ភ្នំពេញ៖ សម្ដេច ហ៊ុន សែន នាយករដ្ឋមន្រ្ដីកម្ពុជានឹងដឹកនាំគណៈប្រតិភូអញ្ជើញចូលរួមកិច្ចប្រជុំកំពូលមហាអនុតំបន់មេគង្គ លើកទី៦ ស្របជាមួយនឹងកិច្ចប្រជុំកំពូលកម្ពុជា ឡាវ វៀតណាម លើកទី១០ ស្ដីពីតំបន់ត្រីកោណអភិវឌ្ឍន៍ នាថ្ងៃទី ៣០ ដល់ថ្ងៃទី៣១ ខែមីនា ឆ្នាំ២០១៨ នៅទីក្រុងហាណូយ ប្រទេសវៀតណាម តបតាមការអញ្ជើញរបស់ លោក ង្វៀន សួនហ្វ៊ុក នាយករដ្ឋមន្រ្ដីនៃសាធារណរដ្ឋសង្គមនិយមវៀតណាម។នេះបើតាមសេចក្ដីជូនដំណឹងរបស់ក្រសួងការបរទេស និងសហប្រតិបត្តិការអន្ដរជាតិ ចុះនៅថ្ងៃទី ២៧ ខែមីនា ឆ្នាំ២០១៨។
សេចក្ដីជូនដំណឹងដដែលនេះបានបញ្ជាក់ទៀតថា ឥស្សរជនកម្ពុជាដែលនឹងអញ្ជើញអមដំណើរសម្ដេចនាយករដ្ឋមន្រ្ដី ហ៊ុន សែន មាន លោក អូន ព័ន្ធមុនីរ័ត្ន រដ្ឋមន្រ្ដីក្រសួងសេដ្ឋកិច្ចនិងហិរញ្ញាវត្ថុ លោក ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូន លោក វ៉ា គឹមហុង ប្រធានគណកម្មាធិការកិច្ចការព្រំដែនជាតិ លោក ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម លោក ថោង ខុន រដ្ឋមន្រ្ដីក្រសួទេសចរណ៍ លោក ហង់ ជួនណារ៉ុន រដ្ឋមន្រ្ដីក្រសួងអប់រំយុវជន និងកីឡា លោក វេង សាខុន រដ្ឋមន្រ្ដីក្រសួងកសិកម្មរុក្ខាប្រមាញ់ និងនេសាទ រួមទាំងសមាជិករាជរដ្ឋាភិបាលកម្ពុជាមួយចំនួនទៀតផងដែរ។
សូមជម្រាបដែរថា ប្រធានបទដែលលើកយកមកពិភាក្សានៅក្នុងកិច្ចប្រជុំកំពូលមហាអនុតំបន់មេគង្គ លើកទី៦ នេះ និយាយអំពី “ សមិទ្ធិផលរយៈពេល ២៥ឆ្នាំ នៃកិច្ចសហប្រតិបត្តិការ និងការកសាងមហាអនុតំបន់មេគង្គប្រកបដោយចីរភាព សមាហរណកម្ម និងវិបុលភាព” ។
នៅក្នុងក្របខ័ន្ឌនៃកិច្ចប្រជុំកំពូលនេះដែល សម្ដេច ហ៊ុន សែន នាយករដ្ឋមន្រ្ដីកម្ពុជាក៏នឹងអញ្ជើថ្លែងសុរន្ទកថា ក្នុងកិច្ចប្រជុំកំពូលធុរកិច្ចរបស់មហាអនុតំបន់មេគង្គដែលផ្ដោតទៅលើភាពជោគជ័យនិងការប្រឈមលើវិស័យ សំខាន់ៗនៃការអភិវឌ្ឍអនុតំបន់មេគង្គផងដែរ៕
