ល្បែងនយោបាយឆ្មាចាប់កណ្ដុរនៅវគ្គទី៥នេះ កានតែ ជក់ចិត្តថែមទៀត ព្រោះពេលនេះ កងទ័ពប្រទេសសហភាពអាហ្វ្រិក ១៥ប្រទេសបានសម្រេចថា នឹងនាំទ័ពពិសេស ចូលលុកលុយប្រទេស Gambia ដើម្បីបណ្ដេញ ជនផ្ដាច់ការ Yahya Jammeh ពីអំណាច។
នេះ គឺជារឿងភាគ ល្បែងនយោបាយឆ្មាចាប់កណ្ដុរនៅប្រទេសតូចមួយ នៅអាហ្វ្រិក ដែលជនផ្ដាច់ការ Yahya Jammeh គឺ ជាអ្នកបង្កើតព្រឹត្តិការណ៍នេះឡើង។
នៅថ្ងៃទី១៨មករា នេះ គឺជាការចូលកាន់តំណែងរបស់ បេក្ខជនឈ្នះឆ្នោត លោក Adama Barrow ដែលរដ្ឋធម្មនុញ្ញរបស់ប្រទេស បានកំណត់។ តែជាអកុលស លោក Barrow មិនបានស្នាក់នៅក្នុងប្រទេសរបស់លោកទេ លោកកំពុងស្ថិតនៅប្រទេសជិតខាងគឺប្រទេសហ្សេនេហ្គាល់ ទីដែលលោកនឹងគ្រួសាររបស់លោក រត់ភៀសខ្លួន។
Gambia កំពុងរំកិលខ្លួនធ្លាក់ចូលក្នុងអណ្តាតភ្លើង សង្គ្រាម បណ្ដើរៗហើយ
កងទ័ពមកពី ១៥ប្រទេសនៃសហភាពអាហ្វ្រិក បានប្រកាសថា ពួកគេនឹងចូល លុកលុយប្រទេស Gambia នៅពេលឆាប់នេះហើយ បើជនផ្ដាច់ការ Yahya Jammeh នៅបន្តដេកសម្ងំក្រាញអំណាចនៅវិមានប្រធានាធិបតី មិនព្រមឱ្យអ្នកឈ្នះឆ្នោត ចូលកាន់តំណែង ឱ្យទាន់ពេលវេលានោះទេ។
តាមសេចក្ដីរាយការណ៍របស់សារព័ត៌មាន Freedom NewsPaper ប្រទេសហ្សេនេហ្គាល់ដែលមានព្រំដែនជាប់ប្រទេស Gambia បានរៀបចំទីតាំងដើម្បីបើកក្បួនសង្គ្រាមចូលវាយលុកប្រទេស Gambia យ៉ាងយូរបំផុតនៅថ្ងៃ ១៩មករា។ តាមប្រភពដដែល កងទ័ពដែលប្រមូលផ្ដុំគ្នានៅប្រទេសហ្សេនេហ្គាល់នោះ គឺមកពី ១៥ប្រទេសនៃសហភាពអាហ្វ្រិក ។
កងទ័ពប្រទេសទាំងនេះ ទទួលបានភ្លើងខៀវរួចស្រេចហើយ ពីក្រុមប្រឹក្សាសន្ដិសុខអង្គការសហប្រជាជាតិដើម្បីបណ្ដេញលោក Jammeh ពីអំណាច។
សភា Gambia អនុម័តហាមកងទ័ពបរទេសចូលទឹកដី Gambia
នៅពេលដែលដឹងថា កងទ័ពសហភាពអាហ្វ្រិកបានត្រៀមខ្លួនរួចហើយដើម្បីចូលលុកលុយ ទឹកដី Gambia ហើយប្ដូររដ្ឋាភិបាល Gambia ពីអំណាចនោះ សភាប្រទេសនេះ ដែលស្ថិតនៅក្រោមអំណាចជនផ្ដាច់ការ Jammeh បានសម្រេចអនុម័តដោយអំពាវនាវឱ្យកងទ័ពសហភាពអាហ្វ្រិក ផ្អាកផែនការចូលលុកលុយប្រទេសរបស់ខ្លួន។
សភាប្រទេសនេះ បានបញ្ជាក់ទៀតថា ទោះបីជាប្រធានាធិបតីរបស់ខ្លួនមិនព្រមចាកចេញពីអំណាចក៏ដោយប៉ុន្ដែប្រទេស Gambia នៅមានសភា មានតុលាការ ជាអ្នកសម្របសម្រួលយុទ្ធនាការនៃការផ្ទេរអំណាចដោយសន្ដិវិធី។ តែបែបនេះក្ដី កងទ័ពសហភាពអាហ្វ្រិក ដឹកនាំដោយប្រទេសហ្សេនេហ្គាល់ បានប្រកាសថា ពួកគេមិនទទួលយកការអំពាវនាវណាមួយទេ ទោះជាធ្វើឡើងដោយសភាប្រទេស Gambia ក៏ដោយ ព្រោះលក្ខន្ដិកៈរបស់សហភាពអាហ្វ្រិក បានបញ្ជាក់យ៉ាងច្បាស់ពីការប្រឆាំងជនទាំងឡាយណាដែលរំលោភគោលការណ៍សិទ្ធិមនុស្ស ប្រជាធិបតេយ្យ ក្រោមហេតុផលមួយដែលចង់បន្ដក្រាញអំណាចទៀតនោះ។
លោក Adama Barrow នឹងឆ្លងចូលទឹកដី Gambia ដើម្បីស្បថចូលកាន់តំណែង
លោក Adama Barrowទោះជាស្ថានភាពសឹកកាន់តែចូលមកដល់ក៏ដោយ ហើយភាពងាយគ្រោះថ្នាក់ចំពោះលោក Adama Barrow នៅចំពោះមុខក៏ដោយ បេក្ខជនប្រធានាធិបតីឈ្នះឆ្នោតរូបនេះ បានប្រកាសប្រាប់អ្នកគាំទ្រ និងជនរួមជាតិ Gambia របស់ខ្លួនថា លោកត្រូវវិលមកប្រទេសវិញដើម្បីស្បថចូលកាន់តំណែងអោយបានឆាប់បំផុត គឺ នៅថ្ងៃ ១៩មករា តាមការកំណត់របស់រដ្ឋធម្មនុញ្ញ។ លោកបាននិយាយទៀតថា លោក គឺជាបេក្ខជនឈ្នះឆ្នោតដែលមានការគាំទ្រលើសលុបពីប្រជាជន ដែលហេតុនេះលោកចាំបាច់ត្រូវប្រើឆន្ទៈរបស់លោកដើម្បីការពារផលប្រយោជន៍របស់ប្រទេសជាតិ។
លោក ក៏បានអំពាវនាវអោយកងអង្គរក្សរបស់ប្រធានាធិបតី Jammeh និងឧត្ដមសេនីយ៍មួយចំនួនបោះបង់ប្រធានាធិបតីក្រាញអំណាចនេះ ជាបន្ទាន់ ហើយត្រឡប់មករកជីវភាពគ្រួសារធម្មតាវិញ គឺ ដើម្បីកសាងប្រទេសមួយមានការគោរពសិទ្ធិមនុស្សប្រជាធិបតេយ្យឡើងវិញ។
លោក Jammeh ប្រកាសដាក់ប្រទេសគ្រាមានអាសន្ន
ប្រធានាធិបតី Jammeh ដាក់ប្រទេសគ្រាមានអាសន្ន គឺ មួយថ្ងៃបន្ទាប់ពីកងទ័ពសហភាពបានព្រមានលុកលុយប្រទេស Gambia ឲ្យបានមុនការបន្ដអំណាចរបស់លោក Jammeh ក្រោយថ្ងៃ ១៩មករា។
តាមព័ត៌មាន BBC លោក Jammeh បានប្រកាសតាមកញ្ចក់ទូរទស្សន៍ដែលផ្សាយទូទាំងប្រទេសកាលពីថ្ងៃអង្គារ៍។លោក Jammeh បានប្រាប់ជនរួមជាតិរបស់លោកឲ្យស្ថិតនៅក្នុងស្ថានភាពស្ងប់ស្ងាត់ ត្រៀមប្រយុទ្ធដើម្បីអធិបតេយ្យរបស់ប្រទេសជាតិ។លោកថា លោកមិនចង់បង្កសង្គ្រាមអ្វីទេ ប៉ុន្ដែវាជាការឈ្លានពានពីប្រទេសជិតខាងដែលរំលោភបំពានដែនដីអធិបតេយ្យ Gambia ។
តាមប្រភពដដែល លោក Jammeh បានដាក់គ្រាមានអាសន្នរយៈពេល ៩០ថ្ងៃ គឺ រហូតតុលាការកំពូលសម្រេចសេចក្ដីលើបណ្ដឹងរបស់លោកដែលសុំអោយទុកលទ្ធផលបោះឆ្នោត កាលពីថ្ងៃទី០១ ធ្នូ ជាអាសារបង់។
ពលរដ្ឋ Gambia សម្រុកទៅក្រៅប្រទេស
ពលរដ្ឋ Gambia សម្រុកទៅក្រៅប្រទេសសេចក្ដីរាយការណ៍របស់សារព័ត៌មាន Freedom Newspaper បានឱ្យដឹងថា ប្រជាជន Gambia ដែលមានទ្រព្យសម្បត្តិស្ដុកស្ដម្ភបានសម្រុកទៅនៅប្រទេសជិតខាង កាន់តែច្រើនៗឡើង នៅរយៈពេល ១សប្ដាហ៍ចុងក្រោយនេះ ដែលនាំអោយការព្រួយបារម្ភអំពីស្ថានការណ៍សឹកកាន់តែខ្លាំងឡើង។
តាមសេចក្ដីរាយការណ៍ប្រជាពលរដ្ឋទាំងនោះសម្រុកទៅនៅប្រទេសហ្សេនេហ្គាល់ ទីដែលប្រធានាធិបតីឈ្នះឆ្នោត Adama Barrow កំពុងជ្រកកោននៅទីនោះ។
មិនត្រឹមតែពលរដ្ឋធម្មតានោះទេ ដែលរត់ភៀសខ្លួនចេញពី Gambia សូម្បីឧត្ដមសេនីយ៍ និងរដ្ឋមន្ដ្រីមួយចំនួនដែលមិនគាំទ្រ លោក Jammeh បន្ដកាន់អំណាចទៀតនោះក៏បានរត់ទៅនៅប្រទេសជិតខាងផងដែរ។
ស្របពេលនេះ សេចក្ដីរាយការណ៍បញ្ជាក់ថា នាយទាហានជាច្រើនសិបនាក់ត្រូវបានចាប់ខ្លួន ដោយសារតែពួកគេមិនទទួលយកបទបញ្ជារបស់លោក Jammeh ។
រឿងភាគឆ្មាចាប់កណ្ដុរជាល្បែងនយោបាយនៅ Gambia មិនត្រឹមតែធ្វើអោយល្បីរន្ទឺនៅទ្វីបអាហ្វ្រិកនោះទេ សូម្បីតែក្រុមប្រឹក្សាសន្ដិសុខអង្គការសហប្រជាជាតិ សហភាពអឺរ៉ុប និងអាមេរិក ក៏ចាប់អារម្មណ៍ផងដែរ។
ប្រធានាធិបតីបារាំង ហ្វ្រង់ស្វ័រ ហូឡង់ ដែលបានបើកកិច្ចប្រជុំជាមួយមេដឹកនាំសហភាពអាហ្វ្រិក កាលពីថ្ងៃ ចន្ទ ទី១៦ មករា ២០១៧ លោកបានព្រមានទៅលោក Jammeh អោយចាកចេញពីតំណែងអោយផុតយ៉ាងយូរនៅថ្ងៃ ១៨ ឬ ១៩មករានេះ។ បើពុំនោះទេ លោកនឹងមានវាសនាដូចអតីតជនផ្ដាច់ការនៃប្រទេសកូដដឺវ័រ លោក ឡូរ៉ង់ បាប៊ូ ត្រូវបានកងទ័ពបារាំងសហការជាមួយកងទ័ពសហភាពអាហ្វ្រិកចូលចាប់ខ្លួន៕
