ភ្នំពេញ៖តួនាទីតំណាងរាស្ត្រគណបក្សសង្គ្រោះជាតិដែលមានសម្លេងភាគតិចនៅក្នុងរដ្ឋសភា អាចនឹងត្រូវបញ្ចប់នៅថ្ងៃទី ៣១ ខាងមុខនេះ ខណៈគណៈកម្មាធិការអចិន្ត្រៃយ៍រដ្ឋសភា លើស លុបដោយតំណាងរាស្ត្របក្សកាន់អំណាចសម្រេច វិសោធនកម្មជំពួកទី១២ថ្មី ប្រការ ៤៨ ថ្មី (បី) នៃបទបញ្ជាផ្ទៃក្នុងរដ្ឋសភានៅថ្ងៃទី៣១ មករា នេះ។ តែបក្សប្រឆាំងជំទាស់ សំណើនេះ។
ទីបំផុត គណៈកម្មាធិការអចិន្ត្រៃយ៍រដ្ឋសភា ដែលលើសលុបដោយតំណាងរាស្ត្របក្សកាន់អំណាចបានសម្រេចទាត់ចោលការតវ៉ា របស់តំណាងមកពីបក្សប្រឆាំងដោយ សម្រេចយកការរុះរើមាត្រានេះ ទៅដាក់សភាប្រជុំដើម្បីអនុម័ត។ការសម្រេចនេះបន្ទាប់ពីកិច្ចប្រជុំគណៈកម្មាធិការអចិន្ត្រយ៍រដ្ឋសភា ធ្វើទ្បើងនៅព្រឹកថ្ងៃទី ២៣ ខែមករា ឆ្នាំ២០១៧។
លោក ឈាង វុន តំណាងរាស្ត្រគណបក្សប្រជាជនកម្ពុជា បានផ្តល់បទសម្ភាសន៏ឱ្យក្រុមអ្នកសារព័ត៌ មានថាមូលហេតុដែលគណៈកម្មធិការអចិន្ត្រយ៍នៃរដ្ឋសភាសម្លេងភាគច្រើនយល់ស្របឱ្យធ្វើវិសោធកម្មនេះ ព្រោះបក្សសង្គ្រោះជាតិពុំមានភាពស្មោះត្រង់។ លោក ឈាង វុន បន្តថា នៅពេល បក្សទាំងពីរត្រៀមជួបពិភាក្សាដោះស្រាយបញ្ហាជាតិសំខាន់ៗ បែរជាបក្សសង្រោះ្គជាតិតែងយករឿងដោះលែងអ្នកទោសមកពាក់ព័ន្ធជាមួយ។ ទោះបីយ៉ាងនេះក្តីលោក ឈាង វុន អះអាងថា វប្បធម៌សន្ទនានឹងនៅតែបន្តប្រសិនបើគណបក្សសង្គ្រោះជាតិមានភាពស្មោះត្រង់។
លោក ឈាង វុន ៖«យើងបានពិភាក្សាគ្នាហើយយើងយល់ស្របជាមួយគ្នានៅក្នុងគណៈកម្មាធិការនេះដោយមតិ១០ទល់នឹង២ថាត្រូវធ្វើវិសោធនកម្មប្រការ៤៨ថ្មី (៣)នេះ សូមបញ្ជាក់ថាបើសិនថ្ងៃក្រោយទៅមុខទៅគណបក្សសង្គ្រោះជាតិស្មោះត្រង់រៀបចំមនុស្សជជែកមកគ្នាស្មោះត្រង់កុំយករឿងទៅរំលោភអង្គការនេះអង្គការនោះខុសទៅជាមួយអាហ្នឹងយើងអាចជជែកគ្នាបាន»។
ពាក់ព័ន្ធនឹងការលើកទ្បើងនេះអ្នកនាំពាក្យ គណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៏ថាគណបក្សសង្គ្រោះជាតិ មិនគាំទ្រឱ្យធ្វើវិសោធនកម្មនេះទ្បើយ។ លោក ពន្យល់ថា ជាទូទៅមុននឹងសរសេរបទបញ្ជាផ្ទៃក្នុងរដ្ឋសភា ឬ មុននឹងធ្វើវិសោធកម្មបទបញ្ជាផ្ទៃក្នុងគឺត្រូវមានគណៈកម្មការពិសេស គណៈកម្មាការចំពោះកិច្ច សិក្សា ជជែកវែកញែកឱ្យបានល្អិតល្អន់ តែផ្ទុយទៅវិញការស្នើវិសោធកម្មនេះចេញមកពីតែគណបក្សកាន់អំណាចទៅវិញ។
តែអ្នកនាំពាក្យបញ្ជាក់ថាបក្សប្រឆាំងយល់ឃើញថាវប្បធម៌សន្ទនានៅតែជាជម្រើសល្អរវាងបក្សទាំងពីរដើម្បីស្វែងរកដំណោះស្រាយជូនជាតិ។
លោក យ៉ែម បុញ្ញឫទ្ធិ ៖«ច្បាប់បានចែងមានមតិភាគតិច មតិភាគច្រើន ដូច្នេះជាដំណើរការមួយដ៏ល្អពីព្រោះយើងគិតថាជាសភារបស់ជាតិ សម្រាប់កូនចៅយើងតទៅថ្ងៃអនាគត តំណាងរាស្ត្រតទៅថ្ងៃអនាគតក្រោយៗទៀត មិនមែនដើម្បីសម្រាប់បុគ្គលកឹម សុខា ឬ បុគ្គលសម រង្ស៊ីទេ វប្បធម៌សន្ទនាយើងនៅតែគាំទ្រឱ្យមានដោះស្រាយបញ្ហារវាងខ្មែរនិងខ្មែរ យើងនៅតែមានជំនឿថាអាចជជែកដោះស្រាយគ្នាបាន »។
ចំណែក នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរី នឹងត្រឹមត្រូវនៅកម្ពុជា (NICFEC) យល់ឃើញថាការស្នើសុំធ្វើវិសោធនកម្មនេះ មិនគួរធ្វើនៅពេលនេះទេ ព្រោះស្ថានភាពនយោបាយហាក់បីមានភាពធូរស្បើយបន្តិច។ លោកបារម្ភថានៅពេលសម្រេចវិសោធកម្មលុបក្រុមសម្លេងភាគតិច ភាគច្រើនក្នុងសភានេះ នឹងធ្វើឱ្យនយោបាយទ្បើងកម្តៅទ្បើងវិញ ដែលឈានទៅរកផលប៉ះពាល់ដល់ការចូលរួមបោះឆ្នោតនាពេលខាងមុខ។ «បើចង់ធ្វើមិនគួរធ្វើពេលហ្នឹងទេហើយយើងជជែកគ្នាម្តងទៀតទៅគណបក្សទាំងពីរហ្នឹងហើយយើងលើកយកវិសោធនកម្មពេលហ្នឹងវាអាចធ្វើឱ្យសភាពការនយោបាយមិនសូវល្អ ព្រោះឥលូវកំពុងតែរលូនហើយស្រាប់តែមានបញ្ហាអញ្ចឹងវាអន់ចិត្តនឹងគ្នា»។
ការនាំឱ្យមានការធ្វើវិសោធនកម្មនេះគឺបន្ទាប់ពីសម្ដេច ហ៊ុន សែន ប្រាប់ថា គេត្រូវរុះរើប្រការនេះចោល ដោយមិនទុកឱ្យមានប្រធានសំឡេងភាគតិចក្នុងរដ្ឋសភាទៀតនោះទេ ព្រោះតែបក្សប្រឆាំងព្យាយាមរំលោភលើដែនសមត្ថកិច្ចតុលាការសុំដោះលែង មន្ត្រីរបស់បក្សប្រឆាំងនិង មន្ត្រីសិទ្ធិមនុស្ស៕
