ការចូលកាន់តំណែងរបស់មេដឹកនាំបក្សប្រឆាំងនៅប្រទេសGambia ដែលបានឈ្នះឆ្នោតនៅក្នុងការបោះឆ្នោតប្រធានាធិបតី បាន ជាង ១០ថ្ងៃមកហើយដោយគេ មិនឃើញមានអ្នកគាំទ្រ អតីតជនផ្ដាច់ការ Yahya Jammeh ងើបបះបោរប្រឆាំងឡើយ។
លោក Jammeh បានកាន់អំណាចនៅ Gambia រយៈ ២២ឆ្នាំ។ ក្រោមការដឹកនាំរបស់លោកពោរពេញដោយ ការរំលោភសិទ្ធិមនុស្ស ការបំបិទសេរីភាពពលរដ្ឋ ជួបភាពក្រីក្រកាន់តែខ្លាំង ។ ក្នុងរយៈពេលនេះ លោកបានកសាងបក្សពួកនិយម សែលោហិត របស់លោកយ៉ាងច្រើន។
នៅពេល លោកត្រូវបាន បង្ខំ និរទេស ខ្លួន ទៅនៅក្រៅប្រទេស គេសង្កេតឃើញ បក្សពួកនិង ក្រុមគ្រួសារ របស់លោក ជាច្រើនរយនាក់ ក៏រត់ ទៅរស់នៅក្រៅប្រទេសដែរ លើកលែងតែអ្នកគា្មនលទ្ធភាព។ ជូនសេចក្ដីពិស្ដារដោយកញ្ញា ច្រឹក ស្រីអូន៖
ហេតុអ្វីបានជាអ្នកគាំទ្រ លោក Jammeh មិនងើបបះបោរ?
នេះជាចំណោទមួយដែលត្រូវ លើកឡើងថាតើមានកត្តាអ្វីនាំឱ្យអ្នកគាំទ្រលោកលោក Jammeh រាប់ម៉ឺនសែននាក់មិនងើបបះបោរប្រឆាំងការដឹកនាំ របស់លោក Adama Barrow ដែលជាមេដឹកនាំមកពីបក្សប្រឆាំង។
បើនិយាយរឿងនេះ គឺគេនិយាយថា មកពីពលរដ្ឋគាំទ្រលោក Jammeh មានតិចហើយ ម្យ៉ាងទៀតពួកគាត់ចង់រស់នៅក្រោម ដំបូលថ្មីមួយនៃការដឹកនាំរបស់អ្នកឈ្នះឆ្នោតតាមឆន្ទៈរបស់ពលរដ្ឋ។ កត្តាមួយទៀត អាចមកពីពលរដ្ឋ Gambia ដែលគាំទ្រ លោក Jammeh មិនឈ្លក់វង្វែងនឹងល្បែងនយោបាយ។ មួយទៀត អាចមកពី ពួកគេស្វែងយល់ពី តម្លៃនៃសេរីភាពនិង គោលការណ៍នៃការដឹកនាំប្រទេសតាមបែបប្រជាធិបតេយ្យ។ តែយ៉ាងណា អ្នកធ្វើអត្ថាធិប្បាយរបស់កាសែត Freedom News Paper បានហៅប្រទេស Gambia ដែលមានដឹកនាំថ្មី ហើយមានសន្តិភាពនៅពេលជនផ្ដាច់ការ Jammeh អស់អំណាច គឺមកពីប្រជាជនឱ្យតម្លៃលើការផ្លាស់ប្ដូរអ្នកកាន់ចង្កូតប្រទេសជាជាង ប្រកាន់និន្នាការចាស់គំរិលយកការសងសឹងជាធំ។
ម្យ៉ាងទៀត ប្រជាជនរបស់ប្រទេសក្រីក្រនៅអាហ្វ្រិកមួយនេះ មិនចង់ឃើញការដឹកនាំរបស់លោកJammeh ដែល បន្សល់ទុកនូវភាពអយុត្តិធម៌ធ្ងន់ធ្ងរនោះទេ។ យ៉ាងណា ក៏ដោយអ្វីដែលនាំឱ្យមានសន្តិភាពនៅអន្តរកាលនៃការកាន់អំណាចរបស់ លោក Adama Barrow គឺដោយសារកងទ័ព សហគមន៍សេដ្ឋកិច្ចអាហ្វ្រិកខាងលិច ដែលគាំទ្រដោយអង្គការសហប្រជាជាតិ នៅបន្តវត្តមាន ដើម្បីជួយរក្សាសន្តិភាព និងការពារប្រធានាធិបតី ថ្មីនៃប្រទេសតូចមួយនេះ។
តើលោក Jammeh និងបក្សពួកលោក អាចគេចពីទណ្ឌភាពបានដែរឬទេ?
លោកJammeh ទំនងមិនអាចគេចពីសំណុំច្បាប់បានទេ ទោះជារស់នៅក្រៅប្រទេស ក៏ដោយ។
ប្រធានាធិបតីថ្មី លោក Adama Barrow បាន បង្កើត ក្រុមផ្សះផ្សារជាតិ និងការពិតមួយ ដើម្បី រកយុត្តិធម៌សម្រាប់ជនរងគ្រោះ ដោយសារការដឹកនាំរបស់ លោក Jammeh។
ក្រុមនេះ មានសមាជិកមកពីក្រុមអង្គការមិនមែនរដ្ឋាភិបាល និងក្រុមអង្គការសិទ្ធិមនុស្សអន្តរជាតិ ។ ក្រុមមានភារកិច្ចស្វែងរកយុត្តិធម៌អំឡុងលោក Jammeh កាន់អំណាចដែលគេថា មានការរំលោភសិទិ្ធមនុស្សធ្ងន់ធ្ងរ។ មិនមានតែក្រុមនេះ ត្រូវបានបង្កើតឡើងដើម្បីរយយុត្តិធម៌ គឺមានក្រុមមួយទៀត ក៏ត្រូវបង្កើតដែរ គឺក្រុមស៊ើបអង្កេតអំពើពុករលួយរបស់ លោកJammeh និងអតីតរដ្ឋមន្ត្រីរបស់លោក។ ក្រុមនេះ នឹងស៊ើបអង្កេតបន្ទាន់ លុយ ១១លាន ៤សែនដុល្លារ ដែលគេថាជនផ្ដាច់ការរូបនេះ បានលូចពីរតនាគារតាមខ្លួនលោកទៅនៅប្រទេសគីនេខណៈលុយច្រើនលានដុល្លារទៀតបានបាត់ភ្លាមៗពេលដឹកនាំ លោក Jammeh ចាញឆ្នោត លោក Adama Barrow នៅក្នុងការបោះឆ្នោតកាលពីថ្ងៃទី ១ ធ្នូ ឆ្នាំ ២០១៦ ៕