ភ្នំពេញ ៖ កាលពីថ្ងៃទី២៨ ខែមីនា ឆ្នាំ២០១៨ ស្នងការខេត្ដ និងអធិការដ្ឋាននគរបាលស្រុកស្វាយលើ ខេត្ដសៀមរាប បានចាប់ខ្លួនបុរសពីរនាក់ ដែលជាប់សង្ស័យវាយបំបែកលិង្គថ្មបុរាណ ស្ថិតនៅបាតស្ទឹងលិង្គមួយពាន់ លើខ្នងភ្នំគូលែន។ នេះបើយោងតាមការឲ្យដឹងពី អ្នកនាំពាក្យអាជ្ញាធរជាតិអប្សរា ដែលបានប្រាប់វិទ្យុស្ដ្រីនៅថ្ងៃទី២៩ ខែមីនានេះ។
លោក លៀ សីណា រាយការណ៍ ៖
តាមការបញ្ជាក់របស់លោក ឡុង កុសល អ្នកនាំពាក្យអាជ្ញាធរជាតិអប្សរា ជនសង្ស័យបានវាយបំបែកចម្លាក់លិង្គថ្ម ចំនួន ៦ដុំ ហើយ ៣ដុំ រងការខូចខាត និង ៣ដុំផ្សេងទៀតបានបាត់។ លោក ឡុង កុសល បានបន្ថែមថា ហេតុការណ៍នេះ បានកើតឡើងតាំងតែពីថ្ងៃទី១៨ ខែមីនា ឆ្នាំ២០១៨ មកម្លេះ។
លោក ឡុង កុសល ៖«តាមដែលយើងពិនិត្យទៅតាមរបាយការណ៍មក សកម្មភាពនេះយើងឃើញថា មានតាំងពីថ្ងៃទី១៨ ខែមីនា។ ក្រោយពីឃើញសកម្មភាពហ្នឹងមក ខាងអាជ្ញាធរជាតិអប្សរាក៏បានរាយការណ៍ជូនកម្លាំងមានសមត្ថកិច្ច ខាងស្នងការនគរបាលខេត្ដសៀមរាប។ អញ្ចឹងថ្ងៃទី២៧ ខែមីនា ស្នងការខេត្ដសៀមរាបបានបញ្ជូនមន្ដ្រីជំនាញទៅពិនិត្យមើល ក៏ឃើញថា មានការខូចខាតមែន លុះដល់ថ្ងៃទី២៨ ខែមីនា ក៏មានការឃាត់ខ្លួនបុរសពីរនាក់»។
បុរសទាំងពីរនាក់នេះម្នាក់ឈ្មោះ សារឿន យ៉ុត ភេទប្រុស អាយុ ២១ឆ្នាំ និងម្នាក់ទៀតឈ្មោះ ព្រីង ម៉ៅ ភេទប្រុស អាយុ ១៨ឆ្នាំ។ ជនសង្ស័យទាំងពីរនាក់នេះ មានស្រុកកំណើតស្ថិតក្នុងស្រុកស្វាយលើ ខេត្ដសៀមរាប។ លោក ឡុង កុសល បានបញ្ជាក់បន្ថែមថា តាមប្រភពក្រៅផ្លូវការ ដែលនាំឲ្យបុរសទាំងពីរនោះ ឈានដល់ការវាយបំបែកចម្លាក់លិង្គថ្ម ទាំងនោះពីព្រោះតែពួកគេមានជម្លោះ នឹងគ្នា។
ទាក់ទិនរឿងនេះ អ្នកនាំពាក្យអាជ្ញាធរជាតិអប្សរា បង្ហាញការសោកស្ដាយដែលជនសង្ស័យទាំងពីរនាក់នេះ បានវាយបំបែកចម្លាក់ថ្មបុរាណ ដែលបន្សល់ទុកពីសម័យបុព្វបុរសមកដូច្នេះ។ លោកពន្យល់ថា វត្ដមានវត្ថុបុរាណនានា ដែលជាសម្បត្ដិបេតិកភណ្ឌ គឺជាអត្ដសញ្ញាជាតិមួយដ៏មានតម្លៃបំផុត សបញ្ជាក់ពីអតីតកាលដ៏រុងរឿងរបស់ប្រទេសជាតិ។ លោក ឡុង កុសល សំណូមពរដល់ប្រជាពលរដ្ឋ ឲ្យចូលរួមថែរក្សា ការពារសម្បត្ដិបេតិកភណ្ឌរបស់ជាតិ។
លោក ឡុង កុសល ៖«ការបំផ្លាញបេតិកភណ្ឌរបស់យើង គឺប្រៀបដូចជាការបំផ្លាញខ្លួនឯង។ កន្លងមកអាជ្ញាធរអប្សរាតែងតែអប់រំទៅដល់ប្រជាពលរដ្ឋពីគុណតម្លៃនៃបេតិកភណ្ឌ ហើយធ្វើយ៉ាងណាឲ្យគាត់ចូលរួម អញ្ចឹងជាការសំណូមពរនៅតែដដែលសុំឲ្យបងប្អូនប្រជាពលរដ្ឋបន្ដរក្សាចូលរួម សម្បត្ដិបេតិកភណ្ឌជាតិ»។
យ៉ាងណាក្រៅតែពីបុរសទាំងពីរនាក់ ដែលត្រូវចាប់ខ្លួននេះ សមត្ថកិច្ចក៏កំពុងតាមចាប់ខ្លួនបុរសម្នាក់ទៀត ដែលសង្ស័យជាប់ពាក់ព័ន្ធករណីនេះ៕
