ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានចេញសេចក្ដីប្រកាសព័ត៌មានបញ្ជាក់ម្ដងទៀតថា កម្ពុជាជំពាក់បំណុលបរទេសត្រឹមតែជាង ៧ ពាន់លានដុល្លារសហរដ្ឋអាមេរិកតែប៉ុណ្ណោះ ខណៈកន្លងមកមានការចុះផ្សាយថាការជំពាក់បំណុលបរទេសរបស់កម្ពុជាមានជាង ១ ម៉ឺនលានដុល្លារ ។ សេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុនេះ គឺចុះផ្សាយនៅថ្ងៃទី ២ មេសា ម្សិលមិញ ។
លោកសោមលាភរាយការណ៍៖
សេចក្ដីប្រកាសដដែលបញ្ជាក់ថា គិតត្រឹមឆ្នាំ ២០១៨ កម្ពុជាមានបំណុលសាធារណៈក្រៅប្រទេសប្រមាណ ៧ពាន់លានដុល្លារ មិនមែន ជាង១ម៉ឺនលានដុល្លារនោះទេ ។
ក្រសួងសេដ្ឋកិច្ច និងហិរញវត្ថុ បញ្ជាក់ឲ្យដឹងថា ដោយសារមានការចុះផ្សាយពីបណ្ដាសារព័ត៌មានមួយចំនួន ស្រង់ថាបំណុលកម្ពុជាជំពាក់បរទេសជាង ១ម៉ឺនលានដុល្លារនោះជាការមិនត្រឹមត្រូវទេ ។
ក្រសួងបញ្ជាក់ថា តួលេខបំណុលជាង១ម៉ឺនលានដុល្លារនោះ ជាតួលេខនៃការខ្ចីឥណទានសម្បទាន ដែលរដ្ឋាភិបាលបានចុះកិច្ចព្រមព្រៀងជាដៃគូអភិវឌ្ឍន៍ គិតចាប់តាំងពីឆ្នាំ១៩៩៣ រហូតមកដល់ដំណាច់ឆ្នាំ២០១៨ ។
យ៉ាងណាក្រសួងបញ្ជាក់ថា តួលេខនេះ មិនមែនជាតួលេខសន្និធិបំណុល ឬបំណុលសាធារណៈក្រៅប្រទេស ដែលកម្ពុជាជំពាក់ជាក់ស្តែងគិតត្រឹមដំណាច់ឆ្នាំ២០១៨នោះទេ ។
តែយ៉ាងណា ក្រសួងសេដ្ឋកិច្ច និងហិរញ្ញវត្ថុឱ្យដឹងថា គិតត្រឹមឆ្នាំ ២០១៨ តួលេខសន្និធិបំណុលសាធារណៈក្រៅប្រទេស គឺមានចំនួនប្រមាណជាង៧ពាន់លានដុល្លារប៉ុណ្ណោះ ។
យ៉ាងណា សង្គមស៊ីវិលថា កម្ពុជាគួរតែបន្ថយការខ្ចីបំណុលបរទេស និងត្រូវពិនិត្យទៅលើលក្ខខ័ណ្ឌនៃការខ្ចីឱ្យបានហ្មត់ចត់ ប្រើប្រាស់កម្ចីឱ្យត្រឹមត្រូវតាមគោលដៅ និងមានប្រសិទ្ធភាព ។
ដោយឡែក អ្នកជំនាញសេដ្ឋកិច្ចថា ការខ្ចីបំណុលបរទេសនេះ មិនមែនជារឿងអាក្រក់សម្រាប់កម្ពុជានោះទេ ។ យ៉ាងណា កម្ពុជាត្រូវតែខ្ចីបន្តទៀត ព្រោះដើម្បីអភិវឌ្ឍន៍ប្រទេស ប្រសិនបើពឹងផ្អែកទៅលើតែការប្រមូលពន្ធគឺមិនងាយគ្រប់គ្រាន់ក្នុងការអភិវឌ្ឍឱ្យជឿនលឿនឡើយ ។
អ្នកសេដ្ឋកិច្ចបញ្ជាក់ថា អ្វីដែលព្រួយបារម្ភគឺការយកកម្ចីទាំងនោះទៅប្រើប្រាស់គ្មានប្រសិទ្ធភាព ។
តែយ៉ាងណា ក្រសួងសេដ្ឋកិច្ច និងហិរញ្ញវត្ថុ បញ្ជាក់ថារាជរដ្ឋាភិបាលកម្ពុជា បាននិងកំពុងគ្រប់គ្រងបំណុលសាធារណៈ ប្រកបដោយស្មារតីប្រុងប្រយ័ត្ន និងប្រកាន់ខ្ជាប់នូវគោលការណ៍គន្លឹះចំនួន៤ គឺទី ១-ត្រូវខ្ចីឥណទានក្នុងទំហំសមស្រប ដែលស្ថានភាពថវិកា និងសេដ្ឋកិច្ចអាចទ្រាំទ្របាន ទី២- គឺរដ្ឋាភិបាលខ្ចីតែឥណទានដែលមានកម្រិតសម្បទាន និងលក្ខខណ្ឌអនុគ្រោះខ្ពស់ ទី៣-ត្រូវខ្ចីសម្រាប់តែវិស័យអាទិភាពទ្រទ្រង់ចីរភាពនៃកំណើនសេដ្ឋកិច្ច និងវិស័យបង្កើនផលិតភាពសេដ្ឋកិច្ច ឬផលិតភាពផលិតកម្ម និងទី៤-ត្រូវប្រើប្រាស់ឥណទានប្រកបដោយតម្លាភាព គណនេយ្យភាព ប្រសិទ្ធភាព និងស័ក្តិសិទ្ធិភាពខ្ពស់បំផុត ៕
អត្តបទដោយ៖ សោម លាភ