លោក អាត់ ខែម ស្នងការខេត្តបន្ទាយមានជ័យបានឱ្យវិទ្យុស្រ្ដីដឹងនៅរសៀលថ្ងៃទី០៦ ខែមិថុនា ឆ្នាំ ២០១៨នេះ ថាព្រះសង្ឃស្រិល វណ្ណា ដែលមានរឿងអាស្រូវសេ្នហា ល្បីពេញហ្វេសប៊ុកត្រូវបានអនុញ្ញតិអោយវិលទៅលំនៅដ្ឋានរបស់ឪពុកម្ដាយវិញហើយ។
តាមលោកស្នងការ ការនាំខ្លួនព្រះសង្ឃក្រោយចាប់ផ្សឹកមកាន់ស្នងការនគរបាលខេត្ត គឺដើម្បីការពារសុវត្ថិភាពរបស់អតីតសង្ឃនេះ។
លោកស្រិល វណ្ណា ជាព្រះចៅអធិការវត្តភ្នំបាក់លើនិងអនុគណៈក្រុងសិរីសោភ័ណខេត្តមានបន្ទាយមានជ័យ។ ការចាប់ផ្សឹកព្រះចៅអធិការវត្តភ្នំបាក់លើធ្វើឡើងក្រោយពីបែកធ្លាយមានស្នេហាជាមួយនិងនារីឈ្មោះ កាយ វីតា អាយុ១៩ឆ្នាំ រស់នៅភូមិក្បាលកោះ សង្កាត់ ក្រុងប៉ោយប៉ែត។
តាមសម្ដីមន្រ្ដីនគរបាលខេត្តដដែលនេះ បញ្ជាក់ថា ការពិតចៅអធិការវត្តភ្នំបាក់លើនិងអនុគណៈក្រុងសិរីសោភ័ណឈ្មោះ ស្រិល វណ្ណា ហៅអៀម វណ្ណា ដែលកម្លាំងនគរបាលខេត្តបន្ទាយមានជ័យដឹកមកស្នងការនគរបាលខេត្តបន្ទាយមានជ័យ មិនមែនឃាត់ខ្លួននោះទេ គឺដឹករំដោះការពារសុវត្ថិភាពខ្លាចមានផ្ទុះហិង្សាណាមួយកើតឡើងពីប្រជាពលរដ្ឋដែលចោមរោមនៅបរិវេនព្រះវិហារ។
លោក អាត់ ខែម៖«ព្រះសង្ឃ នេះពុំមានអ្នកនណាប្តឹងមកសមត្ថកិច្ចទេ គាត់បានត្រឡប់ទៅផ្ទះវិញហើយ មិនមានបញ្ជូនទៅណាទេ ហើយក៏មិនមានបណ្តឹងជាលិខិតខិត្តិកៈអីដែរ»។
ករណី របស់ព្រះសង្ឃខ្មែរ មានរឿងអាស្រូវ ក្នុងពេល កំពុងជាសង្ឃ មិនមានតែមួយករណីនេះទេ៕