លោកស្រី អង់ សានស៊ូជី ទីប្រឹក្សារដ្ឋនៃប្រទេសភូមាដែលមានអំណាចប្រហាក់ប្រហែលនិងប្រធានាធិបតី បានអំពាវនាវឱ្យមានកិច្ចប្រជុំពិសេសមួយទៅរដ្ឋមន្ដ្រីការបរទេសអាស៊ានដោយផ្ដោតសំខាន់ ជាពិសេសទៅលើសហគមន៍អន្ដោប្រវេសន៍ម៉ូស្លីមរ៉ូហ៊ីងយ៉ា ដែលកំពុងភៀសខ្លួនចេញពីរដ្ឋរ៉ាក់ឃីន។
បើតាមទស្សនាវដ្ដី Nikkei Asian Review បានចេញផ្សាយឱ្យដឹងនៅថ្ងៃនេះថា លោកស្រី អង់សានស៊ូជី បានកំណត់ឱ្យមានកិច្ចប្រជុំនេះ នៅថ្ងៃច័ន្ទ សប្ដាហ៍ក្រោយ នៅទីក្រុង Yan gon ។
ការអំពាវនាវរបស់លោកស្រី អង់ សានស៊ូជី ធ្វើឡើងបន្ទាប់ពី សហគមន៍អន្ដរជាតិ ជាពិសេស ប្រទេសម៉ាឡេស៊ី ឥណ្ឌូនេស៊ី និងប្រទេសបង់ក្លាដេស បានទាមទារឱ្យភូមា បញ្ឈប់អំពើហិង្សាទៅលើសហគមន៍អន្ដោប្រវេសន៍រ៉ូហ៊ីងយ៉ា ដោយប្រទេសទាំងនោះ ចាត់ទុករឿងនេះជារឿងធ្ងន់ធ្ងរសម្រាប់បញ្ហាក្នុងតំបន់។
គិតមកដល់ពេលនេះ សហគមន៍ម៉ូស្លីមរ៉ូហ៊ីងយ៉ាបានភៀសខ្លួនទៅប្រទេសជិតខាង ជាពិសេសទៅប្រទេសបង់ក្លាដេស ម៉ាឡេស៊ី និងឥណ្ឌូនេស៊ី មានចំនួនជាង ២ម៉ឺននាក់ គឺ ក្នុងរយៈពេលតែមួយខែប៉ុណ្ណោះ បន្ទាប់ពីពួកយោធាភូមាបានវាយប្រហារលើសហគមន៍របស់ពួកគេដែលរស់នៅរដ្ឋរ៉ាក់ឃីន ភាគខាងលិចនៃប្រទេស។
សហគមន៍ម៉ូស្លីមរ៉ូហ៊ីងយ៉ា បានរត់មករស់នៅប្រទេសភូមាតាំងពីសម័យអាណានិគមអង់គ្លេស ។ ប៉ុន្ដែ ជនជាតិភាគតិចក្រុមនេះ មិនទទួលបានការផ្ដល់សញ្ជាតិនិងសិទ្ធិរស់នៅស្របច្បាប់ឡើយ បច្ចុប្បន្នពួកគេមានចំនួនប្រមាណជិត ១លាននាក់ ៕
ប្រភព:The Nation
