ភ្នំពេញ៖ ក្រសួងមហាផ្ទៃនឹងបង្ក្រាបមុខសញ្ញាពាក់ព័ន្ធគ្រឿងញៀនប្រមាណ៥ ពាន់នាក់ នៅក្នុងយុទ្ធនាការប្រយុទ្ធប្រឆាំងគ្រឿងញៀន ដែលចាប់ផ្តើមនៅថ្ងៃទី០១ មករា ឆ្នាំ ២០១៧។
ថ្លែងនៅក្នុងកិច្ចប្រជុំផ្សព្វផ្សាយផែនការស្តីពី យុទ្ធនាការប្រយុទ្ធប្រឆាំងគ្រឿងញៀនខុសច្បាប់ នៅព្រឹកថ្ងៃទី២២ ធ្នូ នេះ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន បានលើកឡើងថា អាជ្ញាធរមានសមត្ថកិច្ចបានកំណត់មុខសញ្ញាជាក់លាក់រួចហើយ អ្នកប្រើប្រាស់គ្រឿងញៀនជាង ៣ ពាន់នាក់ នៅទីក្រុងភ្នំពេញនិងបណ្ដាខេត្តផ្សេងទៀត២ពាន់នាក់។
យុទ្ធនាការប្រឆាំងគ្រឿងញៀនលើកដំបូងនៅទូទាំំងប្រទេសនឹងមានរយៈពេល ៦ ខែ ចាប់ពីថ្ងៃទី ០១ ខែ មករា ដល់ថ្ងៃទី៣០ ខែ មិថុនា ឆ្នាំ ២០១៧។
ក្នុងឆ្នាំ ២០១៦នេះ អាជ្ញាធរមានសមត្ថិកិច្ចបានចាប់ខ្លួនជនសង្ស័យជិត ១ ម៉ឺននាក់ ក្នុងនោះអ្នកប្រើប្រាស់គ្រឿងញៀនជិត ៤ ពាន់នាក់ និងអឹបអូសគ្រឿងញៀនជាង ១៧៥ គីឡូក្រាម។
ចំណែកករណីបង្ក្រាបបទល្មើសគ្រឿងញៀន អាជ្ញាធរមានសមត្ថិកិច្ច បង្ក្រាបបានជាង ៤ ពាន់ករណី ក្នុងនោះករណីប្រើប្រាស់គ្រឿងញៀនជាង ១ពាន់ករណី។ ដោយឡែក អ្នកប្រើប្រាស់គ្រឿងញៀនជិត ២ម៉ឺននាក់ ដោយកើនឡើងជាង ៤ពាន់នាក់ស្មើនិងជិត ៣០ ភាគរយ បើធៀបទៅនឹងឆ្នាំមុនៗ។ នេះបើតាមតួលេខរបស់អាជ្ញាធរជាតិប្រយុទ្ធប្រឆាំង្រឿងញៀន៕
