ភ្នំពេញ៖សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ណែនាំឱ្យមន្ត្រីរដ្ឋបាលថ្នាក់ក្រោមជាតិត្រូវគិតគូរទ្បើងវិញ ការរៀបចំចំណតយានយន្តឱ្យបានល្អប្រសើរដើម្បីបញ្ចៀសការកកស្ទះចរាចរនិងទាក់ទាញភ្ញៀវទេសចរណ៍។
ថ្លែងក្នុងទិវាជាតិទីក្រុងស្អាតឆ្នាំ២០១៧ ក្រោមប្រធានបទ «ទីក្រុងស្អាត ៖ ទីក្រុងផ្តល់ភាពកក់ក្តៅដល់ប្រជាពលរដ្ឋ និងភ្ញៀវទេសចរណ៍» ព្រឹកថ្ងៃទី ២៧ ខែកុម្ភៈ ឆ្នាំ២០១៧ នៅវិមានសន្តិភាព សម្តេច ហ៊ុន សែន មានប្រសាសន៍ថា ដើម្បីបង្កើនភាពទាក់ទាញភ្ញៀវទេសចរណ៍ចូលមកទស្សនាកម្ពុជាកាន់តែច្រើនបន្ថែមទៀតនោះ គឺត្រូវគិតគូរទ្បើងពីបញ្ហាចំណតយានយន្តដែលជាកត្តាបង្កការកកស្ទះចរាចរ។
សម្តេច ហ៊ុន សែន បន្ថែមទៀតថា ការបង្កើនភាពទាក់ទាញភ្ញៀវទេសចរណ៍ក៏ត្រូវគិតគូរពីការទប់ស្កាត់ការចោលសំរាមពាសវាលពាសកាលហើយ ត្រូវបង្កើនការផ្សព្វផ្សាយបញ្ហាបរិស្ថានឱ្យកាន់តែច្រើនបន្ថែមទៀត។
ចំណែករដ្ឋបាលថ្នាក់ក្រោមជាតិត្រូវរៀបចំសណ្តាប់ធ្នាប់សាធារណៈ ឱ្យបានល្អប្រសើរតាមរយៈការធ្វើចំណតយានយន្តឱ្យបានល្អ ជាពិសេសត្រូវចាត់វិធានការឱ្យបានម៉ឹងម៉ាត់ក្នុងការទប់ស្កាត់ពីការប្រើប្រាស់គ្រឿងញៀន៕