ប្រទេសចិនបានទាមទារឲ្យវៀតណាមសុំអភ័យទោសចំពោះអ្នកទេសចរណ៍ចិនម្នាក់ដែលរងការវាយតប់ដោយសន្ដិសុខព្រំដែនវៀតណាមដោយសារតែអ្នកទេសចរណ៍រូបនេះមិនព្រមបង់ប្រាក់សំណូកពេលចូលទៅប្រទេសវៀតណាម។
ការទាមទាររបស់ចិននេះបានធ្វើឡើងមួយខែមកហើយបន្ទាប់ពីប្រទេសទាំងពីរជិតខាងគ្នានេះបានសន្យាការពារសន្ដិភាពនៅក្នុងដែនសមុទ្រចិនខាងត្បូងដែលនៅតំបន់នោះទាំងចិននិងវៀតណាមសុទ្ធតែអះអាងថាជាដែនទឹករបស់ខ្លួន។
កាលពីសប្ដាហ៍មុនសន្ដិសុខមួយក្រុមដែលមានគ្នាប្រាំបីនាក់បានវាយធ្វើបាបទៅលើបុរសជនជាតិចិនម្នាក់នៅទីក្រុងម៉ុងកៃភាគខាងជើងនៃព្រំដែនវៀតណាមជាប់ប្រទេសចិនហើយការវាយធ្វើបាបបុរសចិនម្នាក់នេះគឺដោយសារតែគាត់មិនព្រមបង់ប្រាក់ចំណាយលើការទាមទារក្រៅផ្លូវការ។
អ្នកនាំពាក្យក្រសួងការបរទេសចិន គិញស៊ួង បាននិយាយថា ការិយាល័យអគ្គកុងសុលចិនបានប្រាប់រឿងនេះទៅកាន់រដ្ឋាភិបាលវៀតណាមរួចហើយដោយពួកគេប្រាប់ថាខ្លួនត្រូវការសុំទោសពីរដ្ឋាភិបាលវៀតណាមហើយត្រូវបង់សងជំងឺចិត្តទៅឲ្យជនរងគ្រោះ។
តែយ៉ាងណាក៏ដោយក្រសួងការបរទេសវៀតណាមបានប្រាប់ទីភ្នាក់ងារសារពត័មាន រ៉ូយទ័រ ថាសន្ដិសុខទាំងប្រាំបីអ្នកនេះត្រូវបានព្យួរការងារហើយប៉ុន្ដែវៀតណាមមិនបានឆ្លើយតបចំពោះការសុំទោសចិនជាផ្លូវការពីរឿងនេះទេ។ អ្នកទេសចរណ៍ចិនធ្វើដំណើរទៅប្រទេសវៀតណាមប្រមាណជា ២លាន៥សែននាក់ក្នុងមួយឆ្នាំៗ៕ប្រភព: Reuters
