នៅទីបំផុតមហាសន្និបាតអង្គការសហប្រជាជាតិនៅថ្ងៃនេះ សម្រេចដាក់អំពើសំលាប់រង្គាល ដោយសារសង្គ្រាមនៅក្នុងប្រទេសស៊ីរី ក្នុងបទល្មើសឧក្រិដ្ឋកម្មសង្គ្រាម ដោយបង្កើតក្រុមស៊ើបអង្កេត ពិសេសក្នុងសំណុំរឿងនេះ។
សេចក្ដីសម្រេចនេះ ទទួលបានការយល់ព្រមពីមហាសន្និបាត ដោយសម្លេង ១០៥ ទល់នឹង ១៥ នឹង ៥២ អនុប្បវាទនៃសមាជិកមហាសន្និបាត ១៩៣ ប្រទេស។ តាមរយៈសេចក្ដីសម្រេចនេះមហាសនិ្នបាតអង្គការសហប្រជាជាតិ បានបង្កើតក្រុមស៊ើបអង្កេតពិសេសមួយ ដើម្បីសិក្សា និងស្រាវជ្រាវអំពីការសំលាប់រង្គាលលើជនស៊ីវិលប្រមាណជា ៣សែន១ម៉ឺននាក់ ដែលបានស្លាប់ក្នុងរយៈពេល ៦ឆ្នាំនៃសង្គ្រាមស៊ីវិល។
តាមបណ្ដាញផ្សាយព័ត៌មាន BBC សេចក្ដីសម្រេចនេះ ធ្វើឡើងតាមការស្នើសុំពីប្រទេសចំនួន ៥៨ ក្នុងនោះមាន សហរដ្ឋអាមេរិក បារាំង អង់គ្លេស អ៊ីតាលី អាល្លីមង់ រួមនិងប្រទេសតួកគី អារាប់ប៊ីសាវអូឌីត និងប្រទេសក្វាតា។
សង្គ្រាមនៅប្រទេសស៊ីរី ដែលបានផ្ទុះឡើង នៅឆ្នាំ ២០១១ គឺបន្ទាប់ពីមានបដិវត្តន៍មួយប្រឆាំងនិងការដឹកនាំរបស់ប្រធានាធិបតី បាសា អាល់អាសាដ ដែលបានកាន់អំណាចជាង ៣០ឆ្នាំ។ ដោយសារសង្គ្រាម បណ្ដាលឱ្យជនស៊ីវិលជាច្រើនលាននាក់ក្លាយជាជនភៀសសឹក៕
