កណ្តាល៖ ប្រជាពលរដ្ឋមួយចំនួន ក្នុងឃុំព្រែកស្តី ស្រុកកោះធំ ខេត្តកណ្តាល បង្ហាញក្តីព្រួយបារម្ភ ចំពោះអាជ្ញាធរឃុំនេះ មិនបានធ្វើការទប់ ស្កាត់ឈ្មួញមួយចំនួន និងបណ្តោយអោយឡានដឹកដីលើសចំណុះបើកលើផ្លូវបណ្តាលឲ្យខូច។
លោក ជា ច្រឹក ពលរដ្ឋមួយរូបក្នុងភូមិ ពោធិ៍អណ្តែត ស្ថិតនៅឃុំព្រែកស្តី ក្នុងស្រុកកោះធំ ខេត្តកណ្តាល និយាយថា ពលរដ្ឋក្នុងភូមិជាច្រើនគ្រួសារកើតទុក្ខមិនសុខចិត្ត និងបង្ហាញក្តីព្រួយបារម្ភលើបញ្ហាឡានដឹកដីបើកកាត់ផ្លូវបេតុងក្នុងភូមិ បណ្តាលឱ្យខូចខាត ដែលបង្កផលវិបាកដល់ជីវភាពរស់នៅរបស់ប្រជាជនក្នុងភូមិ។
បញ្ហានេះលោកបន្តថា ពលរដ្ឋបានស្នើអាជ្ញាធរមូលដ្ឋានឱ្យជួយអន្តគមន៍ដោះស្រាយ ប៉ុន្តែគ្មានលទ្ធផល ដែលធ្វើឱ្យពលរដ្ឋដាក់ការសង្ស័យថា អាជ្ញាធរមូលដ្ឋានបានឃុបឃិតគ្នាជាមួយអ្នករកស៊ីដឹកដីទាំងនោះ ទើបមិនហ៊ានដោះស្រាយ។
ទាក់ទងក្នុងរឿងនេះ លោកមេឃុំ ឃុយ គា និយាយថា អាជ្ញាធរមូលដ្ឋានបាន ណែនាំ អ្នករកស៊ីឡានដឹកដីរួចរួលហើយ ដោយតម្រូវឱ្យឡានទាំង នោះបើកវាងផ្លូវបេតុងរបស់អ្នកភូមិ។ យ៉ាងណាលោកមេឃុំបានបដិសេធចំពោះការចោទប្រកាន់ពីសំណាក់អ្នកភូមិ ដោយលោកបញ្ជាក់ថា ការដោះស្រាយបញ្ហាជូនពលរដ្ឋ គឺត្រូវប្រើរយៈពេលមួយសមស្រប និងមានភាពយុត្តិធម៌ទាំងភាគីទាំងសងខាង។
ជាមួយគ្នានេះដែរ ព្រះចៅអធិការវត្តពោធិ៍អណ្តែត ព្រះនាម ផា បូផាន មានថេរដិកាថា សកម្មភាពដឹកជញ្ចូនដីរបស់រថយន្តដឹកដី នៅតែបន្ត សកម្មភាពជារាល់ថ្ងៃ មិនដូចការដោះសាររបស់មេឃុំដែលអាងអះថា បានចាត់វិធានការលើអ្នករកស៊ីដឹកដីនោះទេ។
យ៉ាងណាព្រះចៅអធិការសូមឱ្យអាជ្ញាធរដែនដីចាត់វិធានការឱ្យទាន់ពេលវេលា ដើម្បីទប់ស្កាត់បាតុភាពណាមួយដែលអាចកើតមានជាយថាហេតុ។ តាមព្រះចៅអធិការ និងពលរដ្ឋបានអាងអះថា ផ្លូវមួយខ្សែនេះសាងសង់ឡើងក្រោមការរៃអង្គាសប្រាក់ពីពលរដ្ឋ និងគណៈកម្មាការវត្ត ធ្វើសម្រាប់សម្រួលការធ្វើដំណើររបស់ប្រជាជនក្នុងភូមិ។ ផ្លូវបេតុងមួយខ្សែនេះមានប្រវែងប្រមាណមួយគីឡូម៉ែត និងទទឹងប្រវែង ៤ម៉ែត្រ៕