្តាញទីក្រុង។
រហូតដល់ថ្ងៃទី៣០ ខែកញ្ញា ឆ្នាំ១៩៦០ ទូ សាមុត ត្រូវបានមហាសន្និបាតបក្សបោះឆ្នោតឲ្យធ្វើជាលេខាបក្ស ជំនួស សៀវ ហេង ដែលបានផ្តាច់ខ្លួនទៅចុះចូលជាមួយសម្តេច នរោត្តម សីហនុ។ក្នុងឱកាសនោះ នួន ជា ក៏បានឡើងកាន់តំណែងជាអនុលេខាបក្សប្រជាជនបដិវត្តន៍ខ្មែរ ដែលជាតំណែងកំពូលលំដាប់ទីពីរ បន្ទាប់ពី ទូ សាមុត។ នួន ជា បានកាន់តំណែងជាអនុលេខាបក្សកុម្មុយនិស្តរហូតដល់ពេលដែលគាត់បានផ្តាច់ខ្លួនចុះចូលជាមួយរដ្ឋាភិបាលកម្ពុជា នៅខែធ្នូ ឆ្នាំ១៩៩៨។
គួរឱ្យដឹងថា នៅឆ្នាំ១៩៧៥ នួន ជា ក៏បានក្លាយជាប្រធានសភានៃរបបកម្ពុជាប្រជាធិបតេយ្យ ទទួលខុសត្រូវក្នុងការរៀបចំអង្គការចាត់តាំងបក្ស និងទទួលបន្ទុកកិច្ចការអប់រំផ្នែកនយោបាយ និងមនោគមន៍វិជ្ជា។ រូប នួន ជា នេះហើយជាអ្នកទទួលខុសត្រូវក្នុងការចេញគោលនយោបាយឲ្យមន្រ្តីថ្នាក់មូលដ្ឋានអនុវត្ត ក្នុងនោះ រួមទាំងមន្រ្តីមន្ទីរ ស២១ ឬ គុកទួលស្លែងផងដែរ។
លោកនួនជា ក៏ធ្លាប់បានធ្វើជានាយករដ្ឋមន្រ្ដីស្ដីទី ជំនួសប៉ុលពតម្ដងម្កាលដែរ។
ក្រោយពេលដែលរបបកម្ពុជាប្រជាធិបតេយ្យបានដួលរលំ នៅថ្ងៃទី៧ ខែមករា ឆ្នាំ១៩៧៩ នួន ជា បានរត់ទៅរស់នៅជាយដែនខ្មែរ-ថៃ ជាមួយមេដឹកនាំខ្មែរក្រហមផ្សេងៗទៀត និង ព្រម
នួន ជា បានផ្តាច់ខ្លួនចុះចូលជាមួយរដ្ឋាភិបាល ជាថ្នូរនឹងការរួចផុតពីរាល់ការចោទប្រកាន់ពីបទឧក្រិដ្ឋនានាដែលគាត់បានប្រព្រឹត្តក្នុងរបបខ្មែរក្រហមក្នុងឆ្នាំ១៩៩៨។
យ៉ាងណា នៅថ្ងៃទី១៩ ខែកញ្ញា ឆ្នាំ២០០៧ នួន ជា ត្រូវបានសមត្ថកិច្ចនាំខ្លួន ពីខេត្តកំណើតនៃស្រុកសំឡូត មកឃុំខ្លួននៅអង្គជំនុំជម្រះក្ដីនៃសាលាក្ដីខ្មែរក្រហម តាមដីកាចាប់ខ្លួនរបស់ សាលាក្ដីខ្មែរក្រហម។ លោន នួន ជា ត្រូវបានអង្គជំនុំជម្រះកាត់ទោសឱ្យជាប់គុកអស់មួយជីវិតពីបទឧក្រិដ្ឋកម្មសង្រ្គាមសម្លាប់មនុស្សយ៉ាងរង្គាល និងឧក្រិដ្ឋកម្មប្រឆាំងមនុស្សជាតិ ។
សូមជម្រាបថា កម្មាភិបាលជាន់ខ្ពស់នៃរបបខ្មែរក្រហមគឺកាំងហ្កិចអ៊ាវហៅឌុច អតីតប្រធានគុកទួលស្លែងក៏ត្រូវបានកាត់ទោសមួយជីវិតផងដែរ។ ចំណែកឯលោក ខៀវសំផង អតីតប្រមុខរដ្ឋនៃរបបអាវខ្មៅនេះបច្ចុប្បន្នមានអាយុ៨៨ឆ្នាំ ក៏កំពុងជាប់ពន្ធនាគារក្រោមសាលក្រមកាត់ទោសមួយជីវិតដូចលោកនួនជាផងដែរ។យ៉ាងណា អតីតរដ្ឋមន្រ្ដីការបរទេសអៀងសារី បានទទួលមរណភាពដោយជំងឺចាស់ជរានៅមុនសាលក្រមអស់មួយជីវិតទម្លាក់លើរូបលោក។ចំណែកភរិយារបស់គាត់គឺលោកស្រី អៀង ធារិទ្ធ អតីតរដ្ឋមន្រ្ដីក្រសួងសង្គមកិច្ចបានទទួលមរណភាពដោយជំងឺ ៕
ដោយ ពៅនិកា