ភ្នំពេញ៖ទីបំផុតសកម្មជននៃអង្គការមាតាធម្មជាតិ ៣រូបបានសម្រេចជ្រើសរើសការភៀសខ្លួនទៅក្រៅប្រទេស ជាជាង តតាំងក្ដីបន្តទៀត។ ការភៀសខ្លួននេះបន្ទាប់ពីសាលាឧទ្ធរណ៍ សម្រេចកោះហៅពួកគេចូលសវនាការនៅចុងខែមករាខាងមុខនេះ ដែលពួកគេប្តឹងជំទាស់សេចក្តីស ម្រេចរបស់ព្រះរាជ អាជ្ញាសាលាដំបូងខេត្តកោះកុង ជុំវិញករណីរឿងនាំចេញខ្សាច់ទៅបរទេស។
តែយ៉ាងនេះក្ដីរឿងនេះកើតឡើង ស្របពេលក្រសួងរ៉ែ និងថាមពលសម្រេចផ្អាកនាំចេញខ្សាច់ទៅក្រៅ ប្រទេសបន្ទាប់ពីការចោទថា បាត់ចំណូលរដ្ឋរាប់រយលានដុល្លារ។ មន្ត្រីសិទិ្ធមនុស្សថា អាចមកពួកគេរងការគំរាមកំហែង។
បន្ទាប់ពីអាជីវកម្មនាំចេញខ្សាច់ត្រូវបានគេលាតត្រដាងពីភាពមិនប្រក្រតី សាលាឧទ្ធរណ៍បានសម្រេចកោះហៅសកម្មជន ៣រូប គឺលោក សាន់ ម៉ាទ្បា លោក ស៊ីម សំណាង លោក ទ្រី សុវិគា នៃអង្គការមាតាធម្មជាតិចូលសវនាការនៅដើមខែកុម្ភះ ខាងមុខនេះ។ នេះបើយោងតាមគេហទំព័រហ្វេសប៊ុករបស់អង្គ ការមាតាធម្មជាតិដែលបានបង្ហោះផ្សាយជាសាធារណៈកាលពីល្ងាច ថ្ងៃទី ២៥ មករា ឆ្នាំ២០១៧។
សកម្មជនបរិស្ថានទាំង ៣រូបនេះ ធ្លាប់ជាប់ពន្ធនាគារនៅខេត្តកោះកុងរយៈពេល ជាង១០ខែ ករណីគំរាមកំហែង និងធ្វើឱ្យខូចខាតទ្រព្យសម្បត្តិក្រុមហ៊ុនបូមខ្សាច់នៅខេត្តកោះកុង។
លោក សន ចាន់ដារ៉ា ដែលជាសកម្មជននៃអង្គការមាតាធម្មជាតិ បានឱ្យវិទ្យុស្ត្រីដឹងនៅថ្ងៃទី២៦ មករា នេះថា សកម្មជនមាតាធម្មជាតិ ៣រូប ដែលសាលាឧទ្ធរណ៍កោះហៅឱ្យចូលបំភ្លឺនៅតុលាការ បានបដិ សេធមិនចូលសវនាការ ហើយពេលនេះពួកគេកំពុងនៅក្រៅប្រទេស។ លោកបន្តថាមូលហេតុដែលសកម្មជនទាំង ៣រូប សម្រេច មិនចូលសវនាការតាមការកោះហៅរបស់សាលាឩទ្ធរណ៍នោះ ដោយសារតែពួកគេគ្មានជំនឿចិត្តទៅលើប្រព័ន្ធតុលាការ។ លោក សន ចាន់ដារ៉ា ៖«ទី០១ដោយសារស្ថានភាពបញ្ហាខ្សាច់គឺជាប្រធានបទក្តៅក្នុងដើមឆ្នាំ២០១៧អាហ្នឹងជាប្រធានបទក្តៅ ទី០២ យើងអត់មានជំនឿទៅលើប្រព័ន្ធតុលាការនៅក្នុងកម្ពុជាយើងទេយើងដឹងហើយពួកគាត់រងភាពអយុត្តិធម៌ដោយការឃុំឃាំង១០ខែកន្លងមក ទី០៣ គឺគាត់មានទស្សនៈមួយគិតថាបើសិនជាពួកចេញទៅក្រៅក៏ដោយក៏យើងអាចតស៊ូមតិតាមប្រព័ន្ធផ្សព្វផ្សាយមួយចំនួនបានផងដែរ»។
ចំណែកលោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជាយល់ឃើញថាការភៀស ខ្លួន របស់សកម្មជនទាំង ៣ រូបនេះគឺជាជម្រើសចុងក្រោយនៃការតស៊ូមតិរបស់ពួកគាត់។ តែលោក ថាការសម្រេចចិត្តមិនចូលសវនាការនេះផ្តល់ចំនុចវិជ្ជមានផង និងអវិជ្ជមានផង ហើយការកោះហៅចូលសវនការនោះគឺជារឿងចង់ឈ្នះ ចង់ចាញ់នឹងគ្នា។ លោក សន ជ័យ ៖«វាជាការយកឈ្នះចាញ់គ្នានៅក្នុងរឿងប្តឹងឧទ្ធរណ៍ដើម្បីទម្លាក់ចោលការចោទប្រកាន់ជាពិសេសការផ្តល់ឱ្យមានសំណង»។
ចំណែកលោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សុងត្រាល់ (Central) មានប្រសាសន៏ថា មកពីពួកគេមានការព្រួយបារម្ភពីសុវត្ថិភាពពេលចូលបំភ្លឺនៅក្នុងសវនាការព្រោះអាចរងការចោទប្រកាន់ឬក៏មានករណីផ្សេងទៀត។
ប៉ុន្តែលោកថារដ្ឋាភិបាលគួរលើកទឹកចិត្តដល់យុវជនដែលការពារធនធានធម្មជាតិជាជាងការបំបាក់ទឹកចិត្តពួកគេតាមរយៈប្រព័ន្ធតុលាការ។ លោក មឿន តុលា ៖«យ៉ាងណាក៏ដោយការចេញពីប្រទេសវាធ្វើឱ្យអ្នករំលោភអំណាចឬក៏អ្នកដែលទន្ទ្រានទៅលើធនធានធម្មជាតិគេសប្បាចិត្ត គ្រាន់តែថាបើសិនជាសកម្មជនទាំងអស់ហ្នឹងគាត់នៅរក្សាជំហររបស់គាត់តស៊ូទៅទៀតទោះបីគាត់នៅក្រៅប្រទេ សក៏គាត់នៅតែតស៊ូតាមដានរឿងបំភ្លេចបំផ្លាញធនធានធម្មជាតិអាហ្នឹងវាមិនមែនជារឿងអាក្រក់នោះទេ»។
សូមជំរាបថា សកម្មជនទាំងបីរូបនេះ ត្រូវបានតុលាការខេត្តកោះកុង ដោះលែងឱ្យមានសេរីភាពទ្បើងវិញបន្ទាប់ពីតុលាការឃុំខ្លួនពួកគេរយៈពេល ១០ខែ ១៥ថ្ងៃ ហើយទោសដែលនៅសេសសល់ត្រូវព្យួរ។ ទោះបីជាពួកគេត្រូវបានតុលាការព្យួរទោសក្តី ប៉ុន្តែពួកគេត្រូវបានតុលាការ តម្រូវឱ្យសងជំងឺចិត្តទៅក្រុមហ៊ុន Direct Access ក្នុងម្នាក់ៗចំនួន ១០០ លានរៀល និង២លានរៀលទៀត បង់ចូលទៅក្នុងថវិកាជាតិដែលពួកគាត់គ្មានលទ្ធភាពបោះឡើយ៕
