ភ្នំពេញ ៖ កម្មករ កម្មការិនី ចំនួន ១១៧នាក់ បានសន្លប់ជាបន្ដបន្ទាប់ កាលពីព្រឹកម៉ោងប្រហែល ០៨ នៅថ្ងៃទី២៨ ខែឧសភានេះ ។ កម្មករ កម្មការិនី ទាំងនោះ ធ្វើការនៅក្នុងរោងចក្រ ស្ដារិច (Starite Cambodia Co,ltd) ស្ថិតក្នុងភូមិ ត្រយឹង ឃុំ ពើក ស្រុក អង្គស្នួល ខេត្ដកណ្ដាល។
លោក លៀ ស៊ីណា រាយការណ៍ ៖
ក្នុងចំណោមកម្មករ កម្មការិនី សរុប ១១៧នាក់នេះ មានបុរសត្រឹមតែ ៥នាក់ប៉ុណ្ណោះ។ នេះបើយោងតាមអធិការនគរបាលស្រុកអង្គស្នួល លោកវរសេនីយ៍ទោ មាន សំណាង ដែលបានផ្ដល់បទសម្ភាសន៍ ឲ្យវិទ្យុស្ដ្រី នៅថ្ងៃទី២៨ ខែឧសភានេះ។ លោកអធិការស្រុកអង្គស្នួល បានបញ្ជាក់ថា ហេតុការណ៍ដែលមានកម្មករ កម្មការិនី សន្លប់នេះ គឺកើតឡើងនៅម៉ោងប្រហែល ៨ព្រឹក។
ភ្លាមៗក្រោយពីទទួលដំណឹង ថាមានករណីកម្មករ កម្មការិនី សន្លប់ដូចនេះ សមត្ថកិច្ចបានបញ្ជូនកម្លាំងរបស់ខ្លួន ដើម្បីនាំពួកគេទៅមន្ទីរពេទ្យភ្លាមៗផងដែរ។ លោកវរសេនីយ៍ទោ មាន សំណាង បានឲ្យដឹងបន្ដថា យោងតាមការសន្និដ្ឋានជាបឋមរបស់សមត្ថកិច្ច មូលហេតុដែលនាំឲ្យកម្មករ កម្មការិនី ដួលសន្លប់ដូចនេះ គឺបណ្ដាលមកពី សុខភាពរបស់កម្មករ កម្មការិនី និងក្លិនថ្នាំបាញ់ច្រែះដែក នៅរោងសិប្បកម្មផ្សារដែកមួយកន្លែងនៅម្ដុំនោះ។
លោក មាន សំណាង ៖«ពាក់ព័ន្ធដល់ការនាំឲ្យទន់ខ្លួន ឬក៏ខ្សោយដល់កម្មករនេះ។ យើងឃើញមានពាក់ព័ន្ធទៅដល់រោងចក្រដែលនៅក្បែរហ្នឹងមួយ គាត់មានបាញ់ថ្នាំច្រែះ បានន័យថា គាត់ផ្សាដែក គាត់បាញ់ថ្នាំច្រែះ។ អញ្ចឹងតាមការសន្និដ្ឋាន សង្ស័យធុំក្លិនចេញពីហ្នឹង តែមិនដឹងថា ថ្នាំជាប្រភេទអីយើងមិនទាន់បានច្បាស់»។
យ៉ាងណាលោកអធិការនគរបាលស្រុកអង្គស្នួល បញ្ជាក់ថា បើទោះជាកម្មករ កម្មការិនី មានអាការវិលមុខ ទន់ដៃ ទន់ជើង ឈានដល់សន្លប់ក៏ពិតមែន ប៉ុន្ដែពុំមានកម្មករ កម្មការិនី រូបណាគ្រោះថ្នាក់ធ្ងន់ធ្ងរនោះទេ។ ពួកគេមានអាការធូរស្រាលមកវិញអស់ហើយ។ ចំពោះចំណាត់ការផ្សេងៗ លើរោងចក្រនេះ សមត្ថកិច្ចមិនទាន់អាចបញ្ជាក់បានឡើយ ដោយត្រូវរង់ចាំការប្រជុំជាមុនសិន។
សូមជម្រាបថា រោងចក្រ ស្ដារិច (Starite Cambodia Co,ltd) ស្ថិតក្នុងភូមិ ត្រយឹង ឃុំ ពើក ស្រុក អង្គស្នួល ខេត្ដកណ្ដាល។ រោងចក្រនេះ មានកម្មករ កម្មការិនី សរុបចំនួន ៧០០នាក់ ស្ដ្រី ៥៩៥នាក់។
បញ្ហាដែល កម្មករ កម្មការិនីតែងតែដួលសន្លប់នេះ គឺជាក្ដីកង្វល់ដ៏ធំមួយរបស់ រដ្ឋមន្ដ្រីក្រសួងការងារ ក៏ដូចជាក្រុមសហជីព។ ជារឿយៗក្រុមសហជីពតំណាងកម្មករ តែងតែអំពាវនាវសុំឲ្យក្រសួងការងារ និងបណ្ដុះបណ្ដាលវិជ្ជាជីវៈ ចុះពង្រឹងការធ្វើអធិការកិច្ច តាមរោងចក្រឲ្យបានហ្មត់ចត់ ដើម្បីជាប្រយោជន៍ទប់ស្កាត់ការដួលសន្លប់កើតឡើងជាបន្ដទៀត។ យ៉ាងណា ក្រសួងការងារ ក៏ហាក់បានធ្វើសកម្មភាពជាច្រើនដែរ ដើម្បីទប់ស្កាត់ ករណីដួលសន្លប់នេះ។
កាលពីចុងឆ្នាំ២០១៧ រដ្ឋមន្ដ្រីក្រសួងការងារ បានចេញបញ្ជាយ៉ាងម៉ឺងម៉ាត់ ថា នឹងដាក់ទោសដល់ថៅកែរោងចក្រណា ដែលបណ្ដោយឲ្យមានកម្មករ កម្មការិនី ដួលសន្លប់ជាបន្ដទៀត ក៏ប៉ុន្ដែបញ្ហានេះ នៅតែកើតមានដដែល ។ ព្រោះតែបញ្ហានេះ ក្រសួងការងារ កាលពីខែមីនា ឆ្នាំ២០១៨ ក៏បានសម្រេចរៀបចំឲ្យមានគណៈកម្មាធិការចុះធ្វើការស្រាវជ្រាវលើរោងចក្រដែលមានកម្មករសន្លប់បន្ថែមទៀត ដោយរំពឹងថា នឹងអាចដោះស្រាយបញ្ហានេះបាន៕
