ភ្នំពេញ៖ប្រធានាធិបតីលោក អ៊ូ ធិន ក្យាវ (U Htin Kyaw) នឹងបំពេញទស្សនកិច្ចផ្លូវរដ្ឋរយៈពេលបួនថ្ងៃនៅប្រទេសកម្ពុជាក្នុងសប្តាហ៍នេះ។
នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជានៅថ្ងៃ ចន្ទ នេះ ។ លោក អ៊ូ ធិន ក្យាវ នឹងមកដល់ប្រទេសកម្ពុជាចាប់ពីថ្ងៃទី៣ ដល់ថ្ងៃទី៦ ខែកុម្ភៈ តាមការអញ្ជើញរបស់ព្រះមហាក្សត្រសម្តេចព្រះបរមនាថ នរោត្តម សីហមុនី។
លោក អ៊ូ ក៏នឹងត្រូវចូលគាល់ព្រះមហាក្សត្រនិងជួបពិភាក្សាទ្វេភាគីជាមួយសម្តេច ហ៊ុន សែន នាយករដ្ឋមន្ត្រីកម្ពុជាផងដែរ។ ហើយមិនតែប៉ុណ្ណោះលោកគ្រោងនឹងទៅទស្សនាប្រាសទអង្គរមុននឹងចាកចេញពីប្រទេសកម្ពុជាដែរ។ លោក អ៊ូ ធិន ក្យា ជាប់ឆ្នោតជាប្រធានាធិបតីប្រទេសភូមា នៅខែមីនា ឆ្នាំ២០១៦ តាមកូតាគណបក្សសម្ពន្ធ័ជាតិដើម្បីប្រជាធិបតេយ្យរបស់លោកស្រី អោង សាន ស៊ូគ្យី៕