ភ្នំពេញ៖ កម្ពុជាកំពុងដើរទៅការបាត់បង់សិទ្ធិទទួលបានប្រព័ន្ធអនុគ្រោះពន្ធEBA នៅប៉ុន្មានខែខាងមុខនេះ បើបក្សកាន់អំណាចនៅកម្ពុជា មិនស្ដារសិទ្ធិសេរីភាពពលរដ្ឋនិងអ្នកនយោបាយនៃបក្សប្រឆាំងឡើងវិញ ។ យ៉ាងណា នៅថ្ងៃចន្ទទី៤មីថុនានេះ សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្ស កាន់អំណាចផ្ញើសារទៅក្រុមអ្នកប្រឆាំងថា ទ្វារសម្រាប់ពួកគេចូលធ្វើនយោបាយ អាចត្រូវបិទទៅវិញ នៅមុនឬក្រោយចូលឆ្នាំខ្មែរ ប្រសិនបើពួកគេ ព្រងើយកន្តើយ និងគិតតែពីទាមទារលក្ខខណ្ឌមិនចេះចប់។តែអ្នកវិភាគយល់ថា វិសោធនកម្មច្បាប់មាត្រា៤៥ស្ទួន គ្មានប្រសិទ្ធភាព ហើយចាញ់យុទ្ធសាស្រ្តរបស់ លោកសម រង្ស៊ី ។
លោក សោម លាភ ជូនសេចក្ដីលំអិត ៖
សម្ដេច ហ៊ុន សែន ថ្លែងខ្លាំងៗនៅចំពោះមុខឯកអគ្គរដ្ឋទូតជប៉ុនប្រចាំនៅកម្ពុជាថា បុគ្គលដែលស្នើសុំសិទ្ធិធ្វើនយោបាយ ត្រូវដាក់ពាក្យមកឱ្យឆាប់ កុំចាំដោះលែងលោក កឹម សុខា បើពុំនោះទេ ការបើកច្រកនយោបាយនេះអាចនឹងត្រូវបាត់បង់ ទោះបីដាក់ពាក្យស្នើសុំក៏ដោយ ព្រោះសិទ្ធិនៅនាយករដ្ឋមន្ត្រី ហើយក៏មិនមានការដោះលែង ឬទម្លាក់ការចោទប្រកាន់លើលោក កឹម សុខា នោះទេ ព្រោះស្ថិតក្នុងដំណាក់កាលនីតិវិធីតុលាការ។
ថ្លែងនៅក្នុងពិធីបើកការសាងសង់ផ្សេងៗក្នុងគម្រោងការពារទឹកជំនន់ និងកែប្រព័ន្ធប្រឡាយលូ ក្នុងរាជធានីភ្នំពេញជំហានទី៤ នៅថ្ងៃទី ៤ នេះ សម្ដេចបញ្ជាក់សារនយោបាយទៅដល់មន្ត្រីអតីតគណបក្សប្រឆាំង ឱ្យស្នើសុំសិទ្ធិធ្វើនយោបាយ ដើម្បីចូលរួមនយោបាយក្នុងការបោះឆ្នោតឆ្នាំ ២០២២ និង ២០២៣ ។
នាយករដ្ឋមន្ត្រីបន្ថែមថា ប្រសិនបើមិនមានការស្ដារនីតិសម្បទារធ្វើនយោបាយនៅឡើយនោះទេ ហើយបុគ្គលនោះធ្វើនយោបាយ សម្ដេចនឹងវ៉ៃខ្នោះ ។
នាយករដ្ឋមន្ត្រីកម្ពុជា ប្រាប់ទៅបក្សប្រឆាំងថាកុំបាច់ចាំឱ្យមានការដោះលែងលោក កឹម សុខា ទើបសុំសិទ្ធិធ្វើនយោបាយ ព្រោះគ្មានថ្ងៃដោះលែង ឬទម្លាក់ការចោទប្រកាន់នរណាម្នាក់ឡើយ ។
សម្ដេចនាយករដ្ឋមន្ត្រីបញ្ជាក់ចង់សម្ដៅឱ្យមន្ត្រីអតីតបក្សប្រឆាំងឱ្យប្រញាប់ដាក់ពាក្យសុំសិទ្ធិធ្វើនយោបាយ បើពុំនោះទេ ឱកាសអាចនឹងបាត់បង់ ។
សម្ដេច បញ្ជាក់ដោយបង្ហាញពីភាពដែលមិនអង្វរឱ្យបុគ្គលណាម្នាក់ក្នុងការស្នើសុំសិទ្ធិធ្វើសកម្មភាពនយោបាយនោះឡើយ ព្រោះក៏ស្រួលសម្រាប់សម្ដេចក្នុងការគ្រប់គ្រងស្ថានការណ៍ ។
សម្ដេច ហ៊ុន សែន ថា ផ្លូវមានតែពីរប៉ុណ្ណោះសម្រាប់មន្ត្រីអតីតបក្សប្រឆាំង គឺទីមួយសុំសិទ្ធិធ្វើនយោបាយ និងទី២ រង់ចាំដល់ផុតកាលកំណត់នៃការហាមឃាត់ ដែលសម្រេចដោយតុលាការកំពូល ។
អ្នកវិភាគនៅកម្ពុជាមានច្រើនមជ្ឈដ្ឋាន អ្នកខ្លះ វិភាគ រិះគន់ ទៅលើ បុគ្គលនិងបក្ស។តែអ្នកវិភាគខ្លះ និយាយយោងលើស្ថានការណ៍ជាក់ស្ដែង។ លោកឯមសុវណ្ណារ៉ា យល់ឃើញថា
អ្នកនយោបាយជាប់បំរាមទាំងនោះ បើសុំសិទិ្ធធ្វើនយោបាយគឺត្រូវដាក់ខ្លួនឯងថាដើរឆ្ងាយពីបណ្ដាំរបស់លោកសមរង្ស៊ី។ លោកថា វិសោធនកម្មច្បាប់មាត្រា៤៥ស្ទួន គ្មានប្រសិទ្ធភាព ហើយចាញ់យុទ្ធសាស្រ្តរបស់ លោកសមរង្ស៊ី។
ការសើរើវិសោធនកម្មច្បាប់ស្ដីពីគណបក្សនយោបាយមាត្រា ៤៥ ថ្មីស្ទួនមួយ ត្រូវបានព្រះមហាក្សត្រឡាយព្រះហស្ថលេខាប្រកាសដាក់ឱ្យប្រើប្រាស់ជាប្រញាប់កាលពីថ្ងៃទី ២ មកករា ឆ្នាំ២០១៩ ។ មកទល់ពេលនេះ មានលោក គង់ គាំ អតីតទីប្រឹក្សាជាន់ខ្ពស់នៃអតីតគណបក្សសង្គ្រោះជាតិ និងកូនប្រុសរបស់លោក គឺលោក គង់ បូរ៉ា ត្រូវបានស្ដារនីតិសម្បទារធ្វើនយោបាយវិញដោយព្រះមហាក្សត្រ ។ យ៉ាងណា លោក ស៊ីម សុវណ្ណនី មន្ត្រីជាន់ខ្ពស់អតីតគណបក្សសង្គ្រោះជាតិ ក៏នឹងដាក់ពាក្យស្នើសុំសិទ្ធិធ្វើនយោបាយនាពេលឆាប់ៗនេះដែរ ៕
អត្តបទដោយ៖ សោម លាភ
