ភ្នំពេញ៖ប្រធានគណបក្សសង្គ្រោះជាតិលោក សម រង្ស៊ី ដែលកំពុងនិរទេសខ្លួនទៅក្រៅប្រទេសបាននិយាយថា សម្តេច ហ៊ុន សែន ចង់រំលាយគណបក្សសង្គ្រោះជាតិរបស់លោក។ មេដឹកនាំគណ បក្ស ប្រឆាំងថ្លែងដូច្នេះដោយយោងលើការបង្គាប់បញ្ជារបស់សម្តេចនាយករដ្ឋមន្ត្រីឲ្យមានសេចក្តីស្នើច្បាប់វិសោធនកម្មមួយដើម្បីហាមប្រាមអ្នកនយោបាយដែលជាប់ពិរុទ្ធមិនឲ្យដឹកនាំគណបក្សនយោបាយ។ ប៉ុន្តែលោក សុខ ឥសាន្ត លើកឡើងថា នេះជាសំដីញុះញង់របស់លោក សម រង្ស៊ី។
មេដឹកនាំគណបក្សប្រឆាំងលោក សម រង្ស៊ី ដែលកំពុងនិរទេសខ្លួនដោយស្មគ្រ័ចិត្តនៅក្រៅប្រទេសបានហៅការរៀបចំតាក់តែងវិសោធនកម្មច្បាប់ថ្មីដែលស្នើដោយសម្តេចនាយករដ្ឋមន្ត្រីហ៊ុន សែន ថា ជាចេត នាដើម្បីរំលាយគណបក្សសង្គ្រោះជាតិរបស់លោក។ ថ្លែងក្នុងបទសម្ភាសន៍ក្នុងកម្មវិធី៦៤នាទីរបស់ទូរទស្សបារាំង TV5 ដែលលោកផុសនៅលើទំព័រហ្វេសប៊ុករបស់លោកកាលពីថ្ងៃពុធ លោក សម រង្ស៊ី បានចោទប្រកាន់ថា សម្តេច ហ៊ុន សែន មានចេតនាចាប់កំហុសមេដឹកនាំគណបក្សប្រឆាំងដែលជាប់ ពិរុទ្ធដើម្បីរំលាយគណបក្សរបស់លោក។ «លោក ហ៊ុន សែន បានដើរកាន់តែឆ្ងាយទៀត។ គាត់បាននិយាយថា នៅខែមេសាខាងមុខនេះ គាត់នឹងឲ្យគេអនុម័តច្បាប់ថ្មីមួយដើម្បីរំលាយគណបក្ស ប្រឆាំងក្រោមលេសថា អ្នកដឹកនាំណាម្នាក់នៃគណបក្សប្រឆាំងត្រូវផ្តន្ទាទោសដោយតុលាការរបស់លោកនោះ គឺជាលេសដើម្បីរំលាយគណបក្សទាំងមូល។»
លោក សម រង្ស៊ី បានរនិរទេសខ្លួននៅក្រៅប្រទេសចាប់តាំងពីខែវិច្ឆិកា ឆ្នាំ២០១៥ មកម្ល៉េះ គឺមុនពេលដែលតុលាការក្រុងភ្នំពេញផ្តន្ទាទោសរូបលោកឲ្យជាប់ពន្ធនាគារចំនួនពីរឆ្នាំពីបទចោទប្រកាន់ថា បានបរិហារលោក ហោ ណាំហុង ឧបនាយករដ្ឋមន្ត្រីនិងជារដ្ឋមន្ត្រីការបរទេសនាពេលនោះ។ កាលពីចុងឆ្នាំ២០១៦ តុលាការក្រុងភ្នំពេញបានផ្តន្ទាទោសលោកដោយកំបាំងមុខឲ្យជាប់ពន្ធនាគារចំនួនប្រាំឆ្នាំពីបទបានញុះញង់ឲ្យកើតចលាចលក្នុងការផុសឯកសារលើទំព័រហ្វេសប៊ុករបស់ខ្លួន។ សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា កាលពីសប្តាហ៍មុនបានបញ្ជាឲ្យមានការរៀបចំធ្វើវិសោធនកម្មច្បាប់មួយដើម្បីរារាំងមិនឲ្យអ្នកនយោបាយណាដែលមានពិរុទ្ធចូលធ្វើជាប្រធានគណ បក្សនយោបាយបាន។ លោក សម រង្ស៊ី បានហៅចំណាត់ការតាក់តែងវិសោធនកម្មច្បាប់ថ្មីនេះថាជា «ការដើរថយក្រោយដើម្បីចាប់យកប្រពន្ធ័ចាស់ដែលមានគណបក្សតែមួយ» នៅក្នុងប្រទេស។
ឆ្លើយតបនឹងសេចក្តីអះអាងរបស់លោក សម រង្ស៊ី អ្នកនាំពាក្យគណបក្សប្រជាជនកម្ពុជាលោក សុខ ឥសាន្ត មានប្រសាសន៍ថា ការលើកទ្បើងរបស់លោក សម រង្ស៊ី «គ្មានការទទួលខុសត្រូវ និងខ្វះការយល់ដឹងពិតប្រាកដ»។ លោក សុខ ឥសាន្ត បន្តថា ការធ្វើវិសោធនកម្មនោះមិនមែនជាការំលាយបក្សប្រឆាំងនោះទេផ្ទុយទៅវិញច្បាប់នេះ «នឹងត្រូវអនុវត្តន៍ទៅលើតែជនដែលប្រព្រឹត្តបទល្មើសតែប៉ុណ្ណោះ»។ «រឿងពាក់ព័ន្ធគាត់ជាទណ្ឌិតនេះគាត់មិនអាចធ្វើប្រធានបក្សបានអាហ្នឹងជាការប្រាកដហើយ ប៉ុន្តែយកគាត់ចេញពីប្រធានបក្សមិនមែនបានន័យថា គេរំលាយបក្សគាត់ទេបើសិនជាបក្សហ្នឹងអត់មានប្រព្រឹត្តល្មើសធ្ងន់ធ្ងរដែលមានចែងនៅក្នុងច្បាប់»។
របត់នយោបាយហាក់ដូចជាតានតឹងបន្តិចឡើងវិញខណៈដែលការបោះឆ្នោតជ្រើសរើសក្រុមប្រឹក្សាឃុំសង្កាត់ខិតជិតមកដល់។ យ៉ាងណាក៏ដោយលោក សម រង្ស៊ី បានបង្ហាញចេតនាចង់វិលចូលរួមការឃោសនាបោះឆ្នោតថ្នាក់មូលដ្ឋាននេះ ប៉ុន្តែលោកគិតថា គួរតែមានសម្ពាធពីសហគមអន្តរជាតិដើម្បីជួយសម្រួលបញ្ហានយោបាយនេះ។
ប៉ុន្តែលោក សុខ ឥសាន្ត អ្នកនាំពាក្យគណបក្សប្រជាជនកម្ពុជាបានព្រមានរួចជាស្រេចថាលោក សម រង្ស៊ី ប្រឈមនឹងការចាប់ខ្លួនដាក់ពន្ធនាគារប្រសិនបើលោកវិលចូលមកកាន់កម្ពុជាវិញនោះ។ លោក សុខ ឥសាន្ត អះអាងថាពីព្រោះលោកសម រង្ស៊ី ត្រូវតុលាការសម្រេចឱ្យជាប់ក្នុងពន្ធនាគាររួចទៅហើយ។ ចំណែកនាយកប្រតិបត្ដិគណៈកម្មាធិការអព្យាក្រឹត្យ និងយុត្ដិធម៌ដើម្បីការបោះឆ្នោត ដោយសេរីនិងត្រឹមត្រូវនៅកម្ពុជាហៅកាត់ថា និចហ្វិច លោក សំ គន្ធាមី មានជំនឿចិត្តថាលោក សម រង្ស៊ី ពិតជាអាចវិលត្រទ្បប់មកកម្ពុជាវិញដើម្បីចូលរួមឃោសនាបោះឆ្នោតប្រសិនបើមានការសម្របសម្រួលនយោ បាយ៕
