ប្រទេសឡាវដែលមានព្រំដែនជាប់កម្ពុជាកំពុងស្ថិតក្នុងភាពគ្រោះមហន្តរាយដ៏ធ្ងន់ធ្ងរដោយគ្រោះធម្មជាតិបានវាយបំបាក់ទំនប់វារីអគ្គសនីដែលបំរុងនឹងដាក់អោយដំណើរការចរន្តអគ្គិសនីនៅឆ្នាំ ២០១៩។
តាមសេចក្ដីរាយការណ៍មកថា ការបាក់ទំនប់វារីអគ្គិសនីនេះ បណ្ដាលពីទឹកជំនន់ទឹកភ្លៀង ដែលបានធ្លាក់ខ្លាំងៗដូចគេហែកមេឃ នៅប៉ុន្មានថ្ងៃមកនេះ ហើយកើតឡើងនៅខេត្តអាតតាពើនៃភាគអាគ្នេយ៍ប្រទេសឡាវ ដែលជាប់ព្រំដែនកម្ពុជាខេត្តស្ទឹងត្រែង។
តាមប្រភពព័ត៌មានរបស់ទីភ្នាក់ងារសារព័ត៌មាន AP មនុស្សជាច្រើនរយនាក់បាត់ខ្លួន ខណៈគេបានរកឃើញសាកសព ២០នាក់នៅថ្ងៃដំបូង។ តាមប្រភពដដែលលំនៅដ្ឋានអ្នកស្រុករាប់ម៉ឺនខ្នងនឹងត្រូវជនលិច។
យោងតាមទីភ្នាក់ងារសារព័ត៌មាននៃប្រទេសឡាវ ឧបទ្ទវហេតុនេះ បានកើតឡើងនៅក្បាលព្រលប់កាលពីថ្ងៃទី ២៤ កក្កដា គឺភ្លាមៗបន្ទាប់ពីភ្លៀងធ្លាក់យ៉ាងខ្លាំងនៅតំបន់នោះ។
តាមការបង្ហោះវីដេអូនិងរូបភាពផ្សព្វផ្សាយលើបណ្ដាញសង្គមឃើញថា ទឹកបានឡើងដល់ដំបូលផ្ទះរបស់អ្នកស្រុក ហើយស្រែចម្កាវិញ គឺលិចគ្មាន សល់។ នាយករដ្ឋមន្ត្រីឡាវ Thongloun Sisoulith បានទៅដល់តំបន់នោះ ហើយអំពាវនាវរកជំនួយជាបន្ទាន់។
ទាក់ទិននឹងករណី គ្រោះធម្មជាតិនេះ លោកអគ្គលេខាធិការអង្គការសហប្រជាជាតិ បាន សម្ដែង ការសោកស្ដាយ ជាខ្លាំងចំពោះការបាត់បង់ជីវិតមនុស្ស សត្វ។ លោក បានស្នើអោយ ទីភ្នាក់ងារស្បៀងរបស់អង្គការសហប្រជាជាតិ ត្រៀម ដើម្បីជួយជនរងគ្រោះ។
សូមបញ្ជាក់ថា ទំនប់វារីអគ្គិសនីនេះ មានភាគហ៊ុនមកពីប្រទេសកូរ៉េខាងត្បូង ថៃនិងឡាវ ដែលស្ថាបនាឡើង ដោយចំណាយថវិកា ១ពាន់ ២រយលានដុល្លារ ។ ទំនប់នេះ ចាប់ផ្ដើមស្ថាបនានៅឆ្នាំ ២០១២ ដោយបម្រុងទាញយកចរន្តអគ្គិសនី នៅឆ្នាំ២០១៩។ ក្រុមហ៊ុនដែលពាក់ព័ន្ធ មានបួនក្រុមហ៊ុន គឺក្រុមហ៊ុនឡាវ Xe Pian Xe Namnoy ហើយបីក្រុមហ៊ុនទៀតមកថៃ និងកូរ៉េខាងត្បូង។
តាមប្រភពរបស់ Mail Online រោងចក្រផលិតអគ្គសនី ដោយយកចរន្តទឹក ពីទំនប់វារីអគ្គីសនីនេះ មានកម្លាំង ៤១០មេហ្កាវ៉ាត់។ ថាមពលអគ្គីសនី ដែលបាន មកពីទំបន់វារីអគ្គីសនីនេះ ត្រូវចែកចាយលក់ទៅអោយប្រទេសថៃ ៩០ភាគរយ ហើយចែកចាយក្នុងស្រុក ១០ភាគរយ៕
