ភ្នំពេញ៖ បន្ទាប់ពីដោះលែងពីពន្ធនាគារព្រៃស ឲ្យមានសេរីភាពឡើងវិញ នៅព្រឹកថ្ងៃទី ២២ កុម្ភៈនេះអតីតអ្នកទោសជាប់ពន្ធនាគាររយៈពេល១៨ ខែ យុវជនគង់ រ៉ៃយ៉ា បានអះអាងថា នៅក្នុងពន្ធនាគារមានការប្រើប្រាស់គ្រឿងញៀន។ តែមន្ត្រីអគ្គនាយដ្ឋានពន្ធនាគារច្រាន់ចោលការលើកឡើងនេះ។ អតីតអ្នកទោសបានបរិហារថាមានការប្រើប្រាស់គ្រឿងញៀនក្នុងពន្ធនាគារព្រៃស ដែលជាពន្ធគារធំជាងគេនៅក្នុងប្រទេសកម្ពុជា។
លោកគង់ រ៉ៃយ៉ា ដែលបានជាប់ឃុំនៅក្នុងពន្ធនាគារព្រៃស រយៈពេល១៨ខែ ដែលត្រូវបានដោះលែងអោយមានសេរីភាពវិញ នៅព្រឹកថ្ងៃពុធ ទី២២ ខែកុម្ភៈនេះ បានថ្លែងប្រាប់ក្រុមអ្នករាយការណ៍ព័ត៌មានថា លោកបានឃើញពិរុទ្ធជនរាប់រយនាក់ បានប្រើប្រាស់គ្រឿងញឿន និងលេងល្បែងស៊ីសងនៅក្នុងពន្ធនាគារយ៉ាងអណាធិបតេយ្យ។«នៅក្នុងពន្ធនាគារមានល្បែងស៊ីសងយ៉ាងអាណាធិបតេយ្យដែលខ្ញុំមិនដែលជួបប្រទះ ការចាក់បាល់ខ្លាំងមែនតែនក្នុងពន្ធនាគារមួយថ្ងៃៗរាប់ពាន់ដុល្លារដែលជនជាប់ឃុំគេចាក់បាល។ ពេលខ្ញុំចូលពន្ធនាគារ ខ្ញុំឃើញគេប្រើប្រាស់គ្រឿងរាប់រយនាក់នៃជនជាប់ឃុំបំផ្លាញពួកគាត់ខ្លាំងមែនតែន។ ហើយគ្រឿងញៀននៅក្នុងពន្ធនាគារគឺតម្លៃថ្លៃជាងនៅក្រៅដបដង អញ្ចឹងហើយពួកគាត់បានបោកប្រាសឪពុកម្តាយមកប្រើប្រាស់ក្នុងពន្ធនាគារ»។
លោកគង់ រ៉ៃយ៉ា ត្រូវចាប់ឃុំខ្លួនកាលពីថ្ងៃទី ២២ ខែសីហា ឆ្នាំ២០១៥ ក្រោយពីលោកប្រកាសនិងអំពាវនាវតាមបណ្តាញសង្គម facebook ឲ្យធ្វើបដិវត្តន៍ពណ៌ដើម្បីផ្លាស់ប្តូររដ្ឋា ភិបាលបច្ចុប្បន្ន។
លោក ហ៊ុយ ហឿន ទីប្រឹក្សានៃគគ្គនាយករដ្ឋានពន្ធនាគារ បានបដិសេធថា គ្មានការប្រើប្រាស់គ្រឿងញៀន និងល្បែងស៊ីសងនៅក្នុងពន្ធនាគារឡើយ។លោកទទួលស្គាល់ថា ពិរុទ្ធជនមួយចំនួនមានសារធាតុញៀនតិចតួច បន្ទាប់ពីធ្វើតេស្តពិនិត្យយកសារធាតុញៀន តែអ្នកទោសដែលសារធាតុញៀនទាំងនោះ មានសារធាតុញៀនតាំងពីមិនទាន់ជាប់ឃុំមកម្ល៉េះ។ «បើនិយាយពីគ្រឿងញៀនគឺថា អត់ហេតុផលតែម្តង់ អាហ្នឹងយើងភស្តុតាំង យើងរកឃើញតែបួននាក់(ធ្វើតេស្តទឹកនោមរកសារធាតុញៀន) ក្នុងបួននាក់នោះ មានតែម្នាក់ទេ អ្នកបីនាក់ទៀតទើបចាប់ចូល បើអ្នកទោសទើបនិងចាប់ចូលភាគច្រើនមានសារធាតុញៀនមែន ក្នុងចំណោមអ្នកទោសដែលចាប់ចូលឲ្យពិនិត្យជាង ៤២ ភាគរយ មានសារធាតុញៀន»។
ទោះជាយ៉ាងណាលោក អំ សំអាត មន្ត្រីជាន់ខ្ពស់ការពារសិទ្ធិមនុស្សនៃអង្គការលីកាដូ បានទទួលស្គាល់ថា ពិតជាមានការប្រើប្រាស់គ្រឿងញៀននៅក្នុងពន្ធនាគារព្រៃសមែន។ «យើងឃើញថា មានការចុះបង្ក្រាប និងឆែកឆេរចាប់បានថ្នាំញៀនមួយចំនួន នៅក្នុងពន្ធនាគារ រដ្ឋាភិបាលក៏បានលើកពីការព្រួយបារម្ភអំពីអ្នកដែលយកពន្ធនាគារធ្វើទីបញ្ជាការសម្រាប់ចែកចាយគ្រឿង នេះបញ្ជាក់ថា លំហូរគ្រឿងនៅក្នុងពន្ធនាគារ មួយចំនួនមាននាពេលកន្លងមក»។
លោក អំ សំអាត បានអំពាវនាវដល់រដ្ឋាភិបាលត្រូវមានវិធានការម៉ត់ចត ទប់ស្កាត់កុំឲ្យគ្រឿងញឿនចរាចរចូលទៅក្នុងពន្ធនាគារ។
បើតាមរបាយការណ៍ក្រសួងមហាផ្ទៃបូកសរុបលទ្ធផលការងារឆ្នាំ ២០១៦ និងទិសដៅការងារឆ្នាំ ២០១៧ បានបង្ហាញថា មន្ត្រីអនុរក្សពន្ធនាគារបានឆែកឆេររកឃើញគ្រឿងញៀនចំនួន ១៥៧ កញ្ចប់ ដែលប៉ងយកចូលទៅក្នុងពន្ធនាគារ ហើយក្នុងនោះ មន្ត្រីអនុរក្សពន្ធនាគារបានឆែកឆេររកឃើញគ្រឿងញៀន ៣៥ កញ្ចប់ ពីអ្នកទៅសួរសុខទុក្ខអ្នកទោស។
ក្នុងយុទ្ធនាការប្រយុទ្ធប្រឆាំងគ្រឿងញៀន អាជ្ញាធរមានសមត្ថកិច្ចបង្ក្រាបបទល្មើសគ្រឿងញៀនបានជិត ២ពាន់ករណី និងឃាត់ខ្លួនជនសង្ស័យក្នុងករណីបានជាង ៧០០០ នាក់ និងរឹមអូសវត្ថុតាំំងសារធាតុញៀន១០០គីឡូក្រាម៕
