ក្នុងឆ្នាំ២០១៦ ជំងឺគ្រុនចាញ់ បានថយចុះប្រមាណជា៥៤% បើប្រៀបធៀបទៅនឹងឆ្នាំ ២០១៥។នេះបើយើងតាមសេចក្តីជូនដំណឹងរបស់មជ្ឈមណ្ឌលជាតិប្រយុទ្ធជំងឺគ្រុនចាញ់ ប៉ារ៉ាស៊ីតសាស្ដ្រ និងបាណកសាស្ដ្រ នៃក្រសួងសុខាភិបាលនៅថ្ងៃព្រហស្បត្តិ៍ ទី ៩ ខែកុម្ភៈនេះ។
សេចក្តីជូនដំណឹងដដែលបញ្ជាក់ថាករណីឆ្លងជំងឺគ្រុនចាញ់បានថយចុះពី ៥៦ ២៧៤ ករណីនៅឆ្នាំ២០១៥ មកត្រឹម២៣ ៣៦៧ករណីនៅឆ្នាំ២០១៦។ក្នុងនោះករណីដែលបណ្តាលឲ្យអ្នកជំងឺស្លាប់បានថយចុះពី១០នាក់មកត្រឹមស្លាប់ម្នាក់ ក្នុងរយៈពេលដូចគ្នានេះ។
សេចក្តីជូនដំណឹងដដែលនេះ បន្ថែមថា ការធ្លាក់ចុះករណីជំងឺគ្រុនចាញ់នេះ លឿនជាងការរំពឹងទុករហូតទៅពីរឆ្នាំ។ពោលគឺក្រសួងសុខាភិបាលបានប៉ាន់ប្រមាណថាករណីកើតជំងឺគ្រុនចាញ់នៅកម្ពុជានឹងធ្លាក់ចុះដល់កម្រិតក្នុងរង្វង់៥០ភាគរយនៅឆ្នាំ២០១៨៕
