ភ្នំពេញ៖រដ្ឋសភានឹងបើកកិច្ចប្រជុំវិសាមញ្ញនៅថ្ងៃទី២០ ខែកុម្ភៈ ដើម្បីពិភាក្សានិងអនុម័តសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយ។ សេចក្តីស្នើវិសោធនកម្មនេះដែលក្រុមអ្នកវិភាគចាត់ទុកថាជាច្បាប់គោលដៅដាក់គំនាបលើបក្សប្រឆាំង។
គណកម្មាធិការអចិន្ត្រៃយ៍របស់រដ្ឋសភាបានកំណត់កិច្ចប្រជុំវិសាមញ្ញនៃរដ្ឋសភានៅថ្ងៃទី២០ ខែកុម្ភៈនេះដើម្បីពិភាក្សាអនុម័តលើសេចក្តីស្នើវិសោធនកម្មច្បាប់ស្តីពីគណបក្សនយោបាយដ៏ចម្រូងចម្រាស់។
សេចក្តីស្នើវិសោធនកម្មច្បាប់នេះ ដែលទទួលរងការរិះគន់ថាធ្វើឡើងក្នុងគោលដៅបន្ថែមគំនាបលើគណបក្សប្រឆាំង។
លោកឈាង វុន អ្នកនាំពាក្យនៃក្រុមតំណាងរាស្ត្ររបស់គណបក្សប្រជាជនកម្ពុជាបានថ្លែងប្រាប់ក្រុមអ្នកកាសែតក្រោយពីកិច្ចប្រជុំគណកម្មាធិការអចិន្ត្រៃយ៍នៅថ្ងៃពុធ ទី១៥ កុម្ភៈនេះថា កិច្ចប្រជុំវិសាមញ្ញត្រូវកំណត់ធ្វើនៅថ្ងៃចន្ទ សប្តាហ៍ក្រោយ។ «គណកម្មាធិការរបស់រដ្ឋសភាបានសំរេចហើយដោយសំ ឡេង១០ ទល់នឹង២ តាមការស្នើរបស់គណកម្មការជំនាញដែលទទួលបន្ទុកការងារនេះឲ្យដាក់ចូលសភាពេញអង្គ។ ហើយយើងបានសំរេចផងដែរ ដោយសំឡេង ១០ទល់នឹង២ដដែល ធ្វើកិច្ចប្រជុំពេញអង្គជាវិសាមញ្ញនៅថ្ងៃទី២០ គឺថ្ងៃចន្ទក្រោយ។»
សេចក្តីស្នើសុំធ្វើវិសោធនកម្មច្បាប់ស្តីពីគណបក្សនយោបាយធ្វើឡើងបន្ទាប់ពីមានការស្នើរបស់សម្តេច ហ៊ុន សែន ដើម្បីរារាំងមិនឲ្យបុគ្គលដែលជាប់ពិរុទ្ធដឹកនាំគណបក្សនយោបាយ។ ច្បាប់ស្តីពីគណបក្សនយោបាយមាន ១១ជំពូក និង ៤៥ មាត្រា។ មាត្រាចំនួន ២៧ នឹងត្រូវបានធ្វើវិសោធនកម្ម ហើយបន្ថែមពីនោះនឹងមានការបញ្ចូលមាត្រាចំនួនប្រាំបន្ថែមទៀត។ ប៉ុន្តគណបក្សសង្គ្រោះជាតិបានព្យាយាមប្រឆាំងជំទាស់ការកែប្រែច្បាប់នេះ។
លោក ហូ វណ្ណ តំណាងរាស្ដ្រគណបក្សសង្គ្រោះជាតិស្នើឲ្យពន្យាពេលការអនុម័តសេចក្តីស្នើវិសោធន កម្មនេះដោយលោកផ្អែកលើបរិយាកាសនយោបាយនិងភាពល្អិតល្អន់នៃខ្លឹមសារច្បាប់។ «យើងចង់ឲ្យពន្យាពេលក្រែងលោយើងអាចរៀបចំសិក្ខាសាលាជាមួយគណបក្សផ្សេងៗ ឬក៏មហាជន សង្គមស៊ីវិលឲ្យបានទូលំទូលាយដើម្បីឲ្យច្បាប់នេះកាន់តែល្អ។»
លោក ហូ វណ្ណ បានលើកឡើងថា ប្រសិនបើច្បាប់នេះចូលជាធរមាន នោះលោក សម រង្ស៊ី នឹងក្លាយជាគោលដៅនៃការរារាំងមិនឲ្យធ្វើជាប្រធានគណបក្សនិងជាគោលដៅនៃហេតុផលនៃការរំលាយគណបក្សសង្គ្រោះជាតិដូចដែលមានចែងក្នុងមាត្រា ៣៨ថ្មីនិងមាត្រា៤៥ថ្មី។
យ៉ាងណាក៏ដោយលោក សម រង្ស៊ី ប្រធានគណបក្សសង្គ្រោះជាតិ ដែលទើបតែលាលែងតំណែងកាលពីពេលថ្មីៗនេះដែលគេមើលឃើញថា ទំនងជាលោក សម រង្ស៊ី ត្រៀមបង្កាហានិភ័យដល់គណបក្សប្រឆាំង៕