ភ្នំពេញ៖អគ្គនាយកដ្ឋានអន្ដោប្រវេសន៍នឹងធ្វើអធិការកិច្ចដោយផ្ទាល់ជាមួយអាជ្ញាធរខេត្ត ស្រុក និងមន្ទីរពាក់ពន្ធ័ ចុះត្រួតពិនិត្យជនបរទេសជាពលករ និងអ្នកធ្វើវិនិយោគដែលកំពុងស្នាក់នៅក្នុងប្រទេសកម្ពុជាចាប់ពីថ្ងៃទី ០១ ខែឧសភា ឆ្នាំ២០១៨ ។
នេះបើតាមការលើកឡើងរបស់អគ្គនាយករងនៃអគ្គនាយកដ្ឋានអន្ដោប្រវេសន៍ លោក ឃុន សំបូន នៅក្នុងកិច្ចប្រជុំផ្សព្វផ្សាយស្ដីពីកាតព្វកិច្ចធ្វើប័ណ្ណ និងសៀវភៅការការងាររបស់ជនបរទេសដែលកំពុងស្នាក់នៅ និងធ្វើការនៅក្នុងប្រទេសកម្ពុជា។កម្មវិធីនេះធ្វើឡើង ជាមួយស្ថាប័នពាក់ពន្ធ័នានា កាលពីថ្ងៃទី១៩ ខែ មីនា ឆ្នាំ២០១៨នៅក្នុងខេត្តកំពង់ឆ្នាំង ។
តាម លោក ឃុន សំបូរ នៅខែ មីនា និង ខែមេសា ឆ្នាំ២០១៨នេះ ក្រសួងមហាផ្ទៃរៀបចំផ្សព្វផ្សាយច្បាប់អន្ដោប្រវេសន៍ឲ្យបានទូលំទូលាយដល់បណ្ដាខេត្តក្រុងទាំងអស់នៅក្នុងព្រះរាជាណាចក្រកម្ពុជា។ ទន្ទឹមនឹងនេះ ចាប់ពីថ្ងៃ០១ ខែឧសភា ឆ្នាំ២០១៨ ក្រសួងនឹងធ្វើអធិការកិច្ចដោយផ្ទាល់ជាមួយអាជ្ញាធរខេត្ត ស្រុក និងមន្ទីរពាក់ពន្ធ័ ដើម្បីចុះត្រួតពិនិត្យជនបរទេសជាពលករ និងអ្នកធ្វើវិនិយោគដែលកំពុងស្នាក់នៅក្នុងខេត្តផងដែរ។
នៅក្នុងពិធីនេះ លោក ឈួរ ច័ន្ទឌឿន អភិបាលខេត្តកំពង់ឆ្នាំង ក៏បានសំណូមពរដល់មន្ត្រីរាជការពាក់ពន្ធ័ និងអាជ្ញាធរទាំងអស់ ត្រូវចូលរួមសហការជាមួយក្រុមការងារអធិការកិច្ចដែលបានចាត់តាំងក្នុងលិខិតបង្គាប់ការ ដើម្បីចូលរួមអនុវត្តន៍ច្បាប់នេះអោយមានប្រសិទ្ធិភាពខ្ពស់ និងសូមកុំបន្តឱ្យមានកំហុសតទៅទៀត ដូចជា ការយកសេវាលើសច្បាប់កំណត់ ការចេញសំបុត្រកំណើត ឬអត្តសញ្ញាបណ្ណ័អោយជនបរទេសជាដើម។
តាមច្បាប់អន្តោប្រវេសន៍របស់កម្ពុជា ជនបរទេសម្នាក់ៗដែលមកស្នាក់នៅធ្វើការត្រូវមានលិខិតឆ្លងដែន និងទិដ្ឋាការតាមការសុំស្នាក់នៅពី១ឆ្នាំដល់៣ឆ្នាំ ដោយមានកាត្វកិច្ចបង់ប្រាក់ចូលថវិកាជាតិក្នុងម្នាក់ៗចំនួន ១០០ដុល្លារក្នុង ១ឆ្នាំ។
នៅក្នុងទិដ្ឋភាពច្បាប់វិញ.គឺទីមួយ ជនបរទេសដែលមិនគោរពកាត្វកិច្ចនៃច្បាប់អន្តោប្រវេសន៍ នឹងត្រូវធ្វើការផាកពិន័យប្រាក់ចំនួន ១២៥ដុល្លារ ហើយត្រូវចាប់បញ្ជូនទៅឲ្យក្រសួងការងារនៃប្រទេសកម្ពុជា ។
ចំពោះអ្នកមិនអនុវត្តច្បាប់ និងត្រូវធ្វើការបណ្ដេញចេញពីកម្ពុជា ដោយប្រកាសរបស់ក្រសួងមហាផ្ទៃ។
ចំពោះអ្នកគេចវេះនឹងត្រូវចាប់ខ្លួនដាក់ពន្ធនាគារពី ១ខែ ទៅដល់ ៦ខែ ហើយនឹងត្រូវបណ្តេញចេញពីកម្ពុជា។
ករណីនេះ តាមអគ្គនាយករងនៃអគ្គនាយកដ្ឋានអន្ដោប្រវេសន៍ គឺ ពលករដែលកំពុងធ្វើការនៅក្នុងក្រុមហ៊ុនរោងចក្រសហគ្រាសទាំងអស់ត្រូវត្រៀមឯកសារផ្ទាល់ខ្លួន មានលិខិតឆ្លងដែន មានទិដ្ឋាការ និងមានសៀវភៅការងារ ដើម្បីការពារខ្លួន និងត្រូវបង្ហាញដល់ក្រុមការងារក្នុងពេលចុះធ្វើអធិការកិច្ច។
ដោយឡែក ក្នុងពេលចុះអធិការកិច្ច បើសង្ស័យក្រុមហ៊ុនណាមួយមានពលករបរទេសមិនស្របច្បាប់ ឬមិនគោរពកាត្វកិច្ចនោះ លោកព្រះរាជអាជ្ញា និងចេញដីកាចុះឆែកឆេរភ្លាម ដើម្បីអនុវត្តច្បាប់ដោយតម្លាភាពនិងប្រសិទ្ធភាព។
គួរបញ្ជាក់ដែរថា គោលបំណងនៃចុះអធិការកិច្ចរបស់ក្រសួងមហាផ្ទៃ គឺ ដើម្បីការពារសន្តិសុខជាតិបង្កើនចំណូលថវិកាជាតិការពារផលប្រយោជន៍ស្របច្បាប់របស់អ្នកវិនិយោគ និងពលករបរទេសដែលកំពុងធ្វើការងារនៅក្នុងប្រទេសកម្ពុជា៕