ភ្នំពេញ៖ក្រសួងការពារជាតិនឹងចល័តរថពាសដែកនិងរថយន្តយោធាជាច្រើនគ្រឿងចូលមករាជធានីភ្នំពេញ ដើម្បីអបអរសាទរទិវា ៧មករា ឆ្នាំ២០១៧។ ករណីនេះ អ្នកឃ្លាំងមើលពីការអភិវឌ្ឍសង្គម និង អង្គការឃ្លាំមើលការបោះឆ្នោតបង្ហាញទស្សនដូចគ្នាថានេះគឺជាការបង្ហាញឥទ្ធិពលមុនការបោះឆ្នោត ដែលរូបភាពនេះមិនគួរកើតមានក្នុងកាលៈទេសៈនេះឡើយ។ តែបក្សកាន់អំណាចថា នេះជាព្រឹត្តិការណ៍កីឡាតែប៉ុណ្ណោះ។
សាលារាជធានីភ្នំពេញបានជូនដំណឹងកាលពីថ្ងៃទី៤ មករា ថាគណៈកម្មការរៀបចំកីឡាកងយោធព លខេមរភូមិន្ទ នឹងចល័តរថពាសដែក ២គ្រឿង និងរថយន្តយោធា ១៥គ្រឿង មកកាន់មជ្ឈមណ្ឌលពាណិជ្ជកម្មកោះពេជ្រនៅថ្ងៃទី៥ ហើយត្រឡប់ទៅវិញថ្ងៃទី៩ ខែមករា ឆ្នាំ២០១៧ ដើម្បីអបអរសាទរទិវា ៧មករា លើកទី៣៨។
តាមសេចក្ដីជូនដំណឹងការចល័តនេះ គឺដើម្បីដាក់តាំងពិព័រណ៍យុទ្ធភណ្ឌ ក្នុងកម្មវិធីប្រកួតកីឡាកងយោធពលខេមរភូមិន្ទ ដែលត្រូវផ្លូវឆ្លងកាត់រួមមាន ផ្លូវជាតិលេខ៣ ផ្លូវវេងស្រេង ផ្លូវមុនីរ៉េត និងផ្លូវសុធារស។
រូបភាពនៃការចល័តកងទ័ពនេះ បានធ្វើឱ្យអ្នកតាមដានបញ្ហាសង្គម ចាត់ទុកជាការគំរាមកំហែងមួយថ្មីដល់សេចក្ដីសុខ និងសន្តិភាពរបស់ពលរដ្ឋ។
លោក គឹម សុខ អ្នកឃ្លាំមើលការអភិវឌ្ឍសង្គមនិងនយោបាយ ថាការចល័តរថពាសដែកនេះជាការបង្ហាញសាច់ដុំមុនការប្រកួត។ លោកថាមិនគួរមានរូបភាពបែបនេះ ឆ្លងកាត់ក្នុងក្រុងឡើយ ព្រោះវាអាចធ្វើឲ្យប៉ះពាល់អារម្មណ៍ប្រជាពលរដ្ឋ។
លោក គឹម សុខ៖ “បើប្រទេសកប្រជាធិបតេយ្យគេមិនដែលអ្នកណាបង្ហាញកីឡាបង្ហាញឬក៏ឆ្លងកាត់ទីក្រុងបែបនេះទេ! វាជាការបន្លាចប្រជាពលរដ្ឋមុនការបោះឆ្នោត វាជារូបភាពផ្ទាល់! នៅក្នុងហើយក្នុងគំនិតនិងផែនការដែលរៀបចំទុក”។
កម្ពុជាកំពុងត្រៀមរៀបចំការបោះឆ្នោតថ្នាក់ក្រោមជាតិ នៅថ្ងៃទី៤ មិថុនា ឆ្នាំ២០១៧នេះ។ ករណីរូបភាពនៃការចល័តទ័ពនេះបាននាំឱ្យពលរដ្ឋភ័យខ្លាច ខណៈការបោះឆ្នោតជិតចូលមកដល់។
លោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរីនៅកម្ពុជា ហៅកាត់ថា ខុមហ្វ្រែល បង្ហាញការយល់ឃើញប្រហាក់ប្រហែល អ្នកវិភាគ គឹម សុខ ដែរ។ លោកថា ក្នុងដំណើរការពិនិត្យឈ្មោះ និង ជិតដល់យុទ្ធនាការឃោសនាបោះឆ្នោតនេះ ជាពេលវេលាដែលប្រជាព លរដ្ឋធ្វើការសម្រេចចិត្ត ដែលរដ្ឋាភិបាល គួរជៀសវាងការបង្ហាញរូបភាពកងកម្លាំងប្រដាប់អាវុធ ដែលធ្វើឲ្យពលរដ្ឋមានការព្រួយបារម្ភ។ លោកចង់ឲ្យ ដំណើរការបោះឆ្នោតលើកនេះប្រព្រឹត្តទៅដោយបរិយាសកាស អព្យាក្រឹត្យនិងគ្មានការភ័យខ្លាច។
លោក គល់ បញ្ញា ៖ “យើងយកគោលការណ៍មិនឲ្យមានបរិយាកាសបង្ហាញអំពី កងប្រដាប់អាវុធមានកាំភ្លើងជាដើម ក្នុងអំឡុងពេលបោះឆ្នោតឬចុះឈ្មោះបោះឆ្នោតនៅទេ! ជាស្មារតី ហើយខ្ញុំយល់ឃើញថា ត្រឹមត្រូវហើយរដ្ឋអំណាច រដ្ឋាភិបាល គ.ជ.ប ត្រូវធានាស្មារតីច្បាប់ឲ្យបានខ្ជាប់ខ្ជួន ហើយឲ្យមានប្រសិទ្ធភាព”។
ជុំបញ្ហានេះលោក សុខ ឥសាន្ត អ្នកនាំពាក្យគណបក្ស ប្រជាជនកម្ពុជា មានប្រសាសន៍ថា ការចល័តរថពាសដែកនិងកងទ័ព គឺ សាលារាជធានីមានការជូនដំណឹងរួចហើយ ដែលករណីនេះប្រជាពលរដ្ឋមិនគួរមានភាពភ័យកខ្លាចទេ ណាមួយគឺព្រឹត្តការណ៍ កីឡាផងដែរ។
លោកសុខ ឥសាន្ត ៖ “ រឿងធម្មតាទេ! កុំភា្ញក់ផ្អើលនឹងធម្មតាទេ។ជួនណារថក្រោះគ្រឿងចក្រគេទុកយូរទៅវាគាំដែរ ដូចឡានយើងត្រូវប ញ្ឆេះរាល់ថ្ងៃបានវាដើរស្រួលដែរ ដល់មានការអ្វីរកប្រើការធ្វីក៏មិនបានវាមានតែប៉ុន្នឹងទេ”។
សកម្មភាពនៃការចល័តទ័ពចូលក្នុងរាជធានីភ្នំពេញ មានច្រើនមកហើយ។ កាលពីថ្ងៃទី២៨ កក្កដា ឆ្នាំ២០១៣ នៅពេលកំពុងប្រកាស លទ្ធផលបោះឆ្នោត ហើយជួនពេលនោះបក្សប្រឆាំងនាំមុខ បក្សកាន់អំណាច ក៏មានសកម្មភាពចល័តទ័ពដែរ។ នៅពេលលោក កឹមសុខា សម្ងំនៅស្នាក់ការបក្សនៅសង្កាត់ចាក់អង្រែ ខណៈតុលាការចេញដីកាកោះហៅ ក៏មានសកម្មភាពចល័តទ័ពដូចនេះដែរ៕
