ភ្នំពេញ៖ ធនាគារជាតិនៃកម្ពុជា ប្រកាសទទួលប្ដូរក្រដាសប្រាក់រៀលដែលចាស់ ទក់ ឬរហែក ជាមួយនឹងក្រដាសប្រាក់រៀលថ្មីជូនសាធារណជន។
នេះបើយោងតាមសេចក្ដីជួនដំណឹងរបស់ធនាគារជាតិ នៃកម្ពុជា ដែលផ្សព្វផ្សាយកាលពីថ្ងៃទី១៣ ខែមីនា បានឲ្យដឹងថា នៅថ្ងៃទី២០ មីនា នេះធនាគារជាតិ នឹងទទួលប្ដូរក្រដាសប្រាក់រៀលចាស់ ទក់ ឬរហែក ជួនសាធារណជន នូវក្រដាសប្រាក់ថ្មី។ ការប្ដូរក្រដាសប្រាក់រៀលចាស់ ទក់ ឬរហែកនេះ នឹងប្រព្រឹត្ដិនៅគ្រប់សាខាធនាគារជាតិនៃកម្ពុជារាជធានី ខេត្ដ លើកលែងតែស្នាក់ការកណ្ដាលប៉ុណ្ណោះ។
ការទទួលប្ដូរក្រដាសប្រាក់រៀល ចាស់ ទក់ ឬរហែក នៅថ្ងៃនេះ គឺដើម្បីចូលរួមអបអរសាទរខួបលើកទី៣៧ នៃការដាក់ឲ្យចរាចរប្រាក់រៀលឡើងវិញ។ តាមរយៈសេចក្ដីជួនដំណឹងរបស់ធនាគារជាតិ បង្ហាញក្ដីសង្ឃឹមថា សាធារណជនទាំងអស់នឹងចូលរួមចំណែក លើកទឹកចិត្ដនិងគាំទ្រការប្រើប្រាស់ប្រាក់រៀល ឲ្យកាន់តែទូលាយដើម្បីជាប្រយោជន៍ដល់សេដ្ឋកិច្ចនិងសង្គមជាតិ៕