ភ្នំពេញ៖ព្រះមហាក្សត្រសម្តេចព្រះបរមនាថ នរោត្តម សីហមុនី បានតែងតាំងនិងផ្ទេរមុខងារចៅក្រម និងព្រះរាជអាជ្ញាចំនួន ៨៥រូប ឲ្យធ្វើជាប្រធាន អនុប្រធាននិងព្រះរាជអាជ្ញាសាលាដំបូងតាមបណ្តាខេត្តនិងរាជធានីចំនួន១៧។
នៅក្នុងព្រះរាជក្រឹត្យកាលពីថ្ងៃ២៨ កុម្ភៈ ព្រះមហាក្សត្រ បានតែងតាំង លោក មីន មករា ជាប្រធានសាលាដំបូងខេត្តកោះកុង លោក ហង់ ស៊ីថា ត្រូវបានតែងតាំងជាប្រធានសាលាដំបូងខេត្តកំពង់ស្ពឺ លោក អ៊ិត សម្ផស្ស ត្រូវបានតែងតាំងជាប្រធានសាលាដំបូង ខេត្តពោធិ៍សាត់ និង លោក ឡុង កេសភីរម្យ ត្រូវបានតែងតាំងជាប្រធានសាលាដំបូងខេត្តកំពត។ ជាមួយគ្នានេះដែរ ព្រះមហាក្សត្រក៏បានតែងតាំងអនុប្រធានសាលាដំបូងរាជធានីខេត្តចំនួន ១៦រូប និងចៅក្រមសាលាដំបូងរាជធានីខេត្តចំនួន ៣៤រូប ត្រូវបានផ្ទេរការងារ។
នៅក្នុងព្រះរាជក្រឹត្យដោយឡែកមួយទៀតព្រះមហាក្សនរោត្តម សីហមុនី បានតែងតាំងនិងផ្ទេរការងាររបស់អគ្គព្រះរាជអាជ្ញារង ព្រះរាជអាជ្ញានិងព្រះរាជអាជ្ញាក្នុងខេត្ត រាជធានីចំនួន១៧។ ក្នុងនោះមានខេត្តស្ទឹងត្រែង ខេត្តប៉ៃលិន ក្រចេះ ព្រះវិហារ ខេត្តកណ្តាល រតនគីរី តាកែវ ខេត្តកំពង់ស្ពឺ បាត់ដំបង ព្រៃវែង ខេត្តបន្ទាយមានជ័យ កំពង់ឆ្នាំង កោះកុង ខេត្ត ស្វាយរៀង មណ្ឌលគីរិ ខេត្តពោធិ៍សាត់និងរាជធានីភ្នំពេញ៕
