ប្រធានធិបតីហ្វីលីពីនលោក Rodrigo Duterte កាលពីថ្ងៃអាទិត្យ ទី១៩ មីនា ម្សិលមិញបាននិយាយថា លោកមិនចង់ធ្វើសង្គ្រាមជាមួយចិនទេ ប៉ុន្ដែលោកថា ប្រទេសធំមួយនេះ ត្រូវឈប់ការចូលទៅកាន់តំបន់ជម្លោះ ហើយត្រូវទុកឲ្យហ្វីលីពីនចូលទៅកាន់តំបន់នោះ ស្របទៅតាម សាលដីការតុលាការមជ្ឈិត្ដការអន្ដរជាតិ។
រហូតមកដល់ពេលនេះ ចិនមិនបានទទួលស្គាល់សាលក្រមតុលាការមជ្ឈិត្ដការអន្ដរជាតិ ដែលចេញសេចក្ដីសម្រេចឲ្យហ្វីលីពិនមានសិទ្ធិគ្រប់គ្រង លើផ្នែកមួយនៃសមុទ្រចិនខាងត្បូង។ ការថ្លែងរបស់ប្រធានាធិបតី Duterte ធ្វើឡើងបន្ទាប់ពីប្រទេសចិន បានបញ្ជូននាវាជាច្រើនដើម្បីទៅរុករករ៉ែ ប្រេងកាត និងធ្វើការអភិវឌ្ឍតំបន់កោះមួយចំនួន នៅប្រជុំកោះ ស្ព្រាតលី ដែលជាអតីតតំបន់ធ្លាប់គ្រប់គ្រងដោយប្រទេសហ្វីលីពីន។
លោក Rodrigo Duterte បានទទូចថា ការធ្វើឲ្យសង្គ្រាមពិតជាបាត់បង់ជិវិតមនុស្ស និងបំផ្លាញប្រទេសជាតិ។ តែហាក់ផ្ទុយនឹងលោកប្រធានាធិបតី Duterte សម្រាប់រដ្ឋមន្ត្រីក្រសួងការបរទេស Delfin Lorenzana បាននិយាយថា លោកពិតជាមានការព្រួយបារម្ភយ៉ាងខ្លាំង ចំពោះសកម្មភាពរបស់នាវាចិន ដែលនៅតែចូលទៅក្នុងតំបន់កំពុងមានជម្លោះ។ លោកថា តម្លៃសាលក្រមតុលាការមជ្ឈិត្ដការអន្ដរជាតិនៅតែមានតម្លៃជានិច្ចសម្រាប់ប្រទេសហ្វីលីពីន។
តុលាការមជ្ឈិត្ដការអន្ដរជាតិ កាលពីចុងឆ្នាំ២០១៥ បានសម្រេចឲ្យប្រទេសហ្វីលីពីនមានសិទ្ធិគ្រប់គ្រាន់ ដើម្បីចូលទៅគ្រប់គ្រងនៅតំបន់ប្រជុំកោះ ស្ព្រាតលីឬផ្នែកខ្លះនៃតំបន់នេះ ដែលប្រទេសហ្វីលីពីនខ្លួនគេផ្ទាល់ បានហៅថា កោះស្ពាបូរ៉ូ។ យ៉ាងណាក៏ដោយប្រទេសចិន នៅតែព្រមានថា ខ្លួនមិនទទួលស្គាល់សេចក្ដីសម្រេចរបស់យន្ដការអន្ដរជាតិមួយនេះទេ។ ជម្លោះនៅសមុទ្រចិនខាងត្បូង មិនត្រឹមតែមានចិន ជាមួយហ្វីលីពីននោះទេ គឺចិន មានជម្លោះជាមួយវៀតណាម ព្រុយណេ ម៉ាឡេស៊ី និងកោះតៃវ៉ាន់ទៀតផង។ ដោយឡែកសហរដ្ឋអាមរិកបានហៅតំបន់កោះស្ព្រាតលី ថា ជាតំបន់ចរាចរណ៍ផ្លូវទឹកអន្ដរជាតិ ដែលទីក្រុងវ៉ាស៊ិនតោន ក៏មានសិទ្ធិដើម្បីបើកនាវាឆ្លងកាត់ទីនោះដែរ៕ ប្រភព AFP
