ភ្នំពេញ៖ សាលាឧទ្ធរណ៍បានសម្រេចដាក់ទោសប្រធានគណបក្សប្រឆាំងឲ្យផ្តល់ប្រាក់ពិន័យដល់ភាគីតំណាងសម្តេច ហ៊ុន សែន ក្នុងសំណុំរឿងពីបទបរិហាកេរ្តិ៍ សម្តេច ហ៊ុន សែន ទាក់ទងនឹងលើកឡើងពីទិញចំនួនចូលចិត្ត «Like» ក្លែងក្លាយ ដើម្បីបង្កើនប្រជាប្រិយភាពរបស់សម្តេចនាយករដ្ឋមន្រ្តី។ សាលដីការនៅថ្ងៃនេះគឺជាការតម្កល់សេចក្តីសំរេចរបស់សាលាដំបូងកាលពីចុងឆ្នាំមុន។
លោកសម រង្ស៊ី ប្រធានគណបក្សសង្គ្រោះជាតិត្រូវសាលាឧទ្ធរណ៍បង្គាប់ឲ្យបង់ប្រាក់ពិន័យចំនួន ២៥ លានរៀល ឬស្មើប្រមាណ ៦២៥០ដុល្លារអាមេរិក សម្រាប់ការពិន័យនិងសងប្រាក់ជំងឺចិត្តដល់ដើមបណ្តឹងទាក់ទងនឹងការបរិហាររបស់លោកសម រង្ស៊ី ថាសម្តេចហ៊ុន សែន បានទិញការចុច «like» លើទំព័រហ្វេសប៊ុកដើម្បីបង្កើនប្រជាប្រិយភាព។
លោកចៅក្រម សំរិទ្ធ សុផល ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ បានប្រកាសសាលដិកានៅព្រឹកថ្ងៃព្រហស្បត្តិ៍នេះថា ៖ «សាលាឧទ្ធរណ៍សម្រេចតម្កល់សាលក្រមរបស់សាលាដំបូងរាជធានីភ្នំពេញប្រឆាំងលោក សម រង្ស៊ី កាលពីថ្ងៃទី ០៨ ខែវិច្ឆិកា ឆ្នាំ ២០១៦ ។ »
កាលពីថ្ងៃទី ០៨ ខែវិច្ឆិកា ឆ្នំា ២០១៦ ចៅក្រមសាលាដំបូងរាជធានីភ្នំពេញ លោក អឹម វណ្ណៈ បានបង្គាប់ឲ្យលោក សម រង្ស៊ី បង់ប្រាក់ពិន័យចំនួន ១០ លានរៀល ឬ ប្រមាណជា២៥០០ដុល្លារ និង សំណងជំងឺចិត្ត ១៥ លានរៀល ឬស្មើនឹង៣៧៥០ដុល្លារអាមេរិកទៅឲ្យ លោក សោម សឿន ជាដើមបណ្តឹង។ លោក សោម សឿន ជាប្រធានក្រុមការងារគេហទំព័រហ្វេសប៊ុកសម្តេច ហ៊ុន សែន ហើយគឺជាបុគ្គលដែលទទួលរងការវាយប្រហារដោយចំៗពីប្រធានគណបក្សប្រឆាំងថា លោកបានចាត់ចែងឲ្យមានការទិញ «like» ក្លែងក្លាយដើម្បីជំរុញប្រជាប្រិយភាពទំព័រហ្វេសប៊ុករបស់សម្តេចនាយករដ្ឋមន្ត្រី។
មេធាវីការពារក្តីឲ្យលោក សម រង្ស៊ី គឺ លោក សំ សុគង់ ថ្លែងទៅកាន់អ្នករាយការណ៍ព័ត៌មានថាការសំរេចក្តីនេះ ៖ «មិនអាចទទួលយកបាន។»។ លោកសំ សុគង់ ឲ្យដឹងថា លោកនឹងប្តឹងសារទុក្ខទៅតុលាការកំពូលប្រឆាំងនឹងសេចក្តីសម្រេចនេះ។
ដោយឡែកលោក សោម សឿន ប្រធានក្រុមការងារគេហទំព័រហ្វេសប៊ុកសម្តេច ហ៊ុន សែន បានសម្តែងការសាទរចំពោះសាលដិការបស់សាលាឧទ្ធរណ៍ដោយចាត់ទុកថាសេចក្តីសំរេចនេះបានផ្តល់យុត្តិធម៌ដល់រូបលោក។ លោកសោម សឿន អះអាងថា លោកមិនបានរៀបចំឲ្យមានការទិញ «like» លើគេហទំព័ររបស់សម្តេចហ៊ុន សែន នោះទេ។
នៅក្នុងពេលនេះគេហទំព័ររបស់សម្តេច ហ៊ុន សែន បានកើនដល់ចំនួន ៦,៨៤ លាន «like» ។ រីឯទំព័រហ្វេសប៊ុករបស់លោកសម រង្ស៊ី មានចំនួន ៣,៦៦លាន «like» ។
ប្រធានគណបក្សសង្គ្រោះជាតិ លោកសម រង្ស៊ី កំពុងរស់នៅក្នុងការនិរទេសខ្លួននៅក្រៅប្រទេសចាប់តាំងពីខែវិច្ឆិកា ឆ្នាំ ២០១៥ មកម្ល៉េះ ដើម្បីគេចវេសពីការជាប់ទោសពន្ធនាគារចំនួនពីរឆ្នាំពីបទចោទប្រកាន់ថាបានបរិហារលោក ហោ ណាំហុង ឧបនាយករដ្ឋមន្ត្រីនិងជារដ្ឋមន្ត្រីការបរទេសនាពេលនោះ។
កាលពីចុងឆ្នាំ ២០១៦ តុលាការក្រុងភ្នំពេញបានផ្តន្ទាទោសលោកដោយកំបាំងមុខឲ្យជាប់ពន្ធនាគារចំនួន ០៥ ឆ្នាំពីបទបានញោះញុងឲ្យកើតចលាចលក្នុងការផុសឯកសារលើទំព័រហ្វេសប៊ុករបស់ខ្លួន។
ក្នុងពេលនេះលោក សម រង្ស៊ី កំពុងទទួលរងបណ្តឹងពីសម្តេចនាយករដ្ឋមន្ត្រីនិងបណ្តឹងពីកញ្ញា ធី សុវណ្ណថា សកម្មជនបណ្តាញសង្គមល្បីល្បាញមួយរូប៕