ភ្នំពេញ៖មន្ត្រីគណបក្សសង្គ្រោះជាតិ និងជាប្រធានសមាគមពង្រឹងសេដ្ឋកិច្ចក្រៅប្រព័ន្ធ លោក ឌិន ពុទ្ធី បានទទូចឲ្យសម្តេចនាយករដ្ឋមន្ត្រី ហ៊ុន សែន ជួយស្វែងរកយុត្តិធម៌ បន្ទាប់ពីតុលាការបានសម្រេចដោះលែងឲ្យនៅក្រៅឃុំបណ្តោះអាសន្ន កាលពីសប្តាហ៍មុន។
៥ ថ្ងៃបន្ទាប់ ពីចេញពីពន្ធនាគារ មន្ត្រីគណបក្សប្រឆាំង និងជាប្រធានសមាគមពង្រឹងសេដ្ឋកិច្ចក្រៅប្រព័ន្ធ លោក ឌិន ពុទ្ធី បានទទូចសុំឲ្យសម្តេច ហ៊ុន សែន ជួយរកយុត្តិធម៌ និងទាមទារឲ្យតុលាការខេត្តបន្ទាយមានជ័យទម្លាក់បទចោទទាំំងស្រុងមកលើរូបលោក។ លោក ឌិន ពុទ្ធី អំពាវនាវ ដូចនេះ ធ្វើឡើងនៅក្នុង សន្និសីទសារព័ត៌មានមួយ ដែលបានបង្ហោះនៅលើគណនីហ្វេសប៊ុករបស់ព្រះតេជគុណ លួន សាវ៉ាត នៅថ្ងៃទី ១៩ ខែ មករានេះ ដែលលោក ឌិន ពុទ្ធី មានមានប្រសាសន៍ដូចនេះថា ៖«ខ្ញុំជឿជាក់ថា សម្តេច មិនប្រកាន់និន្នាការគណបក្សណាទេ គឺ សម្តេច ស្រលាញ់យុត្តិធម៌ដូចប្រជារាស្ត្រខែ្មរទូទាំងពិភពលោកដែរ។ ហើយសម្តេចនឹងស្វែងរកយុត្តិធម៌ជូនខ្ញុំ ហើយនឹងដាក់ទោសជនដែលមាន គំ និតទុច្ចរិតប្រព្រឹត្តទម្លាក់កំហុសមកលើរូបខ្ញុំយ៉ាងអយុត្តិធម៌នោះ»។
លោក ស៊ុំ ចាន់គា អ្នកសម្របសម្រួលសមាគមអាដហុកប្រចាំខេត្តបន្ទាយមានជ័យធ្លាប់បានលើកឡើងថា ប្រសិនបើតុលាការឯករាជ្យ លោក ឌិន ពុទ្ធី គួរតែត្រូវបានទម្លាក់ការចោទប្រកាន់ ព្រោះគាត់មិនបានបើកឡានបុក លោក ឈាន ពិដ្ឋសិ នាយរងប៉ុស្តិ៍នគរបាលអន្តោប្រវេសន៍ប្រចាំច្រកទ្វារអន្តរជាតិប៉ោយ ប៉ែតនោះទេ។ លោក ស៊ុំ ចាន់គា ៖«បើសិនសច្ចភាព និងឆន្ទៈច្បាប់ លោក ពុទ្ធី អត់ត្រូវបានធ្វើការចោទប្រកាន់អ្វីទេ ព្រោះសាក្សីអ្នកថតវីដេអូឃ្លីប អ្នកឃើញហេតុការណ៍អី ឈរឃើញទាំងអស់»។
ប្រធានសមាគមពង្រឹងសេដ្ឋកិច្ចក្រៅប្រព័ន្ឋ និងជាមន្ត្រីគណបក្សសង្គ្រោះជាតិ លោក ឌិន ពុទ្ធី ត្រូវបានដោះលែងឱ្យមានសេរីភាព កាលពីថ្ងៃទី១៤ មករា។ លោក ពុទ្ធី រងការចោទថា បានបើករថយន្តបុកលោកវរៈសេនីយ៍ត្រី ឈាន ពិដ្ឋសិ នាយរងប៉ុស្តិ៍នគរបាល អន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត កាលពីព្រឹកថ្ងៃទី ២២ ធ្នូ២០១៦។ ករណីនេះនាំឲ្យ លោក ពុទ្ធី ជាប់ឃុំនៅក្នុងពន្ធនាគារ ខេត្តបន្ទាយជាង ២០ ថ្ងៃ។ យ៉ាងណាថ្មីៗនេះមានព័ត៌មានលេចលឺថា អភិបាលខេត្តបន្ទាយមានជ័យថា លោកវរៈសេនីយ៍ត្រី ឈាន ពិដ្ឋសិ នាយរងប៉ុស្តិ៍នគរបាល អន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត អាចនឹងត្រូវផ្ទេរចេញពីតួនាទីនៅទីនោះ ដើម្បីស្អំចិត្តប្រជាពលរដ្ឋអ្នកតវ៉ា ពិសេសគឺអ្នកលេងបណ្តាញសង្គមហ្វេសប៊ុក៕
