ភ្នំពេញ៖ ស្ត្រីដែលត្រៀមប្រកួតប្រជែងការបោះឆ្នោតក្រុមប្រឹក្សា ឃុំ សង្កាត់ នៅឆ្នាំ២០១៧នេះ មានជាង ២ ម៉ឺននាក់ ខណៈបេក្ខជនឈរឈ្មោះក្រុមប្រឹក្សាឃុំ សង្កាត់មានជាង ៩ម៉ឺននាក់។នេះជាបញ្ជាក់របស់លោកហង្សពុទ្ធាអ្នកនាំពាក្យ គណៈកម្មាធិការជាតិ រៀបចំការបោះឆ្នោត គជ ប។
ស្ត្រីត្រូវបានរាជរដ្ឋាភិបាល និងក្រុមអង្គការសង្គមស៊ីវិលបានលើកកម្ពស់ឱ្យពួកគេចូលរួមប្រទ្បូកក្នុងវិស័យនយោបាយតាមរយៈការឈរឈ្មោះជាក្រុមប្រឹក្សា ឃុំ សង្កាត់ តែការលើកកម្ពស់ឱ្យស្ត្រីចូលរួមឈរឈ្មោះជាក្រុមប្រឹក្សាឃុំ សង្កាត់ នៅមានចំនួនតិចនៅទ្បើយបើធៀបនឹងបុរស។
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា បានឱ្យវិទ្យុស្ត្រីដឹងនៅថ្ងៃទី ១០ ខែមីនា ឆ្នាំ២០១៧នេះថា ស្ត្រីពិតជាមានតួនាទីសំខាន់ក្នុងការចូលរួមប្រកួតប្រជែងការបោះឆ្នោតក្រុមប្រឹក្សា ឃុំ សង្កាត់។ ការណ៍នេះ លោក ហង្ស ពុទ្ធា លើកទ្បើងថាក្នុងចំណោមគណបក្សនយោបាយចំនួន ១២ ដែលត្រៀមប្រកួតប្រជែងការបោះឆ្នោតក្រុមប្រឹក្សា ឃុំ សង្កាត់ នាពេលខាងមុខនេះមានបេក្ខជនជាស្ត្រីសរុបជាង ២ ម៉ឺននាក់ ខណៈបេក្ខជនឈរឈ្មោះក្រុមប្រឹក្សា ឃុំ សង្កាត់ មានជាង ៩ម៉ឺនាក់។
លោក ហង្ស ពុទ្ធា ឱ្យដឹងទៀតថាក្នុងចំណោមស្ត្រីដែលបានឈរឈ្មោះជាក្រុមប្រឹក្សា ឃុំ សង្កាត់ច្រើនជាងគេគឺគណបក្សប្រជាជនកម្ពុជា បន្ទាប់មកគណបក្សសង្គ្រោះជាតិ។
អ្នកនាំពាក្យរូបនេះឱ្យដឹងថាស្ត្រីដែលឈរឈ្មោះក្រុមប្រឹក្សា ឃុំ សង្កាត់ ក្នុងគណបក្សប្រជាជនកម្ពុជា មានជាង៦ពាន់នាក់ ហើយបក្សសង្គ្រោះជាតិមានជាង៤ពាន់នាក់។
អ្នកនាំពាក្យ គ.ជ.ប រូបនេះគូសបញ្ជាក់ថាការលើកកម្ពស់ឱ្យស្ត្រីឈរឈ្មោះជាក្រុមប្រឹក្សា ឃុំ សង្កាត់នេះពិតជាមានសារៈសំខាន់ក្នុងការលើកកម្ពស់ស្ត្រីឱ្យចូលរួមប្រទ្បូកក្នុងវិស័យ នយោបាយ។ លោក ហង្ស ពុទ្ធា ស្នើឱ្យបក្សនយោបាយត្រូវលើកកម្ពស់ស្ត្រីឱ្យកាន់តែច្រើនបន្ថែមទៀតក្នុងការចូលរួមក្នុងវិស័យនយោបាយ។
លោក ហង្ស ពុទ្ធា ៖«ភាពចាំបាច់ណាស់ដែលគណបក្សនយោបាយនីមួយៗដែលមានស្ត្រីចូលរួមជាបេក្ខនារីនៃការបោះឆ្នោតក្រុមប្រឹក្សាឃុំ សង្កាត់។ គ.ជ. ប លើកទឹកចិត្តឱ្យគណបក្សនយោបាយគិតគូពិសេសជ្រើសរើសយកស្ត្រីដាក់ជាបេក្ខជនរបស់ខ្លួនឱ្យបានច្រើនហើយស្ត្រីត្រូវពង្រឹងស្មារតី សមត្ថភាពដើម្បីឆ្លើយតបនឹងតម្រូវការសង្គម»។
ឆ្លើយតបនឹងការលើកទ្បើងនេះនាយកប្រតិបត្តិគណៈកម្មាធិការអព្យាក្រឹត្យនិងយុត្តិធម៌ដើម្បីការបោះឆ្នោតដោយសេរីនិងត្រឹមត្រូវនៅកម្ពុជា NICFEC លោក សំ គន្ធាមី មានប្រសាសន៍ថា ការចូលរួមរបស់ស្ត្រីក្នុងវិស័យនយោបាយពិតជាមានតួនាទីសំខាន់ក្នុងការចូលរួមអភិវឌ្ឍប្រទេសជាតិ។ លោក បន្តថា ចំពោះគោលការណ៍គណបក្សដែលដាក់បេក្ខជនជាស្ត្រីច្រើនចូលរួមឈរឈ្មោះជាក្រុមប្រឹក្សា សង្កាត់ នោះគឺជារឿងល្អប្រសើរដែលផ្តល់លទ្ធភាពឱ្យស្ត្រីហ៊ានចូលរួមបញ្ចេញសេចក្តីសម្រេចចិត្តតាមរយៈការឈរឈ្មោះឱ្យគេបោះឆ្នោតឱ្យ។
បន្ថែមពីនេះទៀតនោះ លោកថា នៅពេលមានស្ត្រីកាន់តែច្រើនជាក្រុមប្រឹក្សា ឃុំ សង្កាត់នោះ បញ្ហាប្រឈមរបស់ស្ត្រីនឹងត្រូវបានដោះស្រាយ។
លោក ហង្ស ពុទ្ធា ៖«ស្ត្រីមានភាពក្លាហានចូលរួមបម្រើការជាថ្នាក់ដឹកនាំឃុំ សង្កាត់ ហើយស្ត្រីជួយដល់ការងារស្ត្រីដែលនៅមូលដ្ឋានព្រោះស្ត្រីគាត់យល់ដឹងពីសុខទុក្ខរបស់ស្ត្រីច្រើនជាងបុរសហើយគាត់យល់ស្ថានភាពស្ត្រីនៅតាមមូលដ្ឋានហ្នឹងច្បាស់លាស់ហើយគាត់អាចជួយដោះស្រាយបញ្ហាដូចជាអំពើហិង្សាក្នុងគ្រួសារបានច្រើនដោយសារស្ត្រីមាននៅក្នុងថ្នាក់មូលដ្ឋានឃុំ សង្កាត់ហ្នឹង»។
សូមជំរាបថា ការបោះឆ្នោតក្រុមប្រឹក្សា ឃុំ សង្កាត់ នឹងប្រព្រឹត្តិទៅនៅថ្ងៃទី ០៤ ខែមិថុនា ឆ្នាំ២០១៧ ដែលមានឃុំ សង្កាត់ នៅទូទាំងប្រទេស ១៦៤៦៕
